ನವದೆಹಲಿ: ಮಧ್ಯ ಪ್ರದೇಶದ ಉಜ್ಜಯಿನಿಯಲ್ಲಿರುವ ಮಹಾಕಾಲೇಶ್ವರ ದೇವಾಲಯ ಕಾರಿಡಾರ್ ಅಭಿವೃದ್ಧಿ ಭಾಗವಾದ ‘ಶ್ರೀ ಮಹಾಕಾಲ ಲೋಕ’ದ ಮೊದಲ ಹಂತವನ್ನು ಪ್ರಧಾನಿ ನರೇಂದ್ರ ಮೋದಿ ಮಂಗಳವಾರ ಉದ್ಘಾಟಿಸಲಿದ್ದಾರೆ. ಇದು 856 ಕೋಟಿ ರೂಪಾಯಿ ವೆಚ್ಚದ 900 ಮೀಟರ್ನ ಯೋಜನೆಯಾಗಿದೆ. ಈ ಯೋಜನೆಯಲ್ಲಿ ಎರಡು ಭವ್ಯ ಹೆಬ್ಬಾಗಿಲುಗಳು, ಮರಳುಗಲ್ಲಿನಲ್ಲಿ ಕೆತ್ತಿದ ಸಾಲಂಕೃತ ಕಂಬಗಳಿಂದ ಮಾಡಿದ ಕಂಬಸಾಲುಗಳು, ನಯನಮನೋಹರ ಕಾರಂಜಿಗಳು, ಶಿವಪುರಾಣದ ಕಥೆಗಳನ್ನು ಬಿಂಬಿಸುವ ಭಿತ್ತಿಚಿತ್ರ, 108 ಶಿವತಾಂಡವದ ಚಿತ್ರವಿರುವ ಸ್ತಂಭ ಮೊದಲಾದವು ಪ್ರಮುಖ ಆಕರ್ಷಣೆ ಆಗಿದೆ. ಮುಂದಿನ ಹಂತದಲ್ಲಿ ಸೃಷ್ಟಿ, ಗಣೇಶನ ಹುಟ್ಟು, ಸತಿ ಮತ್ತು ದಕ್ಷ ಮುಂತಾದವರ ಕಥೆಗಳನ್ನೂ ಚಿತ್ರಿಸಲು ಯೋಜಿಸಲಾಗಿದೆ.
