ಜನಪ್ರತಿನಿಧಿಗಳು, ಸಂಘಟನೆಗಳು ಹಾಗೂ ಪಡಿತರ ಚೀಟಿದಾರರ ಅಪೇಕ್ಷೆಗೆ ಸ್ಪಂದಿಸಿ ಮಾಸಿಕ ಪಡಿತರ ವಿತರಣೆಯಲ್ಲಿ ಅಕ್ಕಿ ಜತೆಗೆ ಆಯಾ ಪ್ರದೇಶಕ್ಕೆ ಅನುಗುಣವಾಗಿ ರಾಗಿ ಅಥವಾ ಜೋಳ ಸೇರಿಸುವುದಕ್ಕೆ ಕ್ರಮವಹಿಸಿದ್ದು, ಜುಲೈನಿಂದ ಜಾರಿಗೆ ಬರಲಿದೆ ಎಂದು ಆಹಾರ ಸಚಿವ ಕೆ.ಗೋಪಾಲಯ್ಯ ಪ್ರಕಟಿಸಿದರು. ‘ವಿಜಯವಾಣಿ’ ಕಚೇರಿಯಲ್ಲಿ ಫೋನ್-ಇನ್ ಕಾರ್ಯಕ್ರಮದ ಮಧ್ಯೆ ಸಂವಾದದಲ್ಲಿ ಪ್ರತಿಕ್ರಿಯಿಸಿ, ರಾಷ್ಟ್ರೀಯ ಆಹಾರ ಭದ್ರತಾ ಕಾಯ್ದೆ ಪ್ರಕಾರ ತಲಾ ಪೂರೈಕೆ ಪ್ರಮಾಣದಲ್ಲಿ ವ್ಯತ್ಯಾಸವಾಗದಂತೆ ಅಕ್ಕಿಯೊಂದಿಗೆ ಆಯಾ ಪ್ರಾಂತದ ಆಹಾರ ಧಾನ್ಯ ಹಂಚಿಕೆಗೆ ನಿರ್ಧರಿಸಲಾಗಿದೆ ಎಂದರು. ಜುಲೈನಿಂದ ಡಿಸೆಂಬರ್ವರೆಗೆ ದಕ್ಷಿಣ ಕರ್ನಾಟಕ ಭಾಗದ ಪಡಿತರ ಚೀಟಿದಾರರಿಗೆ 3 ಕೆಜಿ ಅಕ್ಕಿ ಜತೆಗೆ 2 ಕೆಜಿ ರಾಗಿ ವಿತರಿಸಲಿದ್ದು, ಅಗತ್ಯವಿರುವ 1.70 ಲಕ್ಷ ಮೆಟ್ರಿಕ್ಟನ್ ರಾಗಿ ದಾಸ್ತಾನು ಮಾಡಿಕೊಳ್ಳಲಾಗಿದೆ. ಅದೇ ರೀತಿ ಉತ್ತರ ಕರ್ನಾಟಕ ಪ್ರಾಂತದವರಿಗೆ ತಲಾ 2 ಕೆಜಿ ಜೋಳ ಹಂಚುವುದಕ್ಕಾಗಿ 3,000 ಮೆಟ್ರಿಕ್ ಟನ್ ಜೋಳ ಸಂಗ್ರಹಿಸಲಾಗಿದೆ ಎಂದು ತಿಳಿಸಿದರು.
