ಒಂದೇ ದಿನ ನಾಲ್ಕು ಲೋಕಸಭೆ ಚುನಾವಣಾ ರ್ಯಾಲಿಗಳಲ್ಲಿ ಭಾಗವಹಿಸಿದ ಮೋದಿ, ಅಬ್ಬರ, ವಿನಮ್ರ, ವಿಶ್ವಾಸ ತುಂಬುವ ಮಾತುಗಳ ಮೂಲಕ ಲಕ್ಷಾಂತರ ಜನರ ಮನಸೆಳೆದು ಮತಶಿಕಾರಿಗೆ ಇಳಿದದ್ದು ವಿಶೇಷವಾಗಿತ್ತು. ಗಂಡುಮೆಟ್ಟಿನ ನೆಲವೆನಿಸಿದ ಕರ್ನಾಟಕದ ಉತ್ತರ ಪ್ರಾಂತದ ಬೆಳಗಾವಿ, ಶಿರಸಿ, ದಾವಣಗೆರೆ ಮತ್ತು ಹೊಸಪೇಟೆಯಲ್ಲಿ ‘ವಿಕಸಿತ ಭಾರತಕ್ಕಾಗಿ ವಿಜಯಸಂಕಲ್ಪ’ ಸಮಾವೇಶದಲ್ಲಿ ಕಾಂಗ್ರೆಸ್ ವಿರುದ್ಧ ವಾಕ್ ಪ್ರಹಾರ ನಡೆಸಿದರು. ಅಭಿವೃದ್ಧಿ, ಹಿಂದುತ್ವ ಹಾಗೂ ಓಲೈಕೆ ರಾಜಕಾರಣದ ಅಸ್ತ್ರ ಪ್ರಯೋಗಿಸಿ ತರಾಟೆಗೆ ತೆಗೆದುಕೊಂಡರು. ಕಾಂಗ್ರೆಸ್ ಒಳಗೊಂಡ ಇಂಡಿ ಒಕ್ಕೂಟ ಅಧಿಕಾರಕ್ಕೆ ಬಂದರೆ ವರ್ಷಕ್ಕೊಬ್ಬರು ಪ್ರಧಾನಿಯಾಗುತ್ತಾರೆ. ಅಧಿಕಾರಕ್ಕಾಗಿ ಬಡಿದಾಡುಕೊಂಡು, ಸ್ಥಿರ ಆಡಳಿತ, ದೇಶದ ಸುರಕ್ಷತೆ, ಅಭಿವೃದ್ಧಿ ಕಡೆಗಣಿಸುತ್ತಾರೆ ಎಂದು ಜನರಿಗೆ ಎಚ್ಚರಿಸುವುದನ್ನೂ ಮೋದಿ ಮರೆಯಲಿಲ್ಲ.
