ಬೆಂಗಳೂರು: ಉತ್ತರ ಕರ್ನಾಟಕ ಭಾಗದ ಕೆಲ ಜಿಲ್ಲೆಗಳಲ್ಲಿ ಮಳೆ ಮುಂದುವರಿದಿದ್ದು, ನೂರಾರು ಮನೆಗಳು ಜಾಲಾವೃತವಾಗಿವೆ. ಸಾವಿರಾರು ಎಕರೆಯಲ್ಲಿ ಬೆಳೆದುನಿಂತಿದ್ದ ಫಸಲು ಹಾನಿಯಾಗಿದ್ದು, ರೈತರಿಗೆ ಅಘಾತ ತಂದಿದೆ. ಗದಗ ಜಿಲ್ಲೆ ನರಗುಂದ ತಾಲೂಕಿನಲ್ಲಿ ಬುಧವಾರ ತಡರಾತ್ರಿ ಸುರಿದ ಧಾರಾಕಾರ ಮಳೆಯಿಂದ ಕೆಲವು ಗ್ರಾಮಗಳಲ್ಲಿ ನೂರಾರು ಮನೆಗಳು ಜಲಾವೃತವಾಗಿವೆ. ಬೂದಿಹಾಳ ನವಗ್ರಾಮದ 174 ಮನೆಗಳು, ವಾಸನ ಗ್ರಾಮದ ತಗಡಿನ 42 ತಾತ್ಕಾಲಿಕ ಶೆಡ್ಗಳು, ಕೊಣ್ಣೂರಿನ ಉಪ ಪೊಲೀಸ್ ಠಾಣೆ, ಗ್ರಾಪಂ ಕಾರ್ಯಾಲಯ, ಪಶು ಆಸ್ಪತ್ರೆಗೆ ಅಪಾರ ಪ್ರಮಾಣದ ನೀರು ನುಗ್ಗಿದೆ. ಕೊಣ್ಣೂರಲ್ಲಿ 1 ಮನೆ ಸಂಪೂರ್ಣ, ವಾಸನದಲ್ಲಿ 2 ಮನೆಗಳು, ಬೆಳ್ಳೇರಿಯಲ್ಲಿ ಮೂರು ಮನೆಗಳು ಭಾಗಶಃ ಕುಸಿದು ಬಿದ್ದಿವೆ. ಬಾಗಲಕೋಟೆ ಜಿಲ್ಲೆಯ ವಿವಿಧೆಡೆ ಮಳೆ -ಇಳಕಲ್ ಭಾಗದಲ್ಲಿ ಜನಜೀವನ ಅಸ್ತವ್ಯಸ್ತ. ಒಂದು ಮನೆ ಕುಸಿತ. ಬೆಳೆಗಳು ಸಂಪೂರ್ಣ ಜಲಾವೃತವಾಗಿವೆ.
