ಸತ್ತಂತೆ ನಟಿಸಿ ಚಳ್ಳೆಹಣ್ಣು ತಿನ್ನಿಸೋಕೆ ಪ್ರಯತ್ನಿಸಿಯೂ ಪೊಲೀಸರ ಬಲೆಗೆ ಬಿದ್ದ ಮೇಯರ್​!

ಲಿಮಾ: ದಕ್ಷಿಣ ಪೆರುವಿನ ಟಂಟರಾ ಎಂಬ ಪುಟ್ಟಣ ನಗರದ ಮೇಯರ್​ ಜೈಮ್​ ರೊಲಾಂಡೊ ಅರ್ಬಿನಾ ಟೊರ್ರೆಸ್​ (ನೀಲಿ ಬಣ್ಣದ ಶರ್ಟ್​ ಧರಿಸಿದ ವ್ಯಕ್ತಿ). ಸತ್ತಂತೆ ನಟಿಸಿ ಶವಪೆಟ್ಟಿಗೆಯಲ್ಲಿ ಮಲಗಿದ್ದ ಟೊರ್ರೆಸ್ ಅವರನ್ನು ಪೊಲೀಸರು ಬಂಧಿಸಿದ್ರು. ಹೀಗೆ ವಿಲಕ್ಷಣ ರೀತಿಯಲ್ಲಿ ಬಂಧನಕ್ಕೆ ಒಳಗಾದ ಮೇಯರ್ ಕಾರಣಕ್ಕೆ ಪೆರುವಿನ ಪುಟ್ಟ ಪಟ್ಟಣ ಟಂಟರಾ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಗಮನಸೆಳೆಯಿತು.

ಇದನ್ನೂ ಓದಿ: ಕ್ರೀಡೆಗೂ ಸಿಕ್ಕಿತು ಕೈಗಾರಿಕಾ ಸ್ಥಾನಮಾನ

ಮೇಯರ್​ ಟೊರ್ರೆಸ್ ಅವರನ್ನು ಪೊಲೀಸರು ಬಂಧಿಸಿದ್ದೇಕೆ? ಅವರು ಸತ್ತಂತೆ ಶವಪೆಟ್ಟಿಗೆಯಲ್ಲಿ ಮಲಗಿದ್ದೇಕೆ? ಎಂಬಿತ್ಯಾದಿ ಸಹಜ ಕುತೂಹಲದ ಪ್ರಶ್ನೆಗಳಿಗೆ ಇಲ್ಲಿದೆ ಉತ್ತರ. ಜಗತ್ತಿನಲ್ಲೆಡೆ ಇರುವಂತೆ ಈ ಪಟ್ಟಣದಲ್ಲೂ ಲಾಕ್​ಡೌನ್ ಚಾಲ್ತಿಯಲ್ಲಿದೆ. ಮದ್ಯ ಸೇವನೆ ಮಾಡದೇ ಇರಲು ಸಾಧ್ಯವಾಗದೇ ಲಾಕ್​ಡೌನ್​ನ ನಿಯಮಗಳನ್ನು ಗಾಳಿಗೆ ತೂರಿದ ಮೇಯರ್ ಮತ್ತು ಅವರ ಸಂಗಡಿಗರು ಸೋಮವಾರ ತಡರಾತ್ರಿ ಗುಟ್ಟಾಗಿ ಪಾರ್ಟಿ ಮಾಡಿದ್ದರು. ಕಂಠ ಮುಟ್ಟ ಕುಡಿದ ಕಾರಣ ಗದ್ದಲ ಉಂಟಾಗಿತ್ತು. ನೆರೆಹೊರೆಯವರು ಕೂಡಲೇ ಪೊಲೀಸರಿಗೆ ಫೋನ್ ಮಾಡಿದ್ದರು.

ಇದನ್ನೂ ಓದಿ: ಎಲ್​ಎಸಿಯಲ್ಲಿದ್ದಾರೆ ಚೀನಾದ 5,000 ಯೋಧರು..

ಸೈರನ್ ಮೊಳಗಿಸುತ್ತ ಪೊಲೀಸ್ ಕಾರುಗಳು ಬಂದು ನಿಂತ ಕೂಡಲೇ ಎಚ್ಚೆತ್ತುಕೊಂಡ ಮೇಯರ್ ಟೊರ್ರೆಸ್​ ಅಲ್ಲಿಂದ ಓಡಿ ಹೋಗಲು ಚಿಂತನೆ ನಡೆಸಿದ್ದರು. ಆದರೆ ಅಷ್ಟರಲ್ಲಾಗಲೇ ಪೊಲೀಸರು ಸಮೀಪಿಸಿಯಾಗಿತ್ತು. ಕೂಡಲೇ ಅಲ್ಲಿ ಕೋವಿಡ್ 19 ರೋಗಿಗಳ ಶವಗಳಿಗೋಸ್ಕರ ತಂದಿಟ್ಟಿದ್ದ ಶವಪೆಟ್ಟಿಗೆಯೊಳಗೆ ಸೇರುವ ಆಲೋಚನೆ ಟೊರ್ರೆಸ್ ಮನಸ್ಸಿಗೆ ಬಂತು. ಕೂಡಲೇ ಶವಪೆಟ್ಟಿಗೆಯೊಳಕ್ಕೆ ಸೇರಿಕೊಂಡರು ಕೂಡ.

ಇದನ್ನೂ ಓದಿ: ಎಸ್ಸೆಸ್ಸೆಲ್ಸಿ ಎಕ್ಸಾಂ ಕಸಿವಿಸಿ

ಶವಪೆಟ್ಟೆಗೆಯೊಳಗೆ ಸೇರಿದಾತ ಮೇಯರ್ ಎಂಬುದು ಬಹಿರಂಗವಾಗುತ್ತಲೇ ಮೊಬೈಲ್​ನಲ್ಲಿ ಚಿತ್ರೀಕರಣಗೊಂಡ ವಿಡಿಯೋ ಸಾಮಾಜಿಕ ತಾಣಗಳಲ್ಲಿ ವೈರಲ್ ಆಗಿಬಿಟ್ಟಿತು. ಸುದ್ದಿ ಜಗತ್ತಿನ ಗಮನಸೆಳೆಯಿತು. ಪೊಲೀಸರು ಇವರ ವಿರುದ್ಧ ಕೇಸ್ ದಾಖಲಿಸಿದ್ದಾರೋ ಇಲ್ಲವೋ ಎಂಬುದು ಸ್ಪಷ್ಟವಾಗಿಲ್ಲ. (ಏಜೆನ್ಸೀಸ್​)

https://www.vijayavani.net/warangal-well-murder-mystry-to-hide-one-murder-bihar-man-kills-entire-family-3-others/