ಲಾಕ್​ಡೌನ್​ ಮುಗಿಯುತ್ತಲೇ ರೈಲ್ವೆ ಸಂಚಾರ ಮರುಆರಂಭವಿಲ್ಲ: ಭಾರತೀಯ ರೈಲ್ವೆ ಸ್ಪಷ್ಟನೆ

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಘೋಷಿಸಿರುವಂತೆ ಏಪ್ರಿಲ್​ 14ರಂದು ಲಾಕ್​ಡೌನ್​ ಅಂತ್ಯವಾಗುತ್ತಲೇ ಎಲ್ಲ ರೈಲು ಸೇವೆಗಳು ತಕ್ಷಣವೆ ಮರುಆರಂಭವಾಗುವುದಿಲ್ಲ ಎಂದು ಭಾರತೀಯ ರೈಲ್ವೆ ಸ್ಪಷ್ಟಪಡಿಸಿದೆ.

ಕೆಲವೊಂದು ಮಾಧ್ಯಮಗಳಲ್ಲಿ ಲಾಕ್​ಡೌನ್​ ಅಂತ್ಯವಾಗುತ್ತಲೇ ರೈಲ್ವೆ ಸೇವೆಗಳು ಮರುಆರಂಭಗೊಳ್ಳಲಿವೆ ಎಂಬರ್ಥದ ಸುದ್ದಿಗಳನ್ನು ಪ್ರಕಟಿಸಲಾಗುತ್ತಿದೆ. ಅಲ್ಲದೆ, ಸೇವೆಗಳ ಮರುಆರಂಭಕ್ಕೆ ರೈಲ್ವೆ ಇಲಾಖೆ ಹಲವು ರೀತಿಯ ಸಿದ್ಧತೆಗಳನ್ನು ಮಾಡಿಕೊಂಡಿರುವುದಾಗಿ ಹೇಳಲಾಗುತ್ತಿದೆ.

ಆದರೆ ಈ ಎಲ್ಲ ಸುದ್ದಿಗಳು ಸುಳ್ಳು. ಲಾಕ್​ಡೌನ್​ ಅಂತ್ಯವಾಗುತ್ತಲೇ ರೈಲ್ವೆ ಸೇವೆಗಳನ್ನು ಮರುಆರಂಭಿಸುವ ಬಗ್ಗೆ ಯಾವುದೇ ವೇಳಾಪಟ್ಟಿಯನ್ನು ಸಿದ್ಧಪಡಿಸಿಲ್ಲ, ಸಿದ್ಧತೆಗಳನ್ನೂ ಮಾಡಿಕೊಳ್ಳುತ್ತಿಲ್ಲ. ಇವೆಲ್ಲವೂ ಆಧಾರರಹಿತ ಸುದ್ದಿಗಳು. ಆದ್ದರಿಂದ, ಇವನ್ನು ನಂಬಬಾರದು ಎಂದು ರೈಲ್ವೆ ಸಚಿವಾಲಯ ಟ್ವೀಟ್​ ಮೂಲಕ ಸಾರ್ವಜನಿಕರಲ್ಲಿ ಮನವಿ ಮಾಡಿಕೊಂಡಿದೆ.

ಒಂದು ವೇಳೆ ಸೇವೆಗಳನ್ನು ಮರುಆರಂಭಿಸುವುದಾದರೆ, ಈ ಬಗ್ಗೆ ಸೂಕ್ತ ಮಾಹಿತಿಯನ್ನು ಸಾರ್ವಜನಿಕರಿಗೆ ಒದಗಿಸಲಾಗುವುದು ಎಂದು ಟ್ವೀಟ್​ನಲ್ಲಿ ಹೇಳಲಾಗಿದೆ.

https://www.vijayavani.net/lockdown-coronavirus-covid-19-railway-service-train-indian-railway/