ಬದುಕೋ ಚಾನ್ಸ್​ ಕೇವಲ 10 ರಷ್ಟು ಅಂದಿದ್ರು ವೈದ್ಯರು ಆದ್ರೆ ಇಂದು ಗೂಗಲ್ ಉದ್ಯೋಗಿ: ಈಕೆಯ ಕತೆ ಕೇಳಿದ್ರೆ ಮನಕಲಕುತ್ತೆ..! Survival Story

Survival Story : ಈ ಬದುಕಿನಲ್ಲಿ ಛಲ ಬಿಡದೆ ಹೋರಾಡಿದರೆ ಅಸಾಧ್ಯವಾದುದು ಯಾವುದು ಇಲ್ಲ ಎಂಬುದಕ್ಕೆ ಇಲ್ಲೊಬ್ಬ ಯುವತಿ ಜೀವಂತ ಉದಾಹರಣೆಯಾಗಿದ್ದಾರೆ. ಹದಿನಾರನೇ ವಯಸ್ಸಿನಲ್ಲಿ 4ನೇ ಮಹಡಿಯಿಂದ ಬಿದ್ದು ಬದುಕುವಾಸೆಯೇ ಕ್ಷೀಣಿಸಿದ್ದ ಪರಿಸ್ಥಿತಿಯಲ್ಲೂ, ಅಸಾಧಾರಣ ಸಂಕಲ್ಪ ಶಕ್ತಿಯಿಂದ ಅಡೆತಡೆಗಳನ್ನು ಮೆಟ್ಟಿ ನಿಂತು ಇಂದು ಗೂಗಲ್ ಸಂಸ್ಥೆಯಲ್ಲಿ ಉನ್ನತ ಹುದ್ದೆ ಅಲಂಕರಿಸಿರುವ ರೋಚಕ ಹಾಗೂ ಸ್ಪೂರ್ತಿದಾಯಕ ಕಥೆಯೊಂದು ಜಗತ್ತಿನಾದ್ಯಂತ ಎಲ್ಲರ ಹುಬ್ಬೇರಿಸಿದೆ.

ಸೆಪ್ಟೆಂಬರ್ 25 ರಂದು 'FeelGoodTale' ಎಕ್ಸ್ (X) ಖಾತೆಯಲ್ಲಿ ಹಂಚಿಕೊಳ್ಳಲಾದ ಪೋಸ್ಟ್ ಒಂದರಲ್ಲಿ, ಯುವತಿಯ ಮನಕಲಕುವ ಕತೆಯನ್ನು ಪರಿಚಯಿಸಲಾಗಿದೆ. ಹದಿನಾರನೇ ವಯಸ್ಸಿನಲ್ಲಿ ಆ ಯುವತಿಯ ಜೀವನವನ್ನೇ ಬದಲಾಯಿಸಿದ ಆಘಾತಕಾರಿ ಅಪಘಾತ ಸಂಭವಿಸಿತು. 4ನೇ ಮಹಡಿಯಿಂದ ಆಕಸ್ಮಿಕವಾಗಿ ಕಾಲು ಜಾರಿ ಬಿದ್ದಾಗ ಆಕೆ ನೇರವಾಗಿ ತನ್ನ ಕಾಲುಗಳ ಮೇಲೆಯೇ ಬಿದ್ದ ಪರಿಣಾಮ, ಬಲಗಾಲು ಹಾಗೂ ಪಾದಕ್ಕೆ ತೀವ್ರ ಗಾಯಗಳಾದವು ಮತ್ತು ಸೊಂಟದ ಮೂಳೆ ಹಲವು ತುಂಡುಗಳಾಗಿದ್ದವು. ಮುರಿದ ಮೂಳೆಯ ತುಂಡುಗಳು ರಕ್ತನಾಳಗಳನ್ನು ಕತ್ತರಿಸಬಹುದು ಎಂದು ವೈದ್ಯರು ಎಚ್ಚರಿಕೆ ನೀಡಿದ್ದರಿಂದ ಇಡೀ ಕುಟುಂಬವೇ ಆತಂಕದಲ್ಲಿ ಮುಳುಗಿಹೋಗಿತ್ತು. ಆಸ್ಪತ್ರೆಯಲ್ಲಿದ್ದ ರಕ್ತಸಿಕ್ತ ಬಟ್ಟೆಗಳು ಹಾಗೂ ಎಕ್ಸ್-ರೇ ಚಿತ್ರಗಳನ್ನು ಕಂಡು ಭಯಭೀತರಾದ ಆಕೆಯ ಕಿರಿಯ ಸಹೋದರನಿಗೆ ಇದು ಕೇವಲ ಅಪಘಾತವಾಗಿರದೆ, ಜೀವನಪರ್ಯಂತ ಕಾಡುವ ಮಾನಸಿಕ ಆಘಾತವಾಗಿ ಪರಿಣಮಿಸಿತ್ತು.

ತೀವ್ರ ನೋವು ಮತ್ತು ಚಿಕಿತ್ಸೆಗಳ ಕಾರಣದಿಂದ ಸುಮಾರು ಎರಡು ವರ್ಷಗಳನ್ನು ಆಸ್ಪತ್ರೆಯ ಹಾಸಿಗೆಯಲ್ಲೇ ಕಳೆದ ಆ ಯುವತಿ, ಆ ವರ್ಷ 12ನೇ ತರಗತಿಯ ಬೋರ್ಡ್ ಪರೀಕ್ಷೆಗಳನ್ನು ಬರೆಯಲು ಸಾಧ್ಯವಾಗಲಿಲ್ಲ. ಆದರೆ, ಗಾಯಗಳು ಸಂಪೂರ್ಣವಾಗಿ ವಾಸಿಯಾಗುವ ಮುನ್ನವೇ, ಮುಂದಿನ ವರ್ಷವೇ ಪರೀಕ್ಷೆ ಎದುರಿಸುವ ಧೈರ್ಯಶಾಲಿ ನಿರ್ಧಾರವನ್ನು ಆಕೆ ತೆಗೆದುಕೊಂಡಳು.

ಆಸ್ಪತ್ರೆಯಿಂದ ನೇರವಾಗಿ ಆಂಬುಲೆನ್ಸ್‌ನಲ್ಲಿ ಪರೀಕ್ಷಾ ಕೇಂದ್ರಕ್ಕೆ ಬಂದಿಳಿದ ಆಕೆ, ದೇಹವನ್ನು ಅಲುಗಾಡಿಸಲು ಕೂಡ ಕಷ್ಟಪಡುವ ಸ್ಥಿತಿಯಲ್ಲಿದ್ದರೂ ಸ್ಟ್ರೆಚರ್ ಮೇಲೆ ಮಲಗಿಕೊಂಡೇ ಪ್ರತಿ ಪ್ರಶ್ನೆಗೂ ಅತ್ಯಂತ ಧೈರ್ಯದಿಂದ ಉತ್ತರಿಸಿದಳು. ಫಲಿತಾಂಶ ಬಂದಾಗ ಎಲ್ಲರೂ ದಂಗಾಗಿಹೋಗುವಂತೆ ಆಕೆ ಶೇ. 92ರಷ್ಟು ಅಂಕಗಳೊಂದಿಗೆ ಭರ್ಜರಿ ತೇರ್ಗಡೆಯಾದಳು! ವಿಶೇಷವಾಗಿ ಭೌತಶಾಸ್ತ್ರ ಮತ್ತು ಗಣಿತದಲ್ಲಿ ತಲಾ 94 ಅಂಕಗಳನ್ನು ಗಳಿಸಿ ಎಲ್ಲರ ಮೆಚ್ಚುಗೆಗೆ ಪಾತ್ರಳಾದಳು. ಆಕೆಯ ಈ ಅದಮ್ಯ ಛಲ ಹಾಗೂ ಸಾಧನೆಯನ್ನು ಗುರುತಿಸಿದ ಶಾಲಾ ಆಡಳಿತ ಮಂಡಳಿಯು 'ಅಪರೂಪದ ವಿದ್ಯಾರ್ಥಿನಿ' (Exceptional Student) ಪ್ರಶಸ್ತಿ, ಪ್ರಮಾಣಪತ್ರ ಹಾಗೂ ಮೊಬೈಲ್ ನೀಡಿ ಗೌರವಿಸಿತು.

ಆಸ್ಪತ್ರೆ ಮತ್ತು ಚಿಕಿತ್ಸೆಯಿಂದಾಗಿ ಪೂರ್ಣ ಒಂದು ಶೈಕ್ಷಣಿಕ ವರ್ಷವನ್ನು ಕಳೆದುಕೊಂಡಿದ್ದರೂ, ಆಕೆ ಎಂದಿಗೂ ತನ್ನ ವಿದ್ಯಾಭ್ಯಾಸದಲ್ಲಿ ಹಿಂದುಳಿಯಲಿಲ್ಲ. ಶಾಲಾ ಶಿಕ್ಷಣದ ನಂತರ ಭೌತಶಾಸ್ತ್ರ ಹಾಗೂ ಹೋಟೆಲ್ ಮ್ಯಾನೇಜ್‌ಮೆಂಟ್‌ನಲ್ಲಿ ಎರಡು ಪದವಿಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದಳು. ಪ್ರಸ್ತುತ ಈ ಪ್ರತಿಭಾವಂತ ಯುವತಿಯು ಹೈದರಾಬಾದ್‌ನಲ್ಲಿರುವ ಗೂಗಲ್‌ನ ಅಂಗಸಂಸ್ಥೆಯೊಂದರಲ್ಲಿ ಉದ್ಯೋಗಿಯಾಗಿದ್ದು, ಇದರೊಂದಿಗೆ ತನ್ನ ಮೂರನೇ ಪದವಿಯಾದ ಎಂಬಿಎ (MBA) ತರಬೇತಿಯನ್ನು ಕೂಡ ಅತ್ಯಂತ ತೀವ್ರವಾಗಿ ಮುಂದುವರೆಸುತ್ತಿದ್ದಾಳೆ.

ಕುಟುಂಬದಿಂದ ದೂರವಾಗಿ ಹೈದರಾಬಾದ್ ಮಹಾನಗರದಲ್ಲಿ ಇಂದು ಸ್ವಾವಲಂಬನೆಯ ಬದುಕು ನಡೆಸುತ್ತಿರುವ ಆ ಯುವತಿ, ನಡೆಯುವಾಗ ಸ್ವಲ್ಪ ಮಟ್ಟಿಗೆ ಕುಂಟಿದರೂ ಆಕೆಯ ಆತ್ಮವಿಶ್ವಾಸದ ಹೆಜ್ಜೆಗಳ ಮುಂದೆ ಆ ನ್ಯೂನತೆಯೇ ಕಾಣಿಸದಂತೆ ಮಾಡಿದೆ. ನನ್ನ ಸಹೋದರಿಯ ಜೀವನದ ಈ ಪಯಣವನ್ನು ಕೇವಲ 'ಸ್ಫೂರ್ತಿ' ಎಂಬ ಪದದಿಂದ ವರ್ಣಿಸಲು ಸಾಧ್ಯವಿಲ್ಲ, ಆಕೆ ಜೀವಂತ ಪವಾಡ ಎಂದು ಆಕೆಯ ಸಹೋದರ ಹೆಮ್ಮೆಯಿಂದ ಬಣ್ಣಿಸಿದ್ದಾರೆ.

ಒಂದು ಕಾಲದಲ್ಲಿ ವೈದ್ಯರು ಬದುಕುವ ಸಾಧ್ಯತೆ ಕೇವಲ ಶೇ. 10 ಮಾತ್ರ ಎಂದಿದ್ದ ಕಡೆ, ಶೇ. 90ರಷ್ಟು ಸೋಲನ್ನು ಮೆಟ್ಟಿನಿಂತು ಶೇ. 100ರಷ್ಟು ಪರಿಪೂರ್ಣ ಯಶಸ್ಸನ್ನು ಸಾಧಿಸಿ ತೋರಿಸಿದ ಈ ಯುವತಿಯ ಕಥೆಯು ಇಂದು ಕಷ್ಟಗಳ ಸುಳಿಯಲ್ಲಿ ಸಿಲುಕಿರುವ ಸಾವಿರಾರು ಜನರಿಗೆ ಹೊಸ ಭರವಸೆಯ ಕಿಚ್ಚು ಹಚ್ಚಿದೆ, (ಏಜೆನ್ಸೀಸ್​).