ಪ್ಲಾಸ್ಟಿಕ್​ ಅಲ್ಲ ಸಾರವರ್ಧಿತ ಅಕ್ಕಿ ಆಹಾರ ಇಲಾಖೆ ಸ್ಪಷ್ಟನೆ

ರಾಮನಗರ

ಪಡಿತರ ಚೀಟಿದಾರರ ಪೌಷ್ಟಿಕಾಂಶ ಮತ್ತು ಹಿತದೃಷ್ಟಿಯಿಂದ ನ್ಯಾಯಬೆಲೆ ಅಂಗಡಿಗಳಲ್ಲಿ ಸಾರವರ್ಧಿತ ಅಕ್ಕಿ ವಿತರಣೆಗೊಳ್ಳುತ್ತಿದೆ, ಇದರ ಬಗ್ಗೆ ಯಾರೂ ಆತಂಕಗೊಳ್ಳುವ ಅಗತ್ಯ ಇಲ್ಲ ಎಂದು ಆಹಾರ, ನಾಗರಿಕ ಸರಬರಾಜು ಮತ್ತು ಗ್ರಾಹಕ ವ್ಯವಹಾರಗಳ ಇಲಾಖೆ ಉಪ ನಿರ್ದೇಶಕರು ಸ್ಪಷ್ಟನೆ ನೀಡಿದ್ದಾರೆ.

ಪ್ರತಿ ಕ್ವಿಂಟಾಲ್​ಗೆ 1 ಕೆ.ಜಿ. ಸಾರವರ್ಧಿತ ಅಕ್ಕಿಯನ್ನು ಮಿಶ್ರಣ ಮಾಡಲಾಗುತ್ತಿದ್ದು, ಇದು ವ್ಯಕ್ತಿಯ ಆರೋಗ್ಯಕ್ಕೆ ಅಗತ್ಯವಾದ ಜೀವಸತ್ವಗಳು, ಸೂಕ್ಷ್ಮ ಪೋಷಕಾಂಶಗಳಾದ ಕಬ್ಬಿಣಾಂಶ, ಫೋಲಿಕ್​ ಆಮ್ಲ, ಮತ್ತು ವಿಟಮಿನ್​ ಬಿ 12 ಹೊಂದಿರುತ್ತದೆ. ಇದು ಸಾರ್ವಜನಿಕ ವಲಯದಲ್ಲಿ ಪ್ಲಾಸ್ಟಿಕ್​ ಅಕ್ಕಿ ಎಂಬ ರೀತಿ ಬಿಂಬಿಸುತ್ತಿರುವುದು ತಪ್ಪು ಮಾಹಿತಿಯಾಗಿದೆ. ಸಾರ್ವಜನಿಕರು ಇಂತಹ ತಪ್ಪು ಮಾಹಿತಿಗಳಿಗೆ ಕಿವಿಗೊಡಬಾರದು ಎಂದು ಮನವಿ ಮಾಡಿದ್ದಾರೆ.

ಸಾರವರ್ಧಿತ ಅಕ್ಕಿಯು ಅಕ್ಕಿ ಗಿರಣಿಗಳಲ್ಲಿ ಗಿರಣಿಯಾಗುವ ಸಂದರ್ಭದಲ್ಲಿ ವಿಶೇಷವಾಗಿ ಅಳವಡಿಕೆಯಾಗುವ ಕರ್ನಲ್​ಗಳ ಮುಖಾಂತರ ಸಂಸ್ಕರಣೆಯಾಗಿದ್ದು, ಭತ್ತವು ಕರ್ನಲ್​ಗಳ ಮೂಲಕ ಉತಷ್ಟವಾಗಿ ಗಿರಣಿಯಾದ ಕಾರಣದಿಂದ ಕಾಳುಗಳು ಸ್ವಲ್ಪ ಸಂಸ್ಕರಣಗೊಂಡಿರುತ್ತವೆಯೇ ವಿನಃ ಯಾವುದೇ ರೀತಿ ಕಲಬೆರಕೆ ಅಥವಾ ಪ್ಲಾಸ್ಟಿಕ್​ ಅಲ್ಲ ಎಂಬುದನ್ನು ಸ್ಪಷ್ಟವಾಗಿ ತಿಳಿಸಲಾಗಿದೆ.

ಈ ಸಾರವರ್ಧಿತ ಅಕ್ಕಿ ಬಳಕೆಯಿಂದ ವ್ಯಕ್ತಿಯ ಆರೋಗ್ಯವನ್ನು ಉತ್ತಮಗೊಳಿಸುತ್ತದೆ ಮತ್ತು ರಕ್ತಹಿನತೆ, ಅಪೌಷ್ಟಿಕತೆ ಹೋಗಲಾಡಿಸುತ್ತದೆ. ಇದನ್ನು ಪ್ರಯೋಗಾಲಯದಲ್ಲಿ ಪರೀೆಗೊಳಪಡಿಸಲಾಗಿದ್ದು, ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರದಿಂದ ಬಳಕೆಗೆ ಯೋಗ್ಯವಾದ ಪೌಷ್ಟಿಕಾಂಶಭರಿತ ಅಕ್ಕಿ ಎಂದು ಪ್ರಮಾಣೀಕರಿಸಲಾಗಿರುತ್ತದೆ. ಆದ್ದರಿಂದ ಸರ್ಕಾರವು ಪಡಿತರ ಚೀಟಿದಾರರಿಗೆ ಬಿಡುಗಡೆ ಮಾಡಿರುವ ಸಾರವರ್ಧಿತ ಅಕ್ಕಿಯನ್ನು ನಿರ್ಭಯವಾಗಿ ಬಳಸಬಹುದಾಗಿದೆ ಎಂದು ತಿಳಿಸಿದ್ದಾರೆ.