ನರಗುಂದ: ಪ್ರಧಾನಿ ನರೇಂದ್ರ ಮೋದಿ ಜನಧನ ಖಾತೆ ಹೊಂದಿದವರಿಗೆ ಹಣ ಹಾಕಿದ ರೀತಿಯಲ್ಲೇ ಅಂಚೆ ಕಚೇರಿಯಲ್ಲಿ ಖಾತೆ ಇರುವವರಿಗೆ ಹಣ ಹಾಕುತ್ತಾರೆ ಎಂಬ ವದಂತಿ ನಂಬಿದ ಜನರು ಖಾತೆ ತೆರೆಯಲು ಅಂಚೆ ಕಚೇರಿಗೆ ಮುಗಿಬಿದ್ದಿದ್ದಾರೆ. ಅಂಚೆ ಕಚೇರಿಯಲ್ಲಿ ಖಾತೆ ಹೊಂದಿರುವವರಿಗೆ ಪ್ರಧಾನಿ ತಲಾ 5 ಸಾವಿರ ರೂ. ಹಾಕಲಿದ್ದಾರೆ ಎಂಬ ಗಾಳಿಸುದ್ದಿ ನಂಬಿದ ಮಹಿಳೆಯರು, ಮಕ್ಕಳು, ವಯೋವೃದ್ಧರು ಸೇರಿ ನೂರಾರು ಜನರು ಉಳಿತಾಯ ಖಾತೆ ತೆರೆಯಲು ಪಟ್ಟಣದ ಅಂಚೆ ಕಚೇರಿಗೆ ಕೆಲ ದಿನಗಳಿಂದ ಧಾವಿಸುತ್ತಿದ್ದಾರೆ. ಲಾಕ್ಡೌನ್ ಹಿನ್ನೆಲೆ ಪಿಂಚಣಿದಾರರಿಗೆ 3 ತಿಂಗಳ ಮುಂಗಡ ಪಿಂಚಣಿ ಈಗಾಗಲೆ ಕೇಂದ್ರ ಜಮೆ ಮಾಡಿದೆ. ಜನಧನ ಖಾತೆ ಇರುವ ಮಹಿಳೆಯರಿಗೆ ತಿಂಗಳಿಗೆ 500 ರೂ.ನಂತೆ 3 ತಿಂಗಳಿನ 1,500 ರೂ. ನೀಡಿದೆ. ಅದೇ ರೀತಿ ಅಂಚೆ ಇಲಾಖೆಯಲ್ಲಿ ಇಂಡಿಯನ್ ಪೋಸ್ಟ್ ಪೇಮೆಂಟ್ ಬ್ಯಾಂಕ್ ಖಾತೆ ತೆರೆದರೆ ತಲಾ 5 ಸಾವಿರ ರೂ. ಹಾಕುತ್ತಾರೆಂಬ ಸುಳ್ಳುಸುದ್ದಿ ನಂಬಿ ಖಾತೆ ತೆರೆಯಲು ಮುಂದಾಗಿದ್ದಾರೆ. ಇದನ್ನೂ ಓದಿ: ಕ್ವಾರಂಟೈನ್ ಕೇಂದ್ರದ ಸುತ್ತ ಹಾವುಗಳಿಗೆ ಲಕ್ಷ್ಮಣ ರೇಖೆ, ಮೂಢನಂಬಿಕೆ ವಿರೋಧಿಗಳ ಆಕ್ಷೇಪ
