ಉತ್ಪಾದನೆ ಆಧಾರಿತ ಪ್ರೋತ್ಸಾಹಧನʼ(ಪಿಎಲ್ಐ) ಕಾರ್ಯಕ್ರಮವು ಭಾರತದ ಕೈಗಾರಿಕಾ ಪಯಣದಲ್ಲಿ ಒಂದು ಪ್ರಮುಖ ಹಂತದ ಹೆಗ್ಗುರುತಾಗಿದೆ. 14 ವಲಯಗಳಲ್ಲಿ 2.4 ಲಕ್ಷ ಕೋಟಿ ರೂ.ಗೂ ಹೆಚ್ಚು ಹೂಡಿಕೆಗಳ ಬದ್ಧತೆಯೊಂದಿಗೆ, ಭಾರತದ ಉತ್ಪಾದನಾ ಸಾಮರ್ಥ್ಯವನ್ನು ʻಪಿಎಲ್ಐʼ ವಿಸ್ತರಿಸುತ್ತಿದೆ. ಅದು ಹೂಡಿಕೆಯನ್ನು ಆಕರ್ಷಿಸುತ್ತಿದೆ, ಉದ್ಯೋಗಗಳನ್ನು ಸೃಷ್ಟಿಸುತ್ತಿದೆ ಮತ್ತು ವ್ಯಾಪಕ ಶ್ರೇಣಿಯ ಕೈಗಾರಿಕೆಗಳಾದ್ಯಂತ ರಫ್ತುಗಳನ್ನು ಹೆಚ್ಚಿಸುತ್ತಿದೆ.
ಕೈಗಾರಿಕಾ ತಳಹದಿಯು ಎಷ್ಟು ವೇಗವಾಗಿ ಬದಲಾಗಬಹುದು ಎಂಬುದಕ್ಕೆ ಎಲೆಕ್ಟ್ರಾನಿಕ್ಸ್ ವಲಯ ಸ್ಪಷ್ಟ ನಿದರ್ಶನ ಒದಗಿಸುತ್ತದೆ. ಎಲೆಕ್ಟ್ರಾನಿಕ್ಸ್ ಉತ್ಪಾದನೆ ಮತ್ತು ರಫ್ತು ಪ್ರಮಾಣಗಳು ಎರಡು ಮತ್ತು ಮೂರು ಅಂಕಿಗಳಲ್ಲಿ ಹೆಚ್ಚಾಗಿವೆ. ವಿಶ್ವದ ಕೆಲವು ಪ್ರಮುಖ ಸ್ಮಾರ್ಟ್ಫೋನ್ ಬ್ರ್ಯಾಂಡ್ ಗಳು ಈಗ ಭಾರತದಲ್ಲಿ ಫೋನ್ಗಳನ್ನು ತಯಾರಿಸುತ್ತಿವೆ, ಇವುಗಳನ್ನು ವಿಶ್ವಾದ್ಯಂತ ಗ್ರಾಹಕರು ಬಳಸುತ್ತಿದ್ದಾರೆ.
ಸೆಮಿಕಂಡಕ್ಟರ್ಗಳು ಇನ್ನಷ್ಟು ಮಹತ್ವಾಕಾಂಕ್ಷೆಯ ಹೆಜ್ಜೆಯನ್ನು ಪ್ರತಿನಿಧಿಸುತ್ತವೆ. ಒಂದು ದಶಕದ ಹಿಂದೆ ಭಾರತವು ಸೆಮಿಕಂಡಕ್ಟರ್ ಉತ್ಪಾದನೆಯಲ್ಲಿ ವಸ್ತುತಃ ಇರಲೇ ಇಲ್ಲ. ಭಾರತವು ಈಗ ಚಿಪ್ಗಳನ್ನು ನಿರ್ಮಿಸುತ್ತಿದೆ. ಜೊತೆಗೆ ವಿನ್ಯಾಸ, ಫ್ಯಾಬ್ರಿಕೇಶನ್ನಿಂದ ಹಿಡಿದು ಪ್ಯಾಕೇಜಿಂಗ್, ಸಾಮಗ್ರಿಗಳು ಹಾಗೂ ಪ್ರತಿಭೆಯವರೆಗಿನ ಅವುಗಳ ಹಿಂದಿನ ಪರಿಸರ ವ್ಯವಸ್ಥೆಯನ್ನೂ ಭಾರತ ನಿರ್ಮಿಸುತ್ತಿದೆ. ಮೋದಿಯವರ ದೃಷ್ಟಿಕೋನವು ಕೇವಲ ಕಾರ್ಖಾನೆಗಳ ಆಚೆಗೂ ವಿಸ್ತರಿಸಿದ್ದು, ಎಲೆಕ್ಟ್ರಾನಿಕ್ಸ್, ಎಐ, ಎಲೆಕ್ಟ್ರಿಕ್ ವಾಹನ ಮತ್ತು ರಕ್ಷಣಾ ವಲಯಗಳಲ್ಲಿ ಭಾರತದ ಸಾಮರ್ಥ್ಯಗಳನ್ನು ಬಲಪಡಿಸುವತ್ತ ಗಮನಹರಿಸಿದೆ.
ಉತ್ಪಾದನಾ ಸಾಮರ್ಥ್ಯವು ರಾಷ್ಟ್ರೀಯ ಭದ್ರತೆಯ ಪ್ರಶ್ನೆಯಾಗಿಯೂ ಬದಲಾಗುತ್ತಿದೆ. ಮೋದಿಯವರು ರಕ್ಷಣಾ ಉತ್ಪಾದನೆಯನ್ನು ಇದೇ ದೃಷ್ಟಿಕೋನದಿಂದ ಹೆಚ್ಚಾಗಿ ನೋಡುತ್ತಿದ್ದಾರೆ. ದೇಶೀಯ ಉಪಕರಣಗಳು, ಸ್ಥಳೀಯ ಸಂಶೋಧನೆ ಮತ್ತು ಅಭಿವೃದ್ಧಿ ಹಾಗೂ ಭಾರತವನ್ನು ರಕ್ಷಣಾ ತಂತ್ರಜ್ಞಾನದ ಜಾಗತಿಕ ಪೂರೈಕೆದಾರನನ್ನಾಗಿ ಮಾಡುವತ್ತ ಅವರು ಹೆಚ್ಚಿನ ಒತ್ತು ನೀಡುತ್ತಿದ್ದಾರೆ. ಕಳೆದ 12 ವರ್ಷಗಳಲ್ಲಿ ರಕ್ಷಣಾ ರಫ್ತು 56 ಪಟ್ಟು ಹೆಚ್ಚಾಗಿದೆ.
ಭಾರತೀಯ ಉದ್ಯಮದ ಮುಂದಿನ ಹಂತದಲ್ಲಿ, ಜಾಗತಿಕ ಉದ್ದಿಮೆಗಳಾಗಿ ಬೆಳೆಯಬಲ್ಲ ಇನ್ನೂ ಹಲವು ಮಧ್ಯಮ ಗಾತ್ರದ ಕಂಪನಿಗಳ ಅಗತ್ಯವಿದೆ. ಕಾಲಾನಂತರದಲ್ಲಿ ನಾವೀನ್ಯತೆಯನ್ನು ಬೆಂಬಲಿಸಲು ಮತ್ತು ಸಾಮರ್ಥ್ಯಗಳನ್ನು ನಿರ್ಮಿಸಲು ಸಿದ್ಧರಿರುವ ಹೂಡಿಕೆದಾರರು ಮತ್ತು ಸಂಸ್ಥೆಗಳ ಅಗತ್ಯ ಅವರಿಗಿರುತ್ತದೆ. ಇಲ್ಲಿಯೇ ನವೋದ್ಯಮಗಳು ಮತ್ತು ಸಂಶೋಧನೆಯಲ್ಲಿನ ಹೂಡಿಕೆ ಪ್ರಮುಖ ಪಾತ್ರ ವಹಿಸುತ್ತದೆ.
ರಕ್ಷಣೆ, ಬಾಹ್ಯಾಕಾಶ, ಡ್ರೋನ್ಗಳು ಮತ್ತು ಡೀಪ್-ಟೆಕ್ನಾಲಜಿಯಂತಹ ವಲಯಗಳಲ್ಲಿ, ಯುವ ಕಂಪನಿಗಳು ತಾವು ಈ ಮೊದಲು ಪ್ರವೇಶಿಸಲಾಗದಿದ್ದ ಅಥವಾ ಹೆಚ್ಚಿನ ಪ್ರವೇಶ ಅಡೆತಡೆಗಳಿದ್ದ ಕ್ಷೇತ್ರಗಳನ್ನು ಪ್ರವೇಶಿಸುತ್ತಿವೆ.
ಮೋದಿಯವರು ಯುವಜನರಿಗೆ ಸಂಶೋಧನೆ ಮತ್ತು ನಾವೀನ್ಯತೆಯನ್ನು ಮುಂದುವರಿಸಲು ನಿರಂತರವಾಗಿ ಪ್ರೋತ್ಸಾಹಿಸಿದ್ದಾರೆ. 1 ಲಕ್ಷ ಕೋಟಿ ರೂ. ʻಸಂಶೋಧನೆ, ಅಭಿವೃದ್ಧಿ ಮತ್ತು ನಾವೀನ್ಯತಾ ನಿಧಿʼಯು ಡೀಪ್-ಟೆಕ್ನಾಲಜಿ, ಕಾರ್ಯತಂತ್ರದ ತಂತ್ರಜ್ಞಾನಗಳು ಮತ್ತು ʻಸನ್ರೈಸ್ʼ ವಲಯಗಳಿಗೆ ಬಂಡವಾಳವನ್ನು ತರುವ ಉದ್ದೇಶ ಹೊಂದಿದೆ. ಇಂದಿನ ಸಂಶೋಧನೆಯಿಂದ ಸೃಷ್ಟಿಯಾಗಲಿರುವ ನಾಳಿನ ಕೈಗಾರಿಕಾ ಸಾಮರ್ಥ್ಯಗಳಿಗೆ ಇದು ಭದ್ರ ಅಡಿಪಾಯ ಹಾಕುತ್ತಿದೆ.
ದಶಕಗಳ ಕಾಲ, ಕೈಗಾರಿಕಾ ಅಭಿವೃದ್ಧಿಯಲ್ಲಿ ಮೋದಿಯವರ ಆಸಕ್ತಿ ಮತ್ತು ಕೈಗಾರಿಕಾ ಮುಖಂಡರೊಂದಿಗೆ ಬೆರೆಯುವ ಅವರ ಇಚ್ಛೆಯನ್ನು ವೈಯಕ್ತಿಕವಾಗಿ ನೋಡುವ ಅದೃಷ್ಟ ನನ್ನದಾಗಿದೆ. ಕಂಪನಿಗಳು ಏನನ್ನು ನಿರ್ಮಿಸುತ್ತಿವೆ ಮತ್ತು ಇತರ ದೇಶಗಳು ಏನು ಮಾಡುತ್ತಿವೆ ಎಂಬುದರ ಕುರಿತು ಅವರಿಗೆ ಕುತೂಹಲವಿದೆ. ಅವರು ವಿದೇಶ ಪ್ರವಾಸ ಕೈಗೊಂಡಾಗ ಯಾವುದಾದರೂ ಆಸಕ್ತಿದಾಯಕ ವಿಷಯ ಕಂಡುಬಂದರೆ, ಅದನ್ನು ಭಾರತೀಯ ಕೈಗಾರಿಕೋದ್ಯಮಿಗಳೊಂದಿಗೆ ಚರ್ಚಿಸುತ್ತಾರೆ ಮತ್ತು ಸಾಂಪ್ರದಾಯಿಕ ಆಯಾಮಗಳನ್ನು ಮೀರಿ ಯೋಚಿಸಲು ಅವರನ್ನು ಪ್ರೋತ್ಸಾಹಿಸುತ್ತಾರೆ. ಉದ್ಯಮಿಗಳು ತಮ್ಮ ಕೆಲಸವನ್ನು ರಾಷ್ಟ್ರ ನಿರ್ಮಾಣದ ಭಾಗವಾಗಿ ನೋಡುವಂತೆ ಅವರು ಪ್ರೇರೇಪಿಸುತ್ತಾರೆ.
ಮೋದಿಯವರ ಈ 25 ವರ್ಷಗಳ ನಾಯಕತ್ವದಿಂದ ದೊಡ್ಡ ಚಿಂತನೆಯ ರೇಖೆ ಹೊರಹೊಮ್ಮುತ್ತಿದೆ. ಉದ್ಯಮವನ್ನು ಕೇವಲ ಆರ್ಥಿಕ ಚಟುವಟಿಕೆಯಾಗಿ ನೋಡದೆ ರಾಷ್ಟ್ರೀಯ ಸಾಮರ್ಥ್ಯದ ಅಭಿವ್ಯಕ್ತಿಯಾಗಿ ನೋಡಲಾಗುತ್ತಿದೆ. ಇದೆಲ್ಲದರ ಹಿನ್ನೆಲೆಯಲ್ಲಿ, ಭಾರತೀಯ ಉದ್ಯಮವು ಹೆಚ್ಚು ದಿಟ್ಟವಾಗಿ ಯೋಚಿಸುವ ಸಮಯ ಇದಾಗಿದೆ. ಭಾರತೀಯ ಉದ್ಯಮವು ಸಂಶೋಧನೆ ಮತ್ತು ನಾವೀನ್ಯತೆಯಲ್ಲಿ ಹೆಚ್ಚು ಹೂಡಿಕೆ ಮಾಡಬೇಕಾಗಿದೆ. ಅದು ಅಲ್ಪಾವಧಿಯ ಆರ್ಥಿಕ ಲಾಭಗಳಿಗಿಂತ ದೀರ್ಘಾವಧಿಯ ಚಿಂತನೆಯನ್ನು ಪ್ರದರ್ಶಿಸಬೇಕಿದೆ.
'ವಿಕಸಿತ ಭಾರತ'ದ ಮೇಲಿನ ಮೋದಿಯವರ ಗಮನವು, ಭಾರತೀಯ ಉದ್ಯಮವು ಎಚ್ಚೆತ್ತು ಕೇವಲ ಭಾರತಕ್ಕಾಗಿ ಮಾತ್ರವಲ್ಲದೆ ಜಾಗತಿಕ ಆಟಗಾರರಾಗಿ ಬೆಳೆಯುವಂತೆ ಮಾಡಲು ಸ್ಪಷ್ಟ ಕರೆಯಾಗಿದೆ.
ಲೇಖಕರು
ಉದಯ್ ಕೋಟಕ್, ಕೋಟಕ್ ಮಹೀಂದ್ರಾ ಬ್ಯಾಂಕ್ನ ಸಂಸ್ಥಾಪಕರು ಮತ್ತು ನಿರ್ದೇಶಕರು.
