ಚೀನಾ ಡ್ರೋನ್​ಗೆ ರುಸ್ತುಂ ಸೆಡ್ಡು: ಚಿತ್ರದುರ್ಗದ ಡಿಆರ್​ಡಿಒ ಘಟಕದಲ್ಲಿ ಡ್ರೋನ್ ಪ್ರಯೋಗ ಯಶಸ್ವಿ

ನವದೆಹಲಿ: ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್​ಡಿಒ) ತಯಾರಿಸಿರುವ ‘ರುಸ್ತುಂ-2’ ಡ್ರೋನ್ ಪ್ರಯೋಗ ಯಶಸ್ವಿಯಾಗಿದೆ. ಕರ್ನಾಟಕದ ಚಿತ್ರದುರ್ಗದ ಡಿಆರ್​ಡಿಒ ಘಟಕದಲ್ಲಿ ಶುಕ್ರವಾರ ಈ ಪ್ರಯೋಗ ನಡೆದಿದೆ. ಮಧ್ಯಮ ಎತ್ತರದಲ್ಲಿ ಹಾರಾಟ ನಡೆಸುವ ಸಾಮರ್ಥ್ಯದ ಡ್ರೋನ್ ಚಿತ್ರದುರ್ಗ ಜಿಲ್ಲೆ ಚಳ್ಳಕೆರೆಯಲ್ಲಿರುವ ವೈಮಾನಿಕ ಪರೀಕ್ಷಾ ಕೇಂದ್ರದಲ್ಲಿ 16,000 ಅಡಿ ಎತ್ತರದಲ್ಲಿ ಎಂಟು ಗಂಟೆ ಹಾರಾಟ ನಡೆಸಿ ಸಾಮರ್ಥ್ಯ ಪ್ರದರ್ಶಿಸಿತು.

ಇನ್ನೂ ಒಂದು ತಾಸು ಹಾರಾಟ ನಡೆಸುವಷ್ಟು ಇಂಧನ ಅದರಲ್ಲಿ ಉಳಿದಿತ್ತು ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಚೀನಾಕ್ಕೆ ಪ್ರಬಲ ಎದಿರೇಟು ನೀಡಲು ಇದನ್ನು ಅಭಿವೃದ್ಧಿಪಡಿಸಲಾಗಿದೆ. ಈ ವರ್ಷಾಂತ್ಯದೊಳಗೆ, ಡ್ರೋನ್ 26,000 ಅಡಿ ಎತ್ತರದಲ್ಲಿ 18 ಗಂಟೆ ಹಾರಾಟ ಸಾಮರ್ಥ್ಯವನ್ನು ಹೊಂದುವ ನಿರೀಕ್ಷೆಯಿದೆ. ಕಾರ್ಯಾಚರಣೆಯನ್ನು ಆಧರಿಸಿ ವಿವಿಧ ಪ್ರಮಾಣದ ಭಾರದ (ಪೇಲೋಡ್) ಸಾಧನ-ಸಲಕರಣೆಗಳನ್ನು ಒಯ್ಯುವ ಶಕ್ತಿ ರುಸ್ತುಂಗಿದೆ.

ಹೆರಾನ್​ಗೆ ಸರಿಸಾಟಿ

ಭಾರತೀಯ ವಾಯುಪಡೆ ಮತ್ತು ನೌಕಾಪಡೆ ಬಳಸುತ್ತಿರುವ ಇಸ್ರೇಲ್​ನ ಮಾನವ-ರಹಿತ ‘ಹೆರಾನ್’ ಡ್ರೋನ್​ಗೆ ರುಸ್ತುಂ ಸರಿಸಟಿಯಾಗಬಲ್ಲದು ಎಂಬುದು ಡಿಆರ್​ಡಿಒ ನಿರೀಕ್ಷೆಯಾಗಿದೆ.

ಇಸ್ರೇಲ್ ಜತೆ ಮಾತುಕತೆ

ಈಗಾಗಲೇ ಭಾರತ ಹೊಂದಿರುವ ಹೆರಾನ್ ಡ್ರೋನ್​ಗಳ ಉನ್ನತೀಕರಣಕ್ಕೆ ಹಾಗೂ ಆಗಸದಿಂದ ಭೂಮಿಗೆ ನೆಗೆಯುವ ಕ್ಷಿಪಣಿಗಳು ಮತ್ತು ಲೇಸರ್ ನಿರ್ದೇಶಿತ ಬಾಂಬ್​ಗಳನ್ನು ಅವುಗಳಲ್ಲಿ ಸಜ್ಜುಗೊಳಿಸುವ ವಿಚಾರವಾಗಿ ರಕ್ಷಣಾ ಸಚಿವಾಲಯ, ಇಸ್ರೇಲ್ ಏರೋಸ್ಪೇಸ್ ಇಂಡಸ್ಟ್ರೀಸ್ (ಐಎಐ) ಜೊತೆ ಮಾತುಕತೆ ನಡೆಸುತ್ತಿದೆ. ರಕ್ಷಣಾ ಸ್ವಾಧೀನ ಸಮಿತಿ (ಡಿಎಸಿ) ಹಸಿರು ನಿಶಾನೆ ತೋರಿದ ನಂತರ ಈ ಪ್ರಕ್ರಿಯೆ ಆರಂಭವಾಗಿದೆ. ಭದ್ರತೆ ಕುರಿತ ಸಂಪುಟ ಸಮಿತಿ (ಸಿಸಿಎಸ್) ನಂತರ ಈ ಯೋಜನೆಗೆ ಅನುಮತಿ ನೀಡಲಿದೆ.

ಒಂದೇ ದಿನ ಎರಡು ಪ್ರಯೋಗ

ಡಿಆರ್​ಡಿಒ ತಯಾರಿಸಿರುವ ‘ರುದ್ರಂ’ ಹೆಸರಿನ ವಿಕಿರಣ ಪ್ರತಿಬಂಧಕ ಕ್ಷಿಪಣಿಯ ಪರೀಕ್ಷೆಯನ್ನೂ ಶುಕ್ರವಾರವೇ ನಡೆಸಲಾಗಿತ್ತು. ರುಸ್ತುಂ ಕೂಡ ಶುಕ್ರವಾರ ಪರೀಕ್ಷೆಗೊಳಪಟ್ಟಿದೆ. ಒಂದೇ ದಿನ ರಕ್ಷಣಾ ಮಹತ್ವದ ಎರಡು ಪರೀಕ್ಷಾರ್ಥ ಪ್ರಯೋಗ ನಡೆದಂತಾಗಿದೆ.

https://www.vijayavani.net/operation-chhota-telagi-story-behind-the-bars/