ಈ ಮೊದಲು ಮಾದಕವಸ್ತು ಕಾಯ್ದೆಯಡಿ ಬಂಧಿತರಾದವರು ಕೆಲವೇ ದಿನಗಳಲ್ಲಿ ಜಾಮೀನು ಪಡೆದು ಜೈಲಿನಿಂದ ಹೊರಬಂದು ಹಳೇ ಚಾಳಿ ಶುರು ಮಾಡುತ್ತಿದ್ದರು. ಬೆಂಗಳೂರಿನ ಸಿಸಿಬಿ ಜಂಟಿ ಆಯುಕ್ತ ಸಂದೀಪ್ ಪಾಟೀಲ್ ರೌಡಿಗಳನ್ನು ಮಟ್ಟಹಾಕಲು ಗೂಂಡಾ ಕಾಯ್ದೆಯಡಿ ಎಫ್ಐಆರ್ ಮಾಡುತ್ತಿದ್ದಾರೆ. ಇದೇ ರೀತಿ, ವೃತ್ತಿಪರ ಡ್ರಗ್ಸ್ ಪೆಡ್ಲರ್ಗಳಿಗೆ ಕಡಿವಾಣ ಹಾಕಲು ಕಠಿಣ ಕ್ರಮದ ಬಗ್ಗೆ ಪರಿಶೀಲನೆ ನಡೆಸಿದಾಗ 1988ರಲ್ಲೇ ಕೇಂದ್ರ ಜಾರಿಗೊಳಿಸಿರುವ ಮಾದಕ ಮತ್ತು ಅಮಲು ಭರಿಸುವ ವಸ್ತುಗಳ ಮಾರಾಟ, ಸಾಗಣೆ ನಿರ್ಬಂಧ ಕಾಯ್ದೆ ಗಮನಕ್ಕೆ ಬಂದಿದೆ. ಆದರೆ, ಈ ಕಾಯ್ದೆ ಪ್ರಕಾರ ಆರೋಪಿ ಬಂಧನಕ್ಕೆ ಆದೇಶ ನೀಡುವ ಅಧಿಕಾರವನ್ನು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಹೊಂದಿದ್ದವು. ಸಂದೀಪ್ ಪಾಟೀಲ್ ಈ ಅಂಶವನ್ನು ಸರ್ಕಾರದ ಗಮನಕ್ಕೆ ತಂದು ಕಾಯ್ದೆಗೆ ಮರುರೂಪ ನೀಡಿದ್ದಾರೆ.
