ಅತಿಯಾದ ವೇಗ, ತಪು್ಪ ದಿಕ್ಕಿನಲ್ಲಿ ಚಲನೆ ಸೇರಿದಂತೆ ಸಂಚಾರ ನಿಯಮಗಳ ಉಲ್ಲಂಘನೆಯಿಂದ ವರ್ಷದಿಂದ ವರ್ಷಕ್ಕೆ ರಸ್ತೆ ಅಪಘಾತಗಳ ಸಂಖ್ಯೆ ಮತ್ತು ಪ್ರಾಣಹಾನಿಯ ಪ್ರಮಾಣ ಹೆಚ್ಚುತ್ತಲೇ ಸಾಗಿದೆ. ಈ ನಡುವೆ, ಪೊಲೀಸರ ಆಶ್ವಾಸನೆ ಹೊರತಾಗಿಯೂ ರಾಜಧಾನಿ ಬೆಂಗಳೂರು ಸೇರಿ ಹಲವು ನಗರಗಳಲ್ಲಿ ವ್ಹೀಲಿಂಗ್ ಹಾವಳಿ ನಿಲ್ಲುತ್ತಿಲ್ಲ. ಮೊದಲು ಬೆಂಗಳೂರಿನಲ್ಲಿ ಹೆಚ್ಚಿನ ಪ್ರಮಾಣದಲ್ಲಿದ್ದ ಈ ಹಾವಳಿ ಈಗ ಹುಬ್ಬಳ್ಳಿ-ಧಾರವಾಡ, ದಾವಣಗೆರೆ, ತುಮಕೂರು, ರಾಮನಗರ ಸೇರಿದಂತೆ ಹಲವು ಜಿಲ್ಲೆಗಳಿಗೆ ವ್ಯಾಪಿಸಿಕೊಂಡಿದೆ. ಇದರಿಂದ ಬೈಕ್ ಸವಾರರು ತಮ್ಮ ಪ್ರಾಣವನ್ನು ಅಪಾಯಕ್ಕೆ ಒಡ್ಡುವುದಷ್ಟೇ ಅಲ್ಲ, ಇತರರ ಪ್ರಾಣಕ್ಕೂ ಸಂಚಕಾರ ತರುತ್ತಿದ್ದಾರೆ. ರಸ್ತೆ ಸವಾರರಿಗಂತೂ ಈ ಸಮಸ್ಯೆ ದೊಡ್ಡ ಕಿರಿಕಿರಿಯಾಗಿ ಪರಿಣಮಿಸಿದೆ. ವ್ಹೀಲಿಂಗ್ ಪುಂಡರು ಹಾಡುಹಗಲಲ್ಲೇ ಸಂಚಾರ ಪೊಲೀಸರ, ಕಾನೂನಿನ ಭಯವಿಲ್ಲದೆ ನಡುರಸ್ತೆಯಲ್ಲಿ ಅಪಾಯಕಾರಿ ಕಸರತ್ತು ಮಾಡುತ್ತ ಹೋಗುವ ಪ್ರಕರಣಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ನಿತ್ಯವೂ ನೋಡುವಂತಾಗಿದೆ. ಇದು ಅಶಿಸ್ತು ಮಾತ್ರವಲ್ಲ ಗಂಭೀರ ಅಪರಾಧವು ಹೌದು. ಅಪ್ರಾಪ್ತ ವಯಸ್ಸಿಗರು ಮತ್ತು 18ರಿಂದ 25 ವರ್ಷದೊಳಗಿನ ಯುವಕರು ಇಂಥ ಪ್ರಕರಣಗಳಲ್ಲಿ ಹೆಚ್ಚಾಗಿ ಭಾಗಿಯಾಗಿದ್ದಾರೆ. ಹದಿಹರೆಯದ ವಯಸ್ಸಿನ ತರುಣರ ಕೆಲ ಘಟನೆಗಳಲ್ಲಿ ಪಾಲಕರ ವಿರುದ್ಧ ಪ್ರಕರಣ ದಾಖಲು ಮಾಡಿದ್ದರೂ, ಜನರು ಕೂಡ ಎಚ್ಚೆತ್ತುಕೊಂಡಿಲ್ಲ.
