ದೀಪಾವಳಿ ಮತ್ತು ಧನ್‌ತೇರಸ್ ಹಬ್ಬಗಳ ನಡುವಿನ ಅವಧಿಯಲ್ಲಿ ದೆಹಲಿಯಲ್ಲಿ ಸುಮಾರು 25,000 ಕೋಟಿ ರೂ.ಗಳ ವ್ಯಾಪಾರ ನಡೆಯುತ್ತದೆ. ಸೆಪ್ಟೆಂಬರ್ ಮತ್ತು ಅಕ್ಟೋಬರ್ ತಿಂಗಳುಗಳಲ್ಲಿ ನಡೆದ ಪ್ರತಿಭಟನೆಗಳು ಹಾಗೂ ಸಂಚಾರ ನಿರ್ಬಂಧಗಳಿಂದ ಈಗಾಗಲೇ ವ್ಯಾಪಾರಿಗಳಿಗೆ 3,000 ಕೋಟಿ ರೂ.ಗಳ ನಷ್ಟವಾಗಿದೆ. ಈಗ ಹಬ್ಬದ ಮುನ್ನಾ ದಿನಗಳಲ್ಲಿ ಮತ್ತೊಂದು ಬೃಹತ್ ಸಭೆ ನಡೆದರೆ ಹೆಚ್ಚುವರಿಯಾಗಿ 10,000 ಕೋಟಿ ರೂ.ಗಳ ವರೆಗೆ ನಷ್ಟವಾಗಬಹುದು ಎಂದು ವ್ಯಾಪಾರಿ ಸಂಘಟನೆಗಳು ಆತಂಕ ವ್ಯಕ್ತಪಡಿಸಿವೆ.
ಕೈ ನಾಯಕರಿಗೆ ವ್ಯಾಪಾರಸ್ಥರ ಮನವಿ!
ಸದರ್ ಬಜಾರ್ ಟ್ರೇಡ್ಸ್ ಅಸೋಸಿಯೇಷನ್ ಮತ್ತು ಕಿರಾಣಾ ಕಮಿಟಿ ದೆಹಲಿ ಸೇರಿದಂತೆ ವಿವಿಧ ವ್ಯಾಪಾರ ಸಂಘಟನೆಗಳು, ಈ ರಾಜಕೀಯ ಕಾರ್ಯಕ್ರಮವನ್ನು ದೀಪಾವಳಿಯ ನಂತರದ (ನವೆಂಬರ್ 8) ದಿನಗಳಿಗೆ ಮುಂದೂಡುವಂತೆ ಕೋರಿ ಕಾಂಗ್ರೆಸ್ ನಾಯಕಿ ಸೋನಿಯಾ ಗಾಂಧಿ, ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ, ಟಿಎಂಸಿ ನಾಯಕಿ ಮಮತಾ ಬ್ಯಾನರ್ಜಿ ಹಾಗೂ ಸಮಾಜವಾದಿ ಪಕ್ಷದ ನಾಯಕ ಅಖಿಲೇಶ್ ಯಾದವ್ ಸೇರಿದಂತೆ ಪ್ರಮುಖ ಇಂಡಿಯಾ ಮೈತ್ರಿಕೂಟದ ನಾಯಕರಿಗೆ ಪತ್ರ ಬರೆದಿವೆ. ರಾಜಕೀಯ ಸಮಾವೇಶಗಳನ್ನು ಸಮಯ ನೋಡಿಕೊಂಡು ಮತ್ತೆ ಆಯೋಜಿಸಬಹುದು, ಆದರೆ, ವರ್ಷದ ಅತಿಮುಖ್ಯವಾದ ವ್ಯಾಪಾರದ ಸಮಯದಲ್ಲಿ ವ್ಯಾಪಾರಿಗಳು ತಮ್ಮ ಅವಕಾಶವನ್ನು ಕಳೆದುಕೊಳ್ಳಲು ಸಿದ್ಧರಿಲ್ಲ ಎಂದು ಅವರು ಒತ್ತಾಯಿಸಿದ್ದಾರೆ.
