ಪಾಸ್ತಾ, ನೂಡಲ್ಸ್ ಜೊತೆಗೆ ಅಡುಗೆ ಭಟ್ಟನ ನೇಮಕ: ತಿಹಾರ್​ನಲ್ಲಿ ಉಪವಾಸ ಕುಳಿತ ಅಮೆರಿಕನ್​ ಕೈದಿ; ಮಾನವೀಯತೆ ಮೆರೆದ ದೆಹಲಿ ನ್ಯಾಯಾಲಯ! Matthew Aaron Vandyke

ನವದೆಹಲಿ: ರಾಷ್ಟ್ರೀಯ ತನಿಖಾ ಸಂಸ್ಥೆ (NIA) ತನಿಖೆ ನಡೆಸುತ್ತಿರುವ ಭಯೋತ್ಪಾದನೆ ಪ್ರಕರಣದಲ್ಲಿ ದೆಹಲಿಯ ತಿಹಾರ್ ಜೈಲು ಸೇರಿರುವ ಅಮೆರಿಕನ್ ಪ್ರಜೆ ಮ್ಯಾಥ್ಯೂ ಆರನ್ ವ್ಯಾನ್‌ಡೈಕ್‌ (Matthew Aaron Vandyke) ಗೆ ಕೊನೆಗೂ ದೊಡ್ಡ ರಿಲೀಫ್ ಸಿಕ್ಕಿದೆ.

ಜೈಲಿನ ಕೊಡುತ್ತಿರುವ ಮಸಾಲೆಯುಕ್ತ, ಎಣ್ಣೆಯುಕ್ತ ಊಟ ತಿನ್ನಲು ನನ್ನಿಂದ ಸಾಧ್ಯವಾಗುತ್ತಿಲ್ಲ, ನನ್ನ ಆರೋಗ್ಯ ಹಾಳಾಗುತ್ತಿದೆ ಎಂದು ಜೈಲಿನಲ್ಲಿ ಉಪವಾಸ ಸತ್ಯಾಗ್ರಹ ಕೂತಿದ್ದ ಈತನ ಅರ್ಜಿಯನ್ನು ವಿಚಾರಣೆ ನಡೆಸಿದ ದೆಹಲಿ ಕೋರ್ಟ್, ಮಾನವೀಯತೆ ಮತ್ತು ವೈದ್ಯಕೀಯ ಆಧಾರದ ಮೇಲೆ ವಿಶೇಷ ಆಹಾರ ವ್ಯವಸ್ಥೆಗೆ ಅನುಮತಿ ನೀಡಿದೆ.

ತಿಹಾರ್​ನಲ್ಲಿರುವ ಮ್ಯಾಥ್ಯೂ ಆರನ್ ವ್ಯಾನ್‌ಡೈಕ್ ಪರ ವಕೀಲರಾದ ರೋಹಿತ್ ದಾಂಡ್ರಿಯಾಲ್ ಮತ್ತು ರೋಹಿತ್ ಗೌರ್, ದೆಹಲಿಯ ಪಟಿಯಾಲ ಹೌಸ್ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿದ್ದರು.

ಜೈಲಿನಲ್ಲಿ ಪ್ರತಿದಿನ ನೀಡುವ ಸಾಮಾನ್ಯ ಆಹಾರವು ಅತ್ಯಂತ ಖಾರ, ಎಣ್ಣೆಯುಕ್ತ ಮತ್ತು ಜಿಡ್ಡಿನಿಂದ ಕೂಡಿದೆ. ಇದರಿಂದಾಗಿ ವ್ಯಾನ್‌ಡೈಕ್‌ಗೆ ತೀವ್ರ ದೈಹಿಕ ಅಸ್ವಸ್ಥತೆ ಎದುರಾಗಿದೆ. ಜೈಲಿನ ಉಟ ಇತನಿಗೆ ಸರಿಹೊಂದದ ಕಾರಣ ಅನಿವಾರ್ಯವಾಗಿ ಮೇ 6, 2026 ರಿಂದ ಉಪವಾಸ ಸತ್ಯಾಗ್ರಹ ಆರಂಭಿಸಬೇಕಾಯಿತು ಎಂದು ಕೋರ್ಟ್‌ಗೆ ತಿಳಿಸಿದ್ದಾರೆ.

ಸಂವಿಧಾನದ 21ನೇ ವಿಧಿಯಡಿ ಜೀವಿಸುವ ಹಕ್ಕು ಮತ್ತು ವೈಯಕ್ತಿಕ ಸ್ವಾತಂತ್ರ್ಯ ಪ್ರತಿಯೊಬ್ಬ ವ್ಯಕ್ತಿಗೂ ಇದೆ. ನ್ಯಾಯಾಂಗ ಬಂಧನದಲ್ಲಿರುವ ಆರೋಪಿಗೂ ಮಾನವೀಯ ಘನತೆಯಿಂದ ಬದುಕುವ ಹಕ್ಕಿದೆ ಎಂದು ವಾದಿಸಿದ ವಕೀಲರು, ಆತನ ದೇಹಕ್ಕೆ ಒಪ್ಪುವಂತಹ ವಿಶೇಷ ಆಹಾರ ಮತ್ತು ಊಟ ತಯಾರಿಸಲು ಪ್ರತ್ಯೇಕ ವ್ಯವಸ್ಥೆ ಕಲ್ಪಿಸಬೇಕು ಎಂದು ಮನವಿ ಮಾಡಿದರು. ಅಲ್ಲದೆ, ಈ ಆಹಾರ ಸಾಮಗ್ರಿಗಳು, ಅಡುಗೆ ಸಲಕರಣೆ ಹಾಗೂ ಬೇಕಾಗುವ ಎಲ್ಲಾ ವೆಚ್ಚಗಳನ್ನು ವ್ಯಾನ್‌ಡೈಕ್ ಕುಟುಂಬವೇ ಭರಿಸಲಿದೆ ಎಂದು ಸ್ಪಷ್ಟಪಡಿಸಿದರು.

ಹೆಚ್ಚುವರಿ ಸೆಷನ್ಸ್ ನ್ಯಾಯಾಧೀಶ ಪ್ರಶಾಂತ್ ಶರ್ಮಾ ಅವರ ನ್ಯಾಯಪೀಠವು, ಎನ್‌ಐಎ ಮತ್ತು ತಿಹಾರ್ ಜೈಲು ಸೂಪರಿಂಟೆಂಡೆಂಟ್ ಅವರ ವರದಿಯನ್ನು ಪರಿಶೀಲಿಸಿ ಜೊತೆಗೆ ಆರೋಪಿಯ ವೈದ್ಯಕೀಯ ಸ್ಥಿತಿಯನ್ನು ಪರಿಗಣಿಸಿದ ನ್ಯಾಯಾಲಯ, ಮಾಂಸಾಹಾರಿ ಪದಾರ್ಥಗಳನ್ನು ಹೊರತುಪಡಿಸಿ ಉಳಿದ ಆಹಾರ ವಸ್ತುಗಳನ್ನು ಅನುಮತಿಸಿದೆ.

ವ್ಯಾನ್‌ಡೈಕ್ ಕೇಳಿದ್ದ ಕೆಂಪು ಮಾಂಸ, ಕೋಳಿ, ಮೀನು ಮತ್ತು ಸೀಗಡಿಗಳ ವಿನಂತಿಯನ್ನು ನ್ಯಾಯಾಲಯ ತಿರಸ್ಕರಿಸಿದೆ. ಆದರೆ, ಆತನ ಇಷ್ಟಕ್ಕೆ ಅನುಗುಣವಾಗಿ ಬೇಳೆಕಾಳು, ಪಾಸ್ತಾ, ನೂಡಲ್ಸ್, ಅಕ್ಕಿ, ಆಲೂಗಡ್ಡೆ, ಈರುಳ್ಳಿ, ಬೀನ್ಸ್, ಬ್ರೆಡ್, ಬೆಣ್ಣೆ, ಆಲಿವ್ ಎಣ್ಣೆ, ಟೋನ್ಡ್ ಹಾಲು, ಸೋಯಾ ಹಾಲು, ಬಾಟಲ್ ನೀರು ಮತ್ತು ಮಸಾಲೆಗಳನ್ನು ಜೈಲಿಗೆ ತರಿಸಿಕೊಳ್ಳಲು ಗ್ರೀನ್ ಸಿಗ್ನಲ್ ನೀಡಿದೆ.

ಅಷ್ಟೇ ಅಲ್ಲದೆ, ಈ ಆಹಾರ ಪದಾರ್ಥಗಳನ್ನು ಬಳಸಿ ವ್ಯಾನ್‌ಡೈಕ್‌ಗೆ ಇಷ್ಟವಾಗುವ ರೀತಿಯಲ್ಲಿ ಊಟ ತಯಾರಿಸಲು ಒಬ್ಬಅಡುಗೆಯವರನ್ನು ಒದಗಿಸುವಂತೆ ಜೈಲು ಅಧಿಕಾರಿಗಳಿಗೆ ದೆಹಲಿ ಕೋರ್ಟ್ ಸೂಚಿಸಿದೆ. ಜೈಲಿನಲ್ಲಿ ಸೊಳ್ಳೆಗಳ ಕಾಟದಿಂದ ತಪ್ಪಿಸಿಕೊಳ್ಳಲು ಮಸ್ಕಿಟೋ ನೆಟ್ ಹಾಗೂ ಬಿಸಿನೀರಿಗಾಗಿ ಇಲೆಕ್ಟ್ರಿಕ್ ಕೆಟಲ್ ನೀಡುವಂತೆಯೂ ಆದೇಶಿಸಿದೆ, (ಏಜನ್ಸೀಸ್​).