ಮುಂಬರುವ ವಿಧಾನಸಭಾ ಚುನಾವಣೆಯಲ್ಲಿ ಅಲ್ಪಸಂಖ್ಯಾತ ಮತಗಳ ಮೇಲೆ ಕಣ್ಣಿಟ್ಟು ಪ್ರಯತ್ನ ನಡೆಸಿರುವ ಜೆಡಿಎಸ್ ತಂತ್ರ ಗುಟ್ಟಾಗೇನು ಉಳಿದಿಲ್ಲ. ಸಿ.ಎಂ.ಇಬ್ರಾಹಿಂ ಅವರನ್ನು ಅಧ್ಯಕ್ಷರನ್ನಾಗಿ ಮಾಡಿರುವುದೂ ಇದೇ ಕಾರಣಕ್ಕೆ. ಜತೆಗೆ 25ಕ್ಕಿಂತ ಹೆಚ್ಚು ಕ್ಷೇತ್ರಗಳಲ್ಲಿ ಅಲ್ಪಸಂಖ್ಯಾತರಿಗೆ ಟಿಕೆಟ್ ನೀಡಬೇಕೆಂದೂ ಆ ಪಕ್ಷದ ನಾಯಕರು ಸಿದ್ಧವಾಗಿದ್ದಾರೆ ಎಂಬ ಮಾಹಿತಿ ಅರಿತ ಕೈ ನಾಯಕರು ತಿರುಗೇಟು ನೀಡಲು ರಾಜ್ಯಸಭೆ ಚುನಾವಣೆ ಫಲಿತಾಂಶ ಬಳಸಿಕೊಳ್ಳುವವರಿದ್ದಾರೆ. ಅಂದಹಾಗೆ, ಕಾಂಗ್ರೆಸ್ನಲ್ಲಿ ಎರಡನೇ ಅಭ್ಯರ್ಥಿ ಕಣಕ್ಕಿಳಿಸಿದ ನಿರ್ಧಾರದ ಬಗೆಗಿನ ಬೇಸರ ತಣ್ಣಗಾಗಿಲ್ಲ. ಪಕ್ಷದ ಪದಾಧಿಕಾರಿಯೊಬ್ಬರೇ ಅನೌಪಚಾರಿಕವಾಗಿ ಮಾತಿಗೆ ಸಿಕ್ಕಾಗ, ಈ ಒಂದು ನಿರ್ಧಾರಕ್ಕೆ ನಮ್ಮ ಆಕ್ಷೇಪ ಇತ್ತು. ಮನ್ಸೂರ್ ಅಲಿಖಾನ್ ಸೋಲು ವಿವಿಧ ಆಯಾಮಗಳಲ್ಲಿ ಪಕ್ಷಕ್ಕೆ ಹಾನಿ ಮಾಡುವ ಅವಕಾಶವೂ ಇದೆ ಎಂದು ವ್ಯಾಖ್ಯಾನಿಸಿದರು. ಜೆಡಿಎಸ್ನವರು ಸುಮ್ಮನೆ ಕೂರುವ ಜಾಯಾನವಲ್ಲ, ಒಕ್ಕಲಿಗರ ಪ್ರಾಬಲ್ಯ ಇರುವ ಹಳೇ ಮೈಸೂರು ಭಾಗದಲ್ಲಿ ತನ್ನದೇ ದಾಟಿಯಲ್ಲಿ ವರಸೆ ತೆಗೆಯಬಹುದು. ಒಕ್ಕಲಿಗ ನಾಯಕರನ್ನು ಕಾಂಗ್ರೆಸ್ ರಾಜಕೀಯವಾಗಿ ಮುಗಿಸಲು ಹೊರಡುತ್ತಿದೆ ಎಂಬ ಸಂದೇಶವನ್ನು ಖಂಡಿತವಾಗಿ ಹರಿಯಬಿಡುತ್ತದೆ, ಇದು ಪಕ್ಷಕ್ಕೆ ಪೆಟ್ಟುಕೊಡಬಹುದು. ಜತೆಗೆ ಮನ್ಸೂರ್ ಅವರನ್ನು ಉದ್ದೇಶಪೂರ್ವಕವಾಗಿ ಕಣಕ್ಕಿಳಿಸಿ, ಬಲಿಪಶು ಮಾಡಿದರು ಎಂದು ಮುಸ್ಲಿಮರಲ್ಲಿ ಅಭಿಪ್ರಾಯ ಹೋದರೆ ಒಂದಷ್ಟು ಕ್ಷೇತ್ರಗಳಲ್ಲಾದರೂ ಮತ ವಿಭಜನೆಯಾಗಿ ಕಾಂಗ್ರೆಸ್ ಅಭ್ಯರ್ಥಿಗೆ ಒಳ ಹೊಡೆತ ಬೀಳಬಹುದೆಂದು ವಿವರಣೆ ನೀಡಿದರು.
