ಅಷ್ಟೇ ಅಲ್ಲ ಸೃಷ್ಟಿ, ಸ್ಥಿತಿ, ಲಯಕಾರ್ಯಗಳಲ್ಲಿ ತ್ರಿಮೂರ್ತಿಗಳಿಗೆ ತಾಯಿ ಯಾಗಿ ಅನುಗ್ರಹಿಸಿದ್ದಾಳೆ. ನಂತರ ಮಡದಿಯಾಗಿ ಬ್ರಹ್ಮನಿಗೆ ಸರಸ್ವತಿ ಕೇಳಿದಳಂತೆ, ‘ಸ್ವಾಮಿ ! ನೀವು ಸೃಷ್ಟಿಕಾರ್ಯದಲ್ಲಿ ತೊಡಗಿ ನನ್ನನ್ನು ಮರೆತೇ ಬಿಡುತ್ತೀರೋ ಏನೋ, ಆದ್ದರಿಂದ ಸದಾಕಾಲ ನಾನೂ ನಿಮ್ಮ ಜೊತೆಗೇ ಇರುತ್ತೇನೆ, ಜೊತೆಗೂಡಿಯೇ ಸಂಚರಿಸೋಣ’ ಎಂದು. ಅದಕ್ಕೆ ಬ್ರಹ್ಮ ಹೇಳಿದ : ‘ಬೇಡ ನಾನೊಬ್ಬನೇ ಸೃಷ್ಟಿಯ ಕಾರ್ಯ ನಿರ್ವಹಿಸುತ್ತೇನೆ. ನಿನ್ನನ್ನೂ ಕಟ್ಟಿಕೊಂಡು ನಾನೆಲ್ಲಿ ಅಡ್ಡಾಡಲಿ? ಹಿಂದಿಂದೇ ನೀನು ಅಡ್ಡಾಡಹತ್ತಿದರೆ ಮೂರು ಲೋಕ ಏನೆಂದೀತು?’, ಆಗ ನಸುಕೋಪಗೊಂಡ ಸರಸ್ವತಿ, ‘ಸ್ವಾಮಿ! ನಿಮಗೆ ಹೀಗೆ ಭಯ, ನಾಚಿಕೆ ಉಂಟಾದರೆ ನಾನು ಯಾರಿಗೂ ಕಾಣ ದಂತೆ ನಿಮ್ಮ ನಾಲಿಗೆ ಮೇಲೆ ಕುಳಿತುಬಿಡುತ್ತೇನೆ, ಒಪ್ಪಿಗೆಯೇ?’ ಎಂದಳು, ಬ್ರಹ್ಮನು ಮೌನವಾಗಿ ಒಪ್ಪಿಗೆ ಸೂಚಿಸಿದ. (ಬ್ರಹ್ಮನ ನಾಲಿಗೆ ಮುದ್ರಿಸಿದವಳು ಈ ಪರಾಶಕ್ತಿ) ಅವನ ನಾಲಿಗೆಯನ್ನೇ ಆಸನ ಮಾಡಿಕೊಂಡಳು.
