ಉಪೇಂದ್ರ ನಿರ್ದೇಶಕರೂ ಆಗಿರುವುದರಿಂದ ಅವರು ನಟನಾಗಿ ಅಭಿನಯಿಸುವ ಚಿತ್ರಗಳಲ್ಲೂ ಅವರ ಕೈವಾಡ ಇರುತ್ತದೆ ಎಂಬ ನಂಬಿಕೆ ಇದೆ. ಆದರೆ, ಈ ಚಿತ್ರದಲ್ಲಿ ಒಂದು ಪೈಸೆಯಷ್ಟೂ ತಮ್ಮ ಕೈವಾಡವಿಲ್ಲ ಎನ್ನುತ್ತಾರೆ ಅವರು. ‘ಚಂದ್ರು ಈ ಕಥೆ ಹೇಳಿದಾಗಲೇ, ಅವರು ಹೇಗೆ ಚಿತ್ರ ಮಾಡುತ್ತಾರೆ ಎಂಬ ಕುತೂಹಲವಿತ್ತು ಏಕೆಂದರೆ, ಇದೊಂದು ಬೇರೆ ಕಾಲಘಟ್ಟದ ಚಿತ್ರವಷ್ಟೇ ಅಲ್ಲ, ಬಜೆಟ್ ಮತ್ತು ಸೆಟಪ್ ಎರಡೂ ದೊಡ್ಡದು. ಅದೊಂದು ಅದ್ಭುತವಾದ ಲೋಕ. ಹಾಗಾಗಿ, ಹೇಗೆ ಮಾಡ್ತೀರಾ? ಎಂದು ಕೇಳಿದೆ. ಫೋಟೋಶೂಟ್ಗೆ ಹೋದಾಗ ನಂಬಿಕೆ ಬಂತು. ಚಂದ್ರು ಒಂದು ಅದ್ಭುತವಾದ ಲೋಕವನ್ನು ಸೃಷ್ಟಿಸಿದ್ದರು. ಇದು ಅವರ ಕನಸು. ಆ ಕನಸಿಗೆ ಸಪೋರ್ಟ್ ಮಾಡಿಕೊಂಡು ಬಂದೆ. ಇದೊಂದು ತಂತ್ರಜ್ಞರ ಸಿನಿಮಾ. ಛಾಯಾಗ್ರಹಣ, ಸಂಗೀತ, ಸಂಕಲನ, ಕಲಾ ನಿರ್ದೇಶನ, ಗ್ರಾಫಿಕ್ಸ್ ಕೊಡುಗೆ ಜಾಸ್ತಿ ಇದೆ. ಎಲ್ಲರೂ ಅದ್ಭುತವಾಗಿ ಕೆಲಸ ಮಾಡಿದ್ದಾರೆ. ಈಗಾಗಲೇ ಟ್ರೇಲರ್ ನೋಡಿದವರು ಮೆಚ್ಚಿ ಮಾತನಾಡಿದ್ದಾರೆ. ದೆಹಲಿ, ಕೊಲ್ಕತ್ತಾದಿಂದೆಲ್ಲ ಫೋನ್ ಮಾಡುತ್ತಿದ್ದಾರೆ’ ಎನ್ನುತ್ತಾರೆ ಉಪೇಂದ್ರ.
