ರಜತ್ ಸೇಥಿ ವಾದ ಹೀಗಿದೆ!...
ಹಿಂದೆ ಬಿಜೆಪಿ ಚುನಾವಣಾ ಪ್ರಚಾರದಲ್ಲಿ ಕೆಲಸ ಮಾಡಿದ್ದ ರಾಜಕೀಯ ವಿಶ್ಲೇಷಕ ರಜತ್ ಸೇಥಿ ಕೂಡ ಇಬ್ಬರು ಆಯುಕ್ತರ ನಡವಳಿಕೆಯನ್ನು ಪ್ರಶ್ನಿಸಿದ್ದಾರೆ. ಆದರೆ ಅವರನ್ನು ಹುದ್ದೆಯಿಂದ ತೆಗೆದುಹಾಕಬೇಕೆಂದು ಅವರು ಹೇಳಿಲ್ಲ. ಬದಲಾಗಿ, ಆಂತರಿಕ ಸಂವಹನದಲ್ಲಿ ಎದ್ದಿರುವ ಸಮಸ್ಯೆಗಳ ಬಗ್ಗೆ ಚರ್ಚಿಸಲು ಮೂವರೂ ಚುನಾವಣಾ ಆಯುಕ್ತರು ಒಟ್ಟಿಗೆ ಕುಳಿತು ಆಲೋಚಿಸಬೇಕಾಗಿತ್ತು ಎಂದು ಸೇಥಿ ಅಭಿಪ್ರಾಯಪಟ್ಟಿದ್ದಾರೆ.
ಒಂದು ನಿರ್ಧಾರದ ವಿಚಾರದಲ್ಲಿ ಇಬ್ಬರು ಆಯುಕ್ತರು ಒಂದೇ ಕಡೆಯಿದ್ದರೆ, ಅವರು ತಮ್ಮದೇ ಆದ ಅಧಿಕಾರದಲ್ಲಿ ಚುನಾವಣಾ ಆಯೋಗದ ಪೂರ್ಣ ಪ್ರಮಾಣದ ಸಭೆಯನ್ನು ಕರೆಯಬಹುದಿತ್ತು ಎಂದು ಸೇಥಿ ಹೇಳಿದ್ದಾರೆ. ಅಲ್ಲದೆ, ಚುನಾವಣಾ ಆಯೋಗವು ಸಂವಿಧಾನಾತ್ಮಕವಾಗಿ ಸ್ವತಂತ್ರ ಸಂಸ್ಥೆಯಾಗಿದ್ದರೂ, ಇಬ್ಬರು ಆಯುಕ್ತರು ಸಚಿವ ಸಂಪುಟ ಕಾರ್ಯದರ್ಶಿಯನ್ನು ಏಕೆ ಸಂಪರ್ಕಿಸಿದರು ಎಂಬುದನ್ನೂ ಸೇಥಿ ಪ್ರಶ್ನಿಸಿದ್ದಾರೆ. ಚುನಾವಣಾ ಆಯೋಗವು ಸ್ವತಂತ್ರ ಸಂಸ್ಥೆಯಾಗಿದ್ದು, ಇಬ್ಬರು ಆಯುಕ್ತರು ಸಚಿವ ಸಂಪುಟ ಕಾರ್ಯದರ್ಶಿಗೆ ಏಕೆ ಅಷ್ಟೊಂದು ಗೌರವ ಅಥವಾ ಆದ್ಯತೆ ತೋರಿದರು ಎಂಬುದು ತಮಗೆ ಅರ್ಥವಾಗುತ್ತಿಲ್ಲ ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಸಂಧು ಮತ್ತು ಜೋಶಿ ಜಂಟಿಯಾಗಿ ನಿರ್ದಿಷ್ಟ ನಿರ್ಧಾರಗಳನ್ನು ವಿರೋಧಿಸಿ ಅವರ ವಿರುದ್ಧ ಬಹುಮತ ರೂಪಿಸಿದ್ದರೇ, ಅಥವಾ ಇಬ್ಬರೂ ಬೇರೆ ಬೇರೆ ವಿಷಯಗಳ ಮೇಲೆ ಆಕ್ಷೇಪಣೆಗಳನ್ನು ಎತ್ತಿ ಇನ್ನೂ ಬಹುಮತವು ನಿರ್ಧಾರಗಳ ಪರವಾಗಿದೆಯೇ ಎಂಬುದು ಇಲ್ಲಿನ ಮುಖ್ಯ ವಿಷಯವಾಗಿದೆ ಎಂದು ಸೇಥಿ ಹೇಳಿದ್ದಾರೆ. ಇಬ್ಬರು ಆಯುಕ್ತರು ಒಂದು ನಿರ್ದಿಷ್ಟ ವಿಷಯದ ಬಗ್ಗೆ ಒಟ್ಟಾಗಿ ಅಸಮ್ಮತಿ ಸೂಚಿಸಿ, ಇಡೀ ನಿರ್ಧಾರವನ್ನು ಆರಂಭದಿಂದಲೇ ಅಕ್ರಮಗೊಳಿಸಿದರೇ..? ಅಥವಾ ಇಬ್ಬರೂ ವಿಭಿನ್ನ ವಿಷಯಗಳ ಬಗ್ಗೆ ಅಸಮ್ಮತಿ ವ್ಯಕ್ತಪಡಿಸಿದರೇ ಮತ್ತು ತೆಗೆದುಕೊಂಡ ನಿರ್ಧಾರದ ಪರವಾಗಿ ಬಹುಮತವಿತ್ತೇ..? ಈ ವಿವರಗಳು ನಮಗೆ ತಿಳಿದಿಲ್ಲ ಎಂದು ಹೇಳಿದ ಸೇಥಿ, ಚುನಾವಣಾ ಆಯೋಗ ಮತ್ತು ಮೂವರು ಆಯುಕ್ತರು ಒಟ್ಟಾಗಿ ಮಾತ್ರ ಏನಾಯಿತು ಎಂಬುದನ್ನು ಸ್ಪಷ್ಟಪಡಿಸಲು ಸಾಧ್ಯ ಎಂದಿದ್ದಾರೆ.
ಇದು ಭಿನ್ನಾಭಿಪ್ರಾಯವಷ್ಟೆ ಅಲ್ಲ ಎಂದ ಯೋಗೆಂದ್ರ ಯಾದವ್!
ಎಸ್ಐಆರ್ ಪ್ರಕ್ರಿಯೆಯ ಅಂಶಗಳ ಬಗ್ಗೆ (ಮತದಾರರ ನಮೂನೆಗಳಲ್ಲಿನ ಬದಲಾವಣೆಗಳು ಮತ್ತು ಕೇಂದ್ರೀಕೃತ ತಂತ್ರಾಂಶದ ಬಳಕೆ ಸೇರಿದಂತೆ) ಇಬ್ಬರು ಆಯುಕ್ತರು ಕಳವಳ ವ್ಯಕ್ತಪಡಿಸಿದ ಆಂತರಿಕ ಪತ್ರವ್ಯವಹಾರಗಳ ವರದಿಗಳ ನಂತರ ಈ ಚರ್ಚೆ ನಡೆದಿದೆ. ಈ ವಿಷಯವು ಚುನಾವಣಾ ಸಮಿತಿಯೊಳಗಿನ ಸಾಮಾನ್ಯ ಭಿನ್ನಾಭಿಪ್ರಾಯಕ್ಕಿಂತ ಮೀರಿದ್ದಾಗಿದೆ ಎಂದಿರುವ ಯೋಗೇಂದ್ರ ಯಾದವ್, ಮತದಾರರ ನೋಂದಣಿ ಅಧಿಕಾರಿಗಳ ಹಕ್ಕಾಗಿದ್ದ ಕ್ರಮಗಳನ್ನು ತೆಗೆದುಕೊಳ್ಳಲು ಚುನಾವಣಾ ಆಯೋಗವು ತನ್ನ ಸಿಬ್ಬಂದಿಗೆ ಅಧಿಕಾರ ನೀಡಿದೆ ಎಂದು ಆರೋಪಿಸಿದ್ದಾರೆ.
ಮತದಾರರ ಪಟ್ಟಿಗೆ ಹೆಸರು ಸೇರಿಸಲು ಇರುವ ಶಾಸನಬದ್ಧ ಅರ್ಜಿ ಫಾರ್ಮ್ 6 ರಲ್ಲಿ ಮಾಡಿದ ಬದಲಾವಣೆಗಳ ವಿವಾದವನ್ನು ಉಲ್ಲೇಖಿಸಿದ ಯಾದವ್, ಈ ವಿಷಯದಲ್ಲಿ ಹೆಚ್ಚಿನ ಪಾರದರ್ಶಕತೆಯ ಅಗತ್ಯವಿದೆ ಎಂದಿದ್ದಾರೆ.
ರಜತ್ ಸೇಥಿ ಅವರು ಚುನಾವಣಾ ಆಯೋಗ (ನೇಮಕಾತಿ, ಸೇವಾ ಷರತ್ತುಗಳು ಮತ್ತು ಅಧಿಕಾರಾವಧಿ) ಕಾಯಿದೆ, 2023 ರ ಅಡಿಯಲ್ಲಿ ಪ್ರಶ್ನಾರ್ಹ ನಿರ್ಧಾರಗಳಿಗೆ ಅಗತ್ಯವಿರುವ ಬಹುಮತವಿದೆಯೇ ಎಂಬುದು ಪ್ರಮುಖ ಕಾನೂನು ಪ್ರಶ್ನೆಯಾಗಿದೆ ಎಂದು ಹೇಳಿದ್ದಾರೆ. ಇಬ್ಬರು ಚುನಾವಣಾ ಆಯುಕ್ತರು ಜಂಟಿಯಾಗಿ ನಿರ್ಧಾರವನ್ನು ವಿರೋಧಿಸಿ ಅದರ ವಿರುದ್ಧ ಬಹುಮತವನ್ನು ಹೊಂದಿದ್ದರೆ, ಆ ನಿರ್ಧಾರವನ್ನು ತೆಗೆದುಕೊಳ್ಳಲು ಸಾಧ್ಯವಿರಲಿಲ್ಲ. ಆದರೆ ಪ್ರಸ್ತುತ ಲಭ್ಯವಿರುವ ಮಾಹಿತಿಯು ಅವರ ಆಕ್ಷೇಪಣೆಗಳು ನಿರ್ದಿಷ್ಟ ನಿರ್ಧಾರಗಳಿಗೆ ಸಾಮೂಹಿಕ ವಿರೋಧವಾಗಿದೆಯೇ ಎಂಬುದನ್ನು ಸ್ಥಾಪಿಸುವುದಿಲ್ಲ ಎಂದು ಅವರು ತಿಳಿಸಿದ್ದಾರೆ. ಈ ಪ್ರಮುಖ ಕಾನೂನು ಪ್ರಶ್ನೆಗೆ ಚುನಾವಣಾ ಆಯೋಗವೇ ಉತ್ತರ ನೀಡಬೇಕಾಗಿದೆ ಎಂದು ಸೇಥಿ ಹೇಳಿದ್ದಾರೆ.
ಬಿಜೆಪಿ ವಕ್ತಾರರು ಹೇಳಿದ್ದೇನು..?
ಚರ್ಚೆಯಲ್ಲಿ ಭಾಗವಹಿಸಿದ್ದ ಬಿಜೆಪಿ ವಕ್ತಾರ ಸಿದ್ಧಾರ್ಥ್ ಯಾದವ್, ಚುನಾವಣಾ ಆಯೋಗದ ಸಮಾಲೋಚನೆಗಳ ಸಮಯದಲ್ಲಿ ಭಿನ್ನಾಪ್ರಾಯಕ್ಕೆ 2023 ರ ಕಾನೂನಿನಲ್ಲಿ ಅವಕಾಶವಿದೆ ಮತ್ತು ಆಯೋಗವು ಅಂತಿಮವಾಗಿ ತೆಗೆದುಕೊಂಡ ನಿರ್ಧಾರಗಳು ಸರ್ವಾನುಮತದಿಂದ ಕೂಡಿದ್ದವು ಎಂದು ವಾದಿಸಿದ್ದಾರೆ. ಅಂತಿಮ ನಿರ್ಧಾರದ ವಿರುದ್ಧ ಯಾವುದೇ ಅಧಿಕೃತ ಭಿನ್ನಾಭಿಪ್ರಾಯ ದಾಖಲಾಗಿಲ್ಲ ಎಂದು ಹೇಳಿದ ಅವರು, ಸಿಇಸಿ ಅವರಿಂದ ಆಯುಕ್ತರು ಮೂಲೆಗುಂಪಾಗಿದ್ದಾರೆ ಎಂಬುದನ್ನು ಪ್ರಶ್ನಿಸಿದ್ದಾರೆ(ಏಜೆನ್ಸೀಸ್).
