ಮಹಿಳಾ ರೈಡರ್ ಇರುತ್ತಾರೆ ಎಂದು ನಂಬಿ ರಾಪಿಡೋ ಪಿಂಕ್ ಸೇವೆಯನ್ನು ಶಾಲಿನಿ ಬುಕ್ ಮಾಡಿದ್ದರು. ಆದರೆ, ಅವರಿಗೆ ಅಪರಿಚಿತ ಪುರುಷನೊಬ್ಬನಿಂದ ಫೋನ್ ಕಾಲ್ ಬಂದಿದ್ದು, ನೀವು ಪಿಕ್‌ಅಪ್ ಸ್ಥಳಕ್ಕೆ ತಲುಪಿದ್ದೀರಾ ಎಂದು ಆತ ವಿಚಾರಿಸಿದ್ದಾನೆ. ಹುಡುಗನ ಧ್ವನಿ ಕೇಳಿ ಬೆರಗಾದ ಶಾಲಿನಿ, ನಾನು ಬುಕ್ ಮಾಡಿದ್ದು ಪಿಂಕ್ ರೈಡ್ ಮತ್ತು ಮಹಿಳಾ ರೈಡರ್ ಬರಬೇಕಿತ್ತು ಎಂದಿದ್ದಾರೆ.
ಶಾಲಿನಿ ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಪುರುಷ ರೈಡರ್ ಅತ್ಯಂತ ನಿರ್ಲಕ್ಷ್ಯದಿಂದ "ಮೇಡಂ, ನಾನು ಗೇ" ಎಂದು ಉತ್ತರಿಸಿದ್ದಾನೆ. ಇದರಿಂದ ಶಾಲಿನಿ ಅವರು ಇನ್ನಷ್ಟು ಗಾಬರಿಯಾಗಿದ್ದಾರೆ. ಅಲ್ಲದೆ, ಆ ರೈಡರ್ ಪಿಂಕ್ ರೈಡ್ ಆ್ಯಪ್‌ನಲ್ಲಿ ತನ್ನ ಸ್ವಂತ ಫೋಟೋದ ಬದಲು ಮಹಿಳಾ ಸಂಬಂಧಿಕರ ಫೋಟೋವನ್ನು ಬಳಸಿಕೊಂಡಿರುವುದು ಬಯಲಾಗಿದೆ.
ಶಾಲಿ ಅವರು ರೈಡ್ ರದ್ದುಗೊಳಿಸಲು ಮುಂದಾದಾಗ ಅವರಿಗೆ 15 ರೂಪಾಯಿ ದಂಡದ ವಿಧಿಸಲಾಗಿದೆ. ಇಲ್ಲಿ ಶಾಲಿನಿ ಅವರಿಗೆ ಕಾಡುತ್ತಿರುವ ಆತಂಕ ಏನೆಂದರೆ, ಈಗಾಗಲೇ ಆ ರಾಪಿಡೋ ಪಿಂಕ್ ಡ್ರೈವರ್ ಆಕೆಯ ಮುಖವನ್ನು ನೋಡಿದ್ದಾನೆ. ಅಲ್ಲದೆ, ಆಕೆ ವಾಸವಿರುವ ಸ್ಥಳದ ಮಾಹಿತಿಯೂ ಆತನಿಗೆ ಗೊತ್ತಿದೆ. ಈ ವಿಚಾರ ಶಾಲಿಗೆ ಭಯ ಹುಟ್ಟಿಸಿದ್ದು, ಈ ದೇಶದಲ್ಲಿ ಮಹಿಳೆಯರ ಸುರಕ್ಷತೆ ಎನ್ನುವುದು ಕೇವಲ ಲಾಭದಾಯಕ ವ್ಯವಹಾರ ಹಾಗೂ ಹಾಸ್ಯದಂತಾಗಿದೆ ಎಂದು ತಮ್ಮ ಅಳಲು ತೋಡಿಕೊಂಡಿದ್ದಾರೆ.
