2020 ಹಾಗೂ 2021ನೇ ಸಾಲಿನಲ್ಲಿ ಕೋವಿಡ್ ಸಾಂಕ್ರಾಮಿಕ ಹೆಮ್ಮಾರಿ ಜಾಗತಿಕವಾಗಿ ಹರಡಿ ಅಪಾರ ಸಾವು-ನೋವು ಅನುಭವಿಸಿರುವ ಚಿತ್ರಣವು ಇನ್ನೂ ಹಸಿರಾಗಿಯೇ ಇದೆ. ಈ ಸಾಂಕ್ರಾಮಿಕದಿಂದ ಉಂಟಾದ ಉದ್ಯೋಗ ನಷ್ಟ, ಆರ್ಥಿಕ ಹಿನ್ನಡೆಯ ಪರಿಣಾಮವನ್ನು ಜಗತ್ತು ಈಗಲೂ ಅನುಭವಿಸುತ್ತಿದೆ. ಡೆಂಘ, ಚಿಕೂನ್ಗುನ್ಯಾ, ಮಲೇರಿಯಾ, ಟೈಫಾಯಿಡ್ ಮುಂತಾದ ಸಾಂಕ್ರಾಮಿಕ ರೋಗಗಳು ಇತ್ತೀಚಿನ ದಿನಗಳಲ್ಲಿ ಜನರನ್ನು ಸಾಕಷ್ಟು ಬಾಧಿಸುತ್ತಿವೆ. ಕೆಲ ದಿನಗಳ ಹಿಂದೆ ನೆರೆಯ ಕೇರಳ ರಾಜ್ಯದಲ್ಲಿ ನಿಫಾ ವೈರಸ್ ಕೆಲವರನ್ನು ಬಲಿ ತೆಗೆದುಕೊಂಡು, ರಾಜ್ಯದ ಗಡಿಭಾಗದಲ್ಲಿ ಆತಂಕ ಮೂಡಿಸಿದ ಬೆಳವಣಿಗೆ ಇನ್ನೂ ತಾಜಾ ಇದೆ. ದೇಶದಲ್ಲಿ ನಿತ್ಯವೂ 40-50 ಕೋವಿಡ್ನ ಹೊಸ ಪ್ರಕರಣಗಳು ವರದಿಯಾಗಿರುತ್ತಿರುವುದು ಈ ಮಹಾಮಾರಿ ಸಂಪೂರ್ಣ ಕಣ್ಮರೆಯಾಗಿಲ್ಲ ಎಂಬುದರ ಸೂಚಕವಾಗಿದೆ. ಈ ಸಾಲಿನ ಸೆಪ್ಟೆಂಬರ್ವರೆಗೆ ರಾಜ್ಯದಲ್ಲಿ 7400ಕ್ಕೂ ಅಧಿಕ ಡೆಂಘ ಪ್ರಕರಣಗಳು ವರದಿಯಾಗಿದ್ದು, ಈ ಪೈಕಿ 4000ಕ್ಕೂ ಅಧಿಕ ಪ್ರಕರಣಗಳು ಬೆಂಗಳೂರಿನಲ್ಲಿಯೇ ಕಂಡುಬಂದಿವೆ. ಕಳೆದ ವರ್ಷ ಇದೇ ಅವಧಿಗಿಂತಲೂ ಹೆಚ್ಚಳವಾಗಿರುವುದು ಕಳವಳಕಾರಿ ಸಂಗತಿಯಾಗಿದೆ. ಈ ಎಲ್ಲ ಆತಂಕಕಾರಿ ವಾಸ್ತವಗಳ ಹಿನ್ನೆಲೆಯಲ್ಲಿ ಸಾಂಕ್ರಾಮಿಕ ಸನ್ನದ್ದತೆ ಕೇಂದ್ರ ಸ್ಥಾಪನೆ ವಿಚಾರವು ಮಹತ್ವದ ಕ್ರಮವಾಗಿದೆ. ಸಾಧ್ಯವಾದಷ್ಟು ತ್ವರಿತಗತಿಯಲ್ಲಿ ಈ ಕೇಂದ್ರ ಸ್ಥಾಪಿಸುವ ಮೂಲಕ ರಾಜ್ಯ ಸರ್ಕಾರವು ಸಾಂಕ್ರಾಮಿಕ ರೋಗಗಳನ್ನು ನಿಯಂತ್ರಿಸುವಂತಾಗಲಿ. ಅಗತ್ಯವಿದ್ದರೆ ಉತ್ತರ ಕರ್ನಾಟಕ ಭಾಗದಲ್ಲಿ ಮತ್ತೊಂದು ಕೇಂದ್ರವನ್ನು ಸ್ಥಾಪಿಸಲಿ.
