ರಾಮನಗರ ಕ್ಷೇತ್ರದಲ್ಲಿ ಬೋರ್ ವೆಲ್ ವಾರ್ - ಮತಕ್ಕಾಗಿ ಒಂದೇ ದಿನ ಅಕ್ಕಪಕ್ಕದಲ್ಲೇ ಬೋರ್‌ವೆಲ್ ಕೊರೆಸಿದ ಕೈ, ತೆನೆ ಮುಖಂಡರು

ರಾಮನಗರ ವಿಧಾನಸಭಾ ಕ್ಷೇತ್ರದಾದ್ಯಂತ ಚುನಾವಣಾ ರಾಜಕಾರಣ ಬಿರುಸಿನಿಂದ ಸಾಗಿದ್ದು ಮತ ಸೆಳೆಯಲು ರಾಜಕೀಯ ಪಕ್ಷಗಳು ವಿವಿಧ ಆಮಿಷಗಳ ಜತೆಗೆ ಹಲವಾರು ಘೊಷಣೆಗಳನ್ನು ಮಾಡುತ್ತಿವೆ. ಇಷ್ಟು ದಿನ ಜನರನ್ನು ತೀರ್ಥಯಾತ್ರೆಗೆ ಕಳಿಸುತ್ತಿದ್ದ ಪಕ್ಷಗಳು ಈಗ ನೀರಿನ ರಾಜಕೀಯಕ್ಕೆ ಮುಂದಾಗಿದ್ದು, ಬೋರ್‌ವೆಲ್ ಕೊರೆಸಲು ನಾ ಮುಂದು ತಾ ಮುಂದು ಎಂದು ಮುಗಿಬೀಳುತ್ತಿವೆ.

ಹಾರೋಹಳ್ಳಿ ತಾಲೂಕಿನ ಅಣೆದೊಡ್ಡಿ ಗ್ರಾಮದಲ್ಲಿ ಸೋಮವಾರ ರಾತ್ರಿ ನಡೆದ ನಾಟಕೀಯ ಬೆಳವಣಿಗೆಯಲ್ಲಿ ಕಾಂಗ್ರೆಸ್ ಮತ್ತು ಜೆಡಿಎಸ್ ಪಕ್ಷದ ಸಂಭಾವ್ಯ ಅಭ್ಯರ್ಥಿಗಳು ಮತದಾರರ ಮನಗೆಲ್ಲಲು ಬೋರ್‌ವೆಲ್ ಕೊರೆಸುವ ಮೂಲಕ ಕಸರತ್ತು ಆರಂಭಿಸಿದ್ದಾರೆ.

ಅಣೆದೊಡ್ಡಿ ಗ್ರಾಮದ ಕೆಲವು ಬೀದಿಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ತೀವ್ರವಾಗಿದ್ದು, ಜನರು ಪರದಾಡುತ್ತಿದ್ದರು. ನೀರಿನ ವಿಷಯವಾಗಿ ಮಹಿಳೆಯರ ನಡುವೆ ಜಗಳವಾಗಿದ್ದೂ ಉಂಟು. ಕಾಂಗ್ರೆಸ್ ನಾಯಕ ಇಕ್ಬಾಲ್ ಹುಸೇನ್ ಅವರು ಹಮ್ಮಿಕೊಂಡಿರುವ ಮನೆ ಮನೆಗೆ ಕಾಂಗ್ರೆಸ್ ಅಭಿಯಾನದ ಅಂಗವಾಗಿ ಗ್ರಾಮಕ್ಕೆ ಭಾನುವಾರ ಭೇಟಿ ನೀಡಿದಾಗ ಮಹಿಳೆಯರಿಂದ ವಿರೋಧ ವ್ಯಕ್ತವಾಯಿತು. ಇದನ್ನೇ ಪ್ರತಿಷ್ಟೆಯಾಗಿ ತೆಗೆದುಕೊಂಡ ಇಕ್ಬಾಲ್ ಹುಸೇನ್ ಬೋರ್‌ವೆಲ್ ಕೊರೆಸಲು ಮುಂದಾದರು. ತಜ್ಞರಿಂದ ನೀರಿರುವ ಸ್ಥಳ ಗುರುತಿಸಿದರು. ಈ ವಿಷಯ ತಿಳಿದ ಜೆಡಿಎಸ್ ಮುಖಂಡರೂ ನಾವೇನು ಕಮ್ಮಿಯಿಲ್ಲ ಎಂದು ಪಕ್ಕದಲ್ಲೇ ಮತ್ತೊಂದು ಬೋರ್‌ವೆಲ್ ಕೊರೆಸಲು ಮುಂದಾದರು. ಎರಡೂ ಪಕ್ಷದವರು ಸೋಮವಾರ ರಾತ್ರಿ ಅಕ್ಕಪಕ್ಕದಲ್ಲೇ ಬೋರ್‌ವೆಲ್ ಕೊರೆಸಿದ್ದು, ಎರಡರಲ್ಲೂ ಸಮೃದ್ಧಿಯಾಗಿ ನೀರು ಸಿಕ್ಕಿದ್ದು, ಜನತೆ ಸಂತಸಗೊಂಡಿದ್ದಾರೆ.

ಆಣೆದೊಡ್ಡಿ ಗ್ರಾಮದಲ್ಲಿ 400 ಮನೆಗಳಿದ್ದು ಸುಮಾರು 1000 ಮತದಾರರಿದ್ದಾರೆ. ಶಾಸಕರಾದವರು 5 ವರ್ಷದಿಂದ ಕನಿಷ್ಠ ನೀರು ಒದಗಿಸುವ ಕೆಲಸ ಮಾಡಲಿಲ್ಲ. ಈಗ ನಾವು ಬೋರ್‌ವೆಲ್ ಕೊರೆಸಿ ನೀರು ಒದಗಿಸಿದ ಕೆಲಸವನ್ನು ನೋಡಿ ಅವರೂ ಬೋರ್‌ವೆಲ್ ಕೊರೆಸಿದ್ದಾರೆ ಎಂದು ಕಾಂಗ್ರೆಸ್ ಕಿಡಿಕಾರಿದರೆ, ಬೋರ್‌ವೆಲ್ ಕೊರೆಸಲು ಮುಂದಾಗಿದ್ದೆವು. ಆದರೆ, ಕಾಂಗ್ರೆಸ್‌ನವರು ನಮ್ಮ ಪ್ಲಾನ್ ಹೈಜಾಕ್ ಮಾಡಿ ಬೋರ್‌ವೆಲ್ ಕೊರೆಸಿದ್ದಾರೆ ಎಂದು ಆರೋಪ ಪ್ರತ್ಯಾರೋಪದಲ್ಲಿ ತೊಡಗಿದ್ದಾರೆ.

ಬೋರ್‌ವೆಲ್ ಯಾರಾದರೂ ಕೊರೆಸಲಿ, ಜನರಿಗೆ ಉಪಯೋಗವಾಗುತ್ತದೆ. ಇಷ್ಟು ದಿನ ಕುಡಿಯುವ ನೀರಿಗಾಗಿ ಹೋರಾಡುತ್ತಿದ್ದೆವು. ಇದೀಗ ಚುನಾವಣೆ ಸಮಯದಲ್ಲಿ ನಾ ಮುಂದು ತಾ ಮುಂದು ಎಂದು ಬೋರ್‌ವೆಲ್ ಕೊರೆಸಲು ಮುಂದಾಗಿದ್ದಾರೆ. ನಾಚಿಕೆಯಾಗಬೇಕು ಇವರಿಗೆ. ಇಷ್ಟು ದಿನ ಇಲ್ಲದವರು ಈಗ ಗ್ರಾಮಗಳ ಕಡೆ ಮುಖ ಮಾಡುತ್ತಿದ್ದಾರೆ ಎಂದು ಆಣೆದೊಡ್ಡಿ ಗ್ರಾಮಸ್ಥರು ಆಕ್ರೋಶ ಹೊರಹಾಕಿದ್ದಾರೆ.

ಜಿಲ್ಲಾದ್ಯಂತ ನೀರಿನ ರಾಜಕೀಯ ರಂಗೇರುತ್ತಿದೆ. ಕಾಂಗ್ರೆಸ್ ಸಂಭಾವ್ಯ ಅಭ್ಯರ್ಥಿ ಇಕ್ಬಾಲ್ ಹುಸೇನ್ ಟ್ಯಾಂಕರ್ ಮೂಲಕ ನೀರು ಸರಬರಾಜು ಮಾಡುವ ಜತೆಗೆ, ನೀರಿಲ್ಲದ ಪ್ರದೇಶಗಳಲ್ಲಿ ಬೋರ್‌ವೆಲ್ ಕೊರೆಸಲು ಮುಂದಾಗಿದ್ದಾರೆ. ಈ ಹಿಂದೆ ಚನ್ನಪಟ್ಟಣದಲ್ಲಿ ಸಿ.ಪಿ. ಯೋಗೇಶ್ವರ್ ಅವರು ಕೆರೆಗಳನ್ನು ತುಂಬಿಸುವ ಮೂಲಕ ಆಧುನಿಕ ಭಗೀರಥ ಎಂದು ಹೆಸರು ಪಡೆದಿದ್ದರು. ಇದೀಗ ರಾಮನಗರ ವಿಧಾನಸಭಾ ಕ್ಷೇತ್ರದಲ್ಲೂ ಈ ರೀತಿಯ ಪ್ರಯತ್ನಗಳು ನಡೆಯುತ್ತಿದ್ದು, ಗಂಗಾ ಮಾತೆ ಯಾರಿಗೆ ಗೆಲುವು ತಂದು ಕೊಡಲಿದ್ದಾಳೆ ಕಾದು ನೋಡಬೇಕಿದೆ.