ಗರ್ಭಿಣಿ ಹಸುವಿನ ಬಾಯಿಯನ್ನು ಛಿದ್ರಗೊಳಿಸಿದ ಸ್ಫೋಟಕ; ಆಹಾರ ತಿನ್ನಲಾಗದೆ ಒದ್ದಾಟ

ಶಿಮ್ಲಾ: ಮೊನ್ನೆಮೊನ್ನೆ ತಾನೆ ಗರ್ಭಿಣಿ ಆನೆಯೊಂದು ಸ್ಫೋಟಕ ತುಂಬಿದ ಪೈನಾಪಲ್​ ತಿಂದು, ಬಾಯಿಯೆಲ್ಲ ಗಾಯಗೊಂಡು, ಆಹಾರ, ನೀರು ಸೇವಿಸಲಾಗದೆ ಸಣಕಲಾಗಿ ಮೃತಪಟ್ಟಿತ್ತು.

ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಬಂಧಿತನಾದ ಆರೋಪಿಯೋರ್ವ, ಆನೆ ತಿಂದಿದ್ದು ಅನಾನಸ್​ ಹಣ್ಣನ್ನಲ್ಲ, ಸ್ಫೋಟಕವಿದ್ದ ತೆಂಗಿನಕಾಯಿಯನ್ನು ಎಂದು ಹೇಳಿಕೆಯನ್ನೂ ನೀಡಿದ್ದಾನೆ. ಈ ಘಟನೆಗೆ ರಾಷ್ಟ್ರಾದ್ಯಂತ ವಿಪರೀತ ಖಂಡನೆ ವ್ಯಕ್ತವಾಗಿದೆ. ಇನ್ನೂ ಆ ಬಗ್ಗೆ ಚರ್ಚೆಯಾಗುತ್ತಿರುವ ಬೆನ್ನಲ್ಲೇ ಅಂಥದ್ದೇ ಇನ್ನೊಂದು ಕ್ರೂರ ಘಟನೆ ಬಗ್ಗೆ ವರದಿಯಾಗಿದೆ. ಇದನ್ನೂ ಓದಿ: ಗರ್ಭಿಣಿ ಆನೆ ಕೊಂದ ಪ್ರಕರಣದಲ್ಲಿ ಮೂವರ ಬಂಧನ: ಮರಣೋತ್ತರ ವರದಿಯಲ್ಲಿ ನೋವಿನ ಸಂಗತಿ

ಹಿಮಾಚಲಪ್ರದೇಶದ ಬಿಲಾಸ್​ಪುರ ಜಿಲ್ಲೆಯ ಜಾಂಡುಟಾ ಎಂಬ ಪ್ರದೇಶದಲ್ಲಿ ಗರ್ಭಿಣಿ ಹಸುವಿನ ಬಾಯಲ್ಲಿ ಸ್ಫೋಟಕ ಸ್ಫೋಟಿಸಿದೆ. ಗದ್ದೆಯಲ್ಲಿ ಅದು ಓಡಾಡುತ್ತ, ಮೇವು ತಿನ್ನುತ್ತಿತ್ತು. ಆಗ ತಿಂದ ಒಂದು ವಸ್ತುವೊಂದು ಅದರ ಬಾಯಲ್ಲಿ ಬ್ಲಾಸ್ಟ್​ ಆಗಿದೆ ಎಂದು ವರದಿಯಾಗಿದೆ.

ಆ ಗರ್ಭಿಣಿ ಹಸುವಿನ ಬಾಯಿ ರಕ್ತಸಿಕ್ತವಾಗಿದ್ದು, ಅದೇ ಸ್ಥಿತಿಯಲ್ಲಿ ಅದು ಒದ್ದಾಡುತ್ತಿರುವ ಫೋಟೋಗಳು, ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟೆ ವೈರಲ್​ ಆಗಿದೆ.

10 ದಿನಗಳ ಹಿಂದೆಯೇ ಘಟನೆ ನಡೆದಿದೆ ಎನ್ನಲಾಗಿದೆ. ಹಸುವಿನ ದವಡೆ, ಬಾಯಿಯೆಲ್ಲ ಗಾಯಗೊಂಡಿದ್ದರಿಂದ ಅದೂ ಕೂಡ ಕೆಲವು ದಿನಗಳಿಂದ ಆಹಾರ ಸೇವನೆ ಮಾಡುತ್ತಿಲ್ಲ. ನೋವಿನಿಂದ ಒದ್ದಾಡುತ್ತಿದೆ ಎಂದು ಅದರ ಮಾಲೀಕ ಗುರುಡಿಯಲ್ ಸಿಂಗ್ ಹೇಳಿದ್ದಾರೆ. ಇದನ್ನೂ ಓದಿ: ಗರ್ಭಿಣಿ ಆನೆಗೆ ಸ್ಫೋಟಕ ತುಂಬಿದ ಪೈನಾಪಲ್​​ ತಿನ್ನಲು ಕೊಟ್ಟ ಜನರು; ದಾರುಣವಾಗಿ ಮೃತಪಟ್ಟ ಮುಗ್ಧ ಪ್ರಾಣಿ

ಬೇಕಂತಲೇ ಹಸುವಿನ ಬಾಯಲ್ಲಿ ಸ್ಫೋಟಕವನ್ನು ಸ್ಫೋಟಿಸಲಾಗಿದೆ. ದುಷ್ಕರ್ಮಿಗಳನ್ನು ಪತ್ತೆ ಹಚ್ಚಿ ಕಠಿಣ ಕ್ರಮ ಕೈಗೊಳ್ಳಬೇಕು. ನನಗೆ ನನ್ನ ನೆರಮನೆಯವರ ಮೇಲೆಯೇ ಅನುಮಾನ ಇದೆ. ಈ ಘಟನೆ ನಡೆದ ಮೇಲೆ ಆತ ಎಲ್ಲಿಯೂ ಕಾಣಿಸುತ್ತಿಲ್ಲ ಎಂದು ಗರುಡಿಯಲ್​ ಸಿಂಗ್ ಅವರು ಸ್ಥಳೀಯ ಆಡಳಿತವನ್ನು ಒತ್ತಾಯಿಸಿದ್ದಾರೆ.

https://www.vijayavani.net/after-1st-arrest-official-says-elephant-ate-coconut-stuffed-with-crackers/