ಆ ದಿನ ಮುಂಜಾನೆ 2 ಗಂಟೆ ಸುಮಾರಿಗೆ ಅಗಾಧ ಪ್ರಮಾಣದ ನೀರಿನ ಹರಿವಿನ ಜತೆ ಧರೆ ಜರಿದು ನಿದ್ರಾದೇವಿಯ ಮಡಿಲಲ್ಲಿದ್ದ ಜನರು ಏನಾಯಿತೆಂದು ಚಿಂತಿಸುವ ಮೊದಲೇ ಅನಾಹುತ ಘಟಿಸಿತ್ತು. ಈ ಪ್ರಕೃತಿ ವಿಕೋಪಕ್ಕೆ 230ಕ್ಕೂ ಹೆಚ್ಚು ಜನರು ಬಲಿಯಾಗಿದ್ದು, ಮಾನವ ದೇಹದ ಸುಮಾರು 218 ನಾನಾ ಭಾಗಗಳು ಪತ್ತೆಯಾಗಿವೆ. ಆ ಪೈಕಿ 178 ಮಂದಿಯ ಗುರುತು ಪತ್ತೆ ಹಚ್ಚಲಾಗಿದೆ. 17 ಕುಟುಂಬಗಳಲ್ಲಿ ಒಬ್ಬರೂ ಬದುಕಿಲ್ಲ, ಅಂಥವರ ಸಂಖ್ಯೆ 58 ಎಂದು ಇತ್ತೀಚಿನ ಅಧಿಕೃತ ಅಂಕಿ-ಅಂಶ ಹೇಳಿದೆ. ರಾಜ್ಯ ರಾಜಧಾನಿ ತಿರುವನಂತಪುರಂನಿಂದ 470 ಕಿ.ಮೀ. ದೂರದಲ್ಲಿರುವ ಗುಡ್ಡಗಾಡು ಜಿಲ್ಲೆ ವಯನಾಡಿನ ನಯನ ಮನೋಹರವಾದ ಈ ಗ್ರಾಮಗಳು ಹ್ರದಯವಿದ್ರಾವಕ ದುರಂತಕ್ಕೆ ಒಳಗಾಗಿದ್ದವು. ಇನ್ನೂ ಮಳೆ ಆಗುತ್ತಿರುವುದರಿಂದ ಏನಾದರೂ ತುರ್ತು ಸಂದರ್ಭಕ್ಕೆ ಅಗತ್ಯವಾದೀತೆಂಬ ನಿರೀಕ್ಷೆಯಿಂದ ಅಲ್ಲಿ ಪೊಲೀಸ್ ವಾಹನಗಳು, ಮಣ್ಣೆತ್ತುವ ಬೃಹತ್ ಯಂತ್ರಗಳು, ಆಂಬುಲೆನ್ಸ್ಗಳು ಮತ್ತು ಪರಿಹಾರ ತಂಡಗಳ ವಾಹನಗಳು ಸಾಲುಗಟ್ಟಿ ನಿಂತಿರುವುದು ಅದಕ್ಕೆ ಸಾಕ್ಷಿಯಾಗಿ ನಿಂತಿವೆ.
