ಕಾಯ್ದೆ ತಿದ್ದುಪಡಿಗೆ ಮುಂದಾದ ಪಾಕ್

ಇಸ್ಲಾಮಾಬಾದ್: ಕುಲಭೂಷಣ ಜಾಧವ್ ಪ್ರಕರಣದಲ್ಲಿ ಅಂತಾರಾಷ್ಟ್ರೀಯ ನ್ಯಾಯಾಲಯದ ಆದೇಶ ಪಾಲಿಸಲೇಬೇಕಾದ ಒತ್ತಡಕ್ಕೆ ಸಿಲುಕಿರುವ ಪಾಕಿಸ್ತಾನ ಈಗ ಕಾನೂನಿಗೆ ತಿದ್ದುಪಡಿ ತರಲು ಮುಂದಾಗಿದೆ. ಪ್ರತಿಪಕ್ಷಗಳ ವಿರೋಧ ನಡುವೆಯೇ ಈ ಕುರಿತ ಮಸೂದೆಯೊಂದನ್ನು ಸಂಸತ್​ನಲ್ಲಿ ಸೋಮವಾರ ಮಂಡಿಸಿದೆ. ಪಾಕಿಸ್ತಾನದ ಮಿಲಿಟರಿ ಕೋರ್ಟ್ ನೀಡಿದ (ಜಾಧವ್​ಗೆ ಮರಣದಂಡನೆ) ತೀರ್ಪನ್ನು ಇಸ್ಲಾಮಾಬಾದ್ ಹೈಕೋರ್ಟ್​ನಲ್ಲಿ ಪ್ರಶ್ನಿಸಲು ಇದರಲ್ಲಿ ಅವಕಾಶ ನೀಡಲಾಗಿದೆ. ಇದನ್ನೂ ಓದಿ: ಒಬ್ಬನೇ ವ್ಯಕ್ತಿಯಿಂದ, ಒಂದೇ ಸಮಯದಲ್ಲಿ ನಾವಿಬ್ಬರೂ ಗರ್ಭಿಣಿಯರಾಗಬೇಕು…: ಅವಳಿ ಸೋದರಿಯರ ಮಹದಾಸೆ

ಭಾರತೀಯ ನೌಕಾಪಡೆಯ ಮಾಜಿ ಅಧಿಕಾರಿ ಕುಲಭೂಷಣ ಜಾಧವರನ್ನು ಬೇಹುಗಾರಿಕೆ ಆರೋಪದ ಮೇಲೆ ಇರಾನ್ ಗಡಿಯಲ್ಲಿ ಪಾಕ್ ಬಂಧಿಸಿತ್ತು. ವಿಧ್ವಂಸಕ ಕೃತ್ಯ ಮತ್ತು ಬೇಹುಗಾರಿಕೆ ಆಪಾದನೆ ಮೇಲೆ ಮಿಲಿಟರಿ ನ್ಯಾಯಾಲಯ ಜಾಧವ್​ಗೆ ಗಲ್ಲು ಶಿಕ್ಷೆ ವಿಧಿಸಿತ್ತು. ಅಂತಾರಾಷ್ಟ್ರೀಯ ಕೋರ್ಟ್​ಗೆ ಮೊರೆ ಹೋಗಿದ್ದ ಭಾರತ ಇದಕ್ಕೆ ತಡೆ ತಂದಿತ್ತು. ಜಾಧವ್​ಗೆ ಮೇಲ್ಮನವಿ ಸಲ್ಲಿಸಲು ಅವಕಾಶ ನೀಡಬೇಕು ಹಾಗೂ ಅವರಿಗೆ ಅಗತ್ಯ ಕಾನೂನು ನೆರವನ್ನು ನೀಡಬೇಕು ಎಂದು ಅಂತಾರಾಷ್ಟ್ರೀಯ ಕೋರ್ಟ್ ಇತ್ತೀಚೆಗೆ ಹೇಳಿತ್ತು. ಈ ಆದೇಶ ಅಂತಿಮವಾಗಿದ್ದು, ಇದರ ವಿರುದ್ಧ ಮೇಲ್ಮನವಿ ಸಲ್ಲಿಕೆಗೆ ಅವಕಾಶ ಇಲ್ಲ ಎಂದು ಹೇಳಿತ್ತು.

ಈ ಮಧ್ಯೆ, ಪಾಕ್ ಎರಡು ಸಾರಿ ಜಾಧವ್​ಗೆ ಭಾರತದ ಕಾನ್ಸುಲರ್​ಗಳನ್ನು ಭೇಟಿ ಮಾಡಲು ಅವಕಾಶ ನೀಡಿದೆ. ಆದರೆ, ಈ ಭೇಟಿ ಪಾರದರ್ಶಕವಾಗಿ ಇರಲಿಲ್ಲ. ಜಾಧವ್​ಗೆ ಮುಕ್ತವಾಗಿ ಮಾತನಾಡುವ ಸನ್ನಿವೇಶ ಇರಲಿಲ್ಲ ಎಂದು ಭಾರತ ಟೀಕಿಸಿದೆ.

https://www.vijayavani.net/france-is-set-to-help-india-during-covid-19/