ಟ್ರಂಪೋ- ಬೈಡೆನ್ನೊ? ಕೊನೆಗೂ ಇತ್ಯರ್ಥವಾಯ್ತು ಅಧ್ಯಕ್ಷರ ವಿವಾದ: ಚುನಾವಣಾ ಆಯೋಗದಿಂದ ಘೋಷಣೆ

ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷೀಯ ಚುನಾವಣೆಯ ಫಲಿತಾಂಶ ಬಂದು ತಿಂಗಳುಗಳೇ ಗತಿಸಿದರೂ, ಜೋ ಬೈಡೆನ್​ ಅಧ್ಯಕ್ಷರು ಎಂದು ಫಲಿತಾಂಶ ಹೊರಬಂದಿದ್ದರೂ ಇದುವರೆಗೂ ಡೊನಾಲ್ಡ್​ ಟ್ರಂಪ್​ ಸೋಲು ಒಪ್ಪಿಕೊಂಡಿರಲಿಲ್ಲ. ಇನ್ನು ಅವರ ಅಧಿಕಾರಾವಧಿ ತಿಂಗಳು ಮಾತ್ರವಿದ್ದು, ನಂತರವೂ ತಾವೇ ಅಧ್ಯಕ್ಷರು ಎಂದು ಹೇಳುತ್ತಿದ್ದರು.

ಇದಾಗಲೇ ಟ್ರಂಪ್​ ಕೋರ್ಟ್​ ಮೆಟ್ಟಿಲೇರಿಯಾಯ್ತು, ತಮಗೆ ಸಂದೇಹವಿದ್ದ ಅನೇಕ ಕಡೆಗಳಲ್ಲಿ ಮರುಎಣಿಕೆಯನ್ನು ಮಾಡಿಸಿಯೂ ಆಯ್ತು. ಇವೆಲ್ಲವೂ ಮುಗಿದ ಮೇಲೆ ಇದೀಗ ಅಮೆರಿಕದ ಚುನಾವಣಾ ಆಯೋಗ (ಎಲೆಕ್ಟೊರಲ್ ಕಾಲೇಜ್​) ವಿಜೇತರನ್ನು ಘೋಷಣೆ ಮಾಡಿದೆ. ಅದರ ಪ್ರಕಾರ ಜೋ ಬೈಡೆನ್​ (78) ಅವರೇ ಗೆಲುವು ಸಾಧಿಸಿರುವುದು ಎಂದು ಖಚಿತಪಡಿಸಿದೆ.

ಈ ಮೂಲಕ ಅಮೆರಿಕ ಅಧ್ಯಕ್ಷ ಹುದ್ದೆಯನ್ನು ಜೋ ಬೈಡೆನ್ ಅಲಂಕರಿಸಲಿರುವುದು ಕೊನೆಗೂ ನಿಶ್ವಿತವಾಗಿದೆ. 538 ಸದಸ್ಯರ ಎಲೆಕ್ಟೊರಲ್ ಕಾಲೇಜ್, ಬೈಡೆನ್ ತಮ್ಮ ಗೆಲುವಿಗೆ ಬೇಕಾದ 270 ಸ್ಥಾನಗಳಿಗೂ ಹೆಚ್ಚು ಮತಗಳನ್ನು ಪಡೆದು ಶ್ವೇತಭವನ ಪ್ರವೇಶದ ಅಂತಿಮ ಹಂತಕ್ಕೆ ತಲುಪಿದ್ದಾರೆ ಎಂದು ತಿಳಿಸಿದೆ. ಬೈಡೆನ್-ಹ್ಯಾರಿಸ್ 306 ಎಲೆಕ್ಟೊರಲ್ ಮತಗಳನ್ನು ಪಡೆದಿದ್ದಾರೆ.

ನವಂಬರ್ 3ರಂದು ನಡೆದ ಚುನಾವಣೆಯಲ್ಲಿ 81 ದಶಲಕ್ಷದಷ್ಟು ದಾಖಲೆ ಸಂಖ್ಯೆಯ ಮತಗಳನ್ನು ಪಡೆದಿದ್ದಾರೆ ಜೋ ಬೈಡನ್- ಕಮಲಾ ಹ್ಯಾರಿಸ್. ಇದು ಅಮೆರಿಕದ ಇತಿಹಾಸದಲ್ಲೇ ಹೊಸ ದಾಖಲೆಯಾಗಿದೆ. 7 ದಶಲಕ್ಷಕ್ಕೂ ಹೆಚ್ಚು ಮತಗಳ ಅಂತರದಿಂದ ಬೈಡನ್ ಟ್ರಂಪ್ ವಿರುದ್ಧ ಗೆಲುವು ಸಾಧಿಸಿದದ್ದಾರೆ.

ಈ ನಡುವೆಯೇ ಟ್ರಂಪ್​ಗೆ ತಿರುಗೇಟು ನೀಡಿರುವ ಬೈಡೆನ್​, ಅಮೆರಿಕದ ಹೊಸ ಅಧ್ಯಾಯ ತೆರೆಯಲು ಸಕಾಲವಿದು. ನನ್ನ ಗೆಲುವಿನ ಬಗ್ಗೆ ಯಾರಿಗಾದರೂ ಅನುಮಾನವಿದ್ದರೆ, ಅವರು ತಮ್ಮ ಸಂಶಯಗಳನ್ನು ಈಗ ಬಗೆಹರಿಸಿಕೊಂಡಿರಬಹುದು ಎಂದಿದ್ದಾರೆ.

https://www.vijayavani.net/s-aap-in-up-kejriwal/

https://www.vijayavani.net/s-anti-conversion-law-lady-to-court/

https://www.vijayavani.net/s-wedding-called-off-in-up/