ಉತ್ತಮ ಆಡಳಿತ, ಅಭಿವೃದ್ಧಿ, ಭ್ರಷ್ಟಾಚಾರರಹಿತ ಕೆಲಸಕಾರ್ಯಗಳು, ಆಯಾ ರಂಗದ ಬೆಳವಣಿಗೆ ಇದೆಲ್ಲ ಸಾಕಾರಗೊಳ್ಳಬೇಕಾದರೆ ರಾಜಕೀಯ ಕ್ಷೇತ್ರ ಪರಿಣಾಮಕಾರಿಯಾಗಿ ಕೆಲಸ ಮಾಡಬೇಕು. ಹೊಸ ಬದಲಾವಣೆಗಳಿಗಾಗಿ, ಸುಧಾರಣೆಗಳಿಗಾಗಿ ಯುವಕರು ರಾಜಕೀಯಕ್ಕೆ ಬರಬೇಕು ಎಂಬ ಆಶಯವೂ ಆಗಾಗ ದೊಡ್ಡದನಿಯಲ್ಲಿ ಕೇಳಿಬರುತ್ತದೆ. ಇದಕ್ಕೆ ಪೂರಕವಾಗಿ ಯುವವರ್ಗವೂ ರಾಜಕೀಯ ಕ್ಷೇತ್ರ ಪ್ರವೇಶಿಸಿ, ಕೆಲಸ ಮಾಡುವ ತುಡಿತ ಹೊಂದಿದೆ. ಆದರೆ, ರಾಜಕೀಯ ರಂಗದ ಸ್ಥಿತಿ ಏನಾಗಿದೆ, ನಾವು ಆರಿಸಿ ಕಳಿಸುವ ಜನಪ್ರತಿನಿಧಿಗಳ ಹಿನ್ನೆಲೆ ಏನು ಎಂಬುದನ್ನು ಅವಲೋಕಿಸಿದರೆ ನಿಜಕ್ಕೂ ಗಾಬರಿಯಾಗುತ್ತದೆ. ಎಲ್ಲ ರಾಜಕೀಯ ಪಕ್ಷಗಳು ಸ್ಪರ್ಧೆಗೆ ಬಿದ್ದವರಂತೆ ಕಳಂಕಿತರಿಗೇ ಟಿಕೆಟ್ ನೀಡುತ್ತಿದ್ದು, ಈ ಪ್ರವೃತ್ತಿ ನಿಜಕ್ಕೂ ಅಪಾಯಕಾರಿ ಬೆಳವಣಿಗೆ.
