ಪ್ರೇಮಿಗಳ ದಿನ ಅದೃಷ್ಟಶಾಲಿ ಜೋಡಿಗೆ ಉಚಿತ ಡಿವೋರ್ಸ್​- ಹೊರಟಿದೆ ಸುತ್ತೋಲೆ...

ಟೆನ್ನೆಸ್ಸಿ (ಅಮೆರಿಕ): ಇನ್ನೇನು ಪ್ರೇಮಿಗಳ ದಿನ ಬಂದೇ ಬಿಟ್ಟಿದೆ. ಫೆ.14 ಸಮೀಪ ಬರುತ್ತಿದ್ದಂತೆಯೇ ಪ್ರೇಮಿಗಳ ಹೃದಯದಲ್ಲಿ ಮಿಂಚಿನ ಸಂಚಾರ. ತಮ್ಮ ಪ್ರೇಮ ನಿವೇದನೆಗೆ ಈ ದಿನಕ್ಕಾಗಿ ಕಾಯುತ್ತಿರುವವರು ಅದೆಷ್ಟೋ ಮಂದಿ.

ಪ್ರೇಮಿಗಳ ದಿನದ ಪರಿಕಲ್ಪನೆ ಭಾರತದ್ದು ಅಲ್ಲದಿದ್ದರೂ, ಅಂದು ಭಾರತ ಸೇರಿದಂತೆ ಬಹುತೇಕ ಎಲ್ಲಾ ದೇಶಗಳಲ್ಲಿ ಬಗೆಬಗೆಯ ಆಫರ್​ಗಳನ್ನು ನೀಡಲಾಗುತ್ತದೆ. ಆದರೆ ಒಂದು ವಿಚಿತ್ರ ರೀತಿಯ ಆಫರ್​ ಅಮೆರಿಕದ ಟೆನ್ನೆಸ್ಸಿ ನೀಡಲು ಮುಂದಾಗಿದೆ.

ಕ್ರಾಸ್​ವಿಲ್ಲೆಯಲ್ಲಿರುವ ನ್ಯಾಯಾಲಯದಲ್ಲಿ ಕಾನೂನು ಘಟಕವೊಂದರಲ್ಲಿ ಈ ಆಫರ್​ ಇದೆ. ಅಂಥದ್ದೇನಪ್ಪ ಈ ಆಫರ್​ ಎಂದರೆ ಓರ್ವ ದಂಪತಿಗೆ ಉಚಿತವಾಗಿ ಡಿವೋರ್ಸ್​ ನೀಡಲಾಗುತ್ತಿದೆ! ಎಷ್ಟೋ ದಂಪತಿ ಈ ದಿನವನ್ನು ವಿಶೇಷವಾಗಿ ಆಚರಿಸುತ್ತಾರೆ. ಆದರೆ ಅಮೆರಿಕದ ಈ ಕೋರ್ಟ್​ ಉಚಿತ ಕಾನೂನು ಸೇವೆಯ ಮೂಲಕ ಒಂದು ಜೋಡಿಗೆ ಉಚಿತವಾಗಿ ಡಿವೋರ್ಸ್​ ನೀಡಲು ಮುಂದಾಗಿದೆ.

'ಪ್ರೇಮಿಗಳ ದಿನದಿಂದು ಓರ್ವ ಅದೃಷ್ಟಶಾಲಿಗೆ ಉಚಿತ ಡಿವೋರ್ಸ್​' ಎಂಬ ಬೋರ್ಡ್​ ಹಾಕಲಾಗಿದೆ. ಒಂದು ಡಿವೋರ್ಸ್​ ಕೇಸ್​ಗೆ ಭಾರತೀಯ ರೂಪಾಯಿ ಲೆಕ್ಕಾಚಾರದಲ್ಲಿ ಹೇಳುವುದಾದರೆ 80 ಸಾವಿರ ರೂಪಾಯಿ ಖರ್ಚಾಗುತ್ತದೆಯಂತೆ. ಆದರೆ ಕರೊನಾ ಸಂಕಷ್ಟದಿಂದಾಗಿ ಅನೇಕ ಮಂದಿ ಆರ್ಥಿಕವಾಗಿ ಕುಗ್ಗಿ ಹೋಗಿದ್ದಾರೆ. ಅವರಿಗೆ ಉತ್ತೇಜನ ನೀಡುವ ಸಲುವಾಗಿ ಓರ್ವ ಅದೃಷ್ಟಶಾಲಿಗೆ ಫೆ.14ರಂದು ಉಚಿತ ಡಿವೋರ್ಸ್​ ನೀಡಲಾಗುವುದು ಎಂದು ಕೋರ್ಟ್​ ಹೇಳಿದೆ.

ಈ ಬಗ್ಗೆ ಇದಾಗಲೇ ಸುತ್ತೋಲೆ ಹೊರಡಿಸಲಾಗಿದೆ. ಇದಕ್ಕೆ ಒಂದೆರಡು ಷರತ್ತು ಅನ್ವಯ ಮಾಡಲಾಗಿದೆ. ಅದೇನೆಂದರೆ ವಿಚ್ಛೇದನ ಪಡೆಯಲು ಆಸಕ್ತಿ ಹೊಂದಿರುವ ಜೋಡಿ ಇಂಥದ್ದೊಂದು ಇ-ಮೇಲ್​ಗೆ ಮಾಹಿತಿ ನೀಡಬೇಕು. ಇಬ್ಬರ ಸಮ್ಮತಿ ಇರುವವರು ಮಾತ್ರ ಇದರಲ್ಲಿ ಭಾಗವಹಿಸಲು ಅರ್ಹರು. ಮಕ್ಕಳ ಕಸ್ಟಡಿ ವಿಚಾರವಾಗಿ ಗೊಂದಲ ಹೊಂದಿರುವ ದಂಪತಿ ಅಥವಾ ಇಬ್ಬರಲ್ಲಿ ಒಬ್ಬರು ಮಾತ್ರ ವಿಚ್ಛೇದನ ಬಯಸಿದರೆ ಅಂಥವರು ಈ ಪ್ರಕ್ರಿಯೆಯಲ್ಲಿ ಭಾಗಿಯಾಗುವಂತಿಲ್ಲ ಎಂದು ಸುತ್ತೋಲೆಯಲ್ಲಿ ಹೇಳಲಾಗಿದೆ.

https://www.vijayavani.net/s-greta-thunberg-is-trying-to-dismantle-indian-democracy/

https://www.vijayavani.net/s-nandondu-kathe-veshyeya-sahavasa/

https://www.vijayavani.net/s-priyanka-gandhi-wiping-carglass/

https://www.vijayavani.net/s-adharcard-marraige-menu/