ಹಬ್ಬ ಹರಿದಿನ, ಗಣ್ಯ ವ್ಯಕ್ತಿಗಳ ಆಗಮನ, ಸಭೆ-ಸಮಾರಂಭ, ಚುನಾವಣೆ, ಪ್ರತಿಭಟನೆ, ಮೆರವಣಿಗೆ, ಬೆಂಗಳೂರು ಬಂದ್, ಕರ್ನಾಟಕ ಬಂದ್ ಹೀಗೆ ಪ್ರತಿನಿತ್ಯ ಒಂದಿಲ್ಲೊಂದು ಬಂದೋಬಸ್ತ್ಗೆ ಪೊಲೀಸರನ್ನು ನಿಯೋಜಿಸಲಾಗುತ್ತದೆ. ಬಂದೋಬಸ್ತ್ಗೆ ಬರುವ ಪೊಲೀಸ್ ಅಧಿಕಾರಿ ಮತ್ತು ಸಿಬ್ಬಂದಿಯ ಊಟಕ್ಕಾಗಿ ಸರ್ಕಾರ ತಲಾ 200 ರೂ. ನಿಗದಿಪಡಿಸಿದೆ. ವಿಶೇಷ ಬಂದೋಬಸ್ತ್ನಲ್ಲಿ 500 ರಿಂದ 1,000 ಪೊಲೀಸರು ಭಾಗವಹಿಸುತ್ತಾರೆ. ತಲಾ 200 ರೂ.ನಂತೆ ಲೆಕ್ಕ ಹಾಕಿದರೆ 1 ರಿಂದ 2 ಲಕ್ಷ ರೂ. ಪಡೆದುಕೊಳ್ಳಲಾಗುತ್ತದೆ. ಆದರೆ, ತಲಾ ಸಿಬ್ಬಂದಿಗೆ ಕೇವಲ 40 ರಿಂದ 60 ರೂ. ಖರ್ಚು ಮಾಡಿ ಉಳಿದ ಹಣವನ್ನು ಕಬಳಿಸಲಾಗುತ್ತಿದೆ ಎಂದು ಖುದ್ದು ಪೊಲೀಸರೇ ಮಾಹಿತಿ ನೀಡುತ್ತಾರೆ. ಬಹುತೇಕ ಸಂದರ್ಭದಲ್ಲಿ ತಳ್ಳು ಗಾಡಿ ಅಥವಾ ಸಣ್ಣಪುಟ್ಟ ಹೋಟೆಲ್ಗಳಿಂದ ಬೆಳಗ್ಗೆ 30 ರೂ.ನ ಚೌಚೌ ಬಾತ್ ಹಾಗೂ ಮಧ್ಯಾಹ್ನಕ್ಕೆ 30 ರೂ.ನ ಪಲಾವ್ ಪೊಟ್ಟಣ ತಂದು ಕೊಡಲಾಗುತ್ತದೆ. ಒಬ್ಬ ಸಿಬ್ಬಂದಿಗೆ 60 ರೂ. ಖರ್ಚು ಮಾಡಿ ಉಳಿದ 140 ರೂ. ಆಯಾ ಘಟಕದ ಕ್ಲರಿಕಲ್ ಸಿಬ್ಬಂದಿ ಜೇಬಿಗಿಳಿಸುತ್ತಾರೆ. ಮತ್ತೆ ಕೆಲ ಸಂದರ್ಭದಲ್ಲಿ ಪೊಲೀಸರಿಗೆ ತಿಂಡಿ-ಊಟ ಕೊಡುವುದೇ ಇಲ್ಲ. ಆದಾಗ್ಯೂ ಬಂದೋಬಸ್ತ್ಗೆ ಬಂದಿರುವ ಅಧಿಕಾರಿಗಳು ಮತ್ತು ಸಿಬ್ಬಂದಿಯ ಹಾಜರಾತಿಯನ್ನು ಪರಿಗಣಿಸಿ, ತಲಾ 200 ರೂ.ನಂತೆ ಆಹಾರ ಪೂರೈಸಿದವನ ಹೆಸರಲ್ಲಿ ಬಿಲ್ ಸೃಷ್ಟಿಸಿ ಆಹಾರ ಭತ್ಯೆ ಮಂಜೂರು ಮಾಡಿಸಿಕೊಂಡು ವಂಚಿಸಲಾಗುತ್ತಿದೆ. ಈ ಬಗ್ಗೆ ತನಿಖೆಯಾಗಬೇಕು ಎಂದು ಒತ್ತಾಯಿಸಿದ್ದಾರೆ.
