ಲಾಕ್​ಡೌನ್​ ಮೇ 31ರವರೆಗೆ ಮುಂದುವರಿಯುವ ಸಾಧ್ಯತೆ! ಸುಳಿವು ಬಿಟ್ಟುಕೊಟ್ಟ ಆರೋಗ್ಯ ಸಚಿವರು

ಮುಂಬೈ: ದೇಶಾದ್ಯಂತ ಕರೊನಾ ಸೋಂಕಿತರ ಸಂಖ್ಯೆ ಹಿನ್ನೆಲೆಯಲ್ಲಿ ಹಲವು ರಾಜ್ಯಗಳು ಲಾಕ್​ಡೌನ್​ ಘೋಷಣೆ ಮಾಡಿಕೊಂಡಿವೆ. ಅದರಂತೆ ಮಹಾರಾಷ್ಟ್ರದಲ್ಲೂ ಲಾಕ್​ಡೌನ್​ ಜಾರಿಯಲ್ಲಿದೆ. ಈ ಲಾಕ್​ಡೌನ್​ ಈ ತಿಂಗಳ ಅಂತ್ಯದವರೆಗೂ ಮುಂದುವರಿಯಬಹುದು ಎಂದು ಮಹಾರಾಷ್ಟ್ರದ ರಾಜ್ಯ ಸಚಿವರು ತಿಳಿಸಿದ್ದಾರೆ.

ಕರೊನಾ ಸೋಂಕಿನ ವಿಚಾರದಲ್ಲಿ ಮಹಾರಾಷ್ಟ್ರದಲ್ಲಿ ಆಗಾಗ ಕ್ಯಾಬಿನೆಟ್​ ಸಭೆ ನಡೆಸಲಾಗುತ್ತಿದೆ. ಅದರಂತೆ ಬುಧವಾರದಂದೂ ಸಭೆ ನಡೆದಿದ್ದು, ಅದರಲ್ಲಿ ಲಾಕ್​ಡೌನ್​ ವಿಚಾರವಾಗಿ ಮತ್ತೆ ಚರ್ಚೆಯಾಗಿದೆ. ಬಹುತೇಕರು ಲಾಕ್​ಡೌನ್​ ವಿಸ್ತರಣೆ ಅತ್ಯಗತ್ಯ ಎನ್ನುವ ಸಲಹೆ ನೀಡಿದ್ದಾರೆ. ಎಲ್ಲರ ಸಲಹೆಯನ್ನು ಪರಿಗಣಿಸಿ ರಾಜ್ಯ ಸರ್ಕಾರವು ಲಾಕ್​ಡೌನ್​ ಅನ್ನು ಮೇ 31ರವರೆಗೆ ಮುಂದುವರಿಸುವ ಸಾಧ್ಯತೆಯಿದೆ ಎಂದು ಆರೋಗ್ಯ ಸಚಿವ ರಾಜೇಶ್​ ತೋಪೆ ತಿಳಿಸಿದ್ದಾರೆ.

ಮಹಾರಾಷ್ಟ್ರದಲ್ಲಿ ಇಂದು 46,781 ಪ್ರಕರಣ ದಾಖಲಾಗಿದ್ದರೆ 816 ಮಂದಿ ಸೋಂಕಿಗೆ ಬಲಿಯಾಗಿದ್ದಾರೆ. ಪಾಸಿಟಿವಿಟಿ ಪ್ರಮಾಣ ಶೇ. 17.36ರಷ್ಟಿದ್ದರೆ ಮರಣ ಪ್ರಮಾಣ ಶೇ. 1.49ರಷ್ಟಿದೆ ಎಂದು ಆರೋಗ್ಯ ಸಚಿವಾಲಯ ಮಾಹಿತಿ ನೀಡಿದೆ. (ಏಜೆನ್ಸೀಸ್)

https://www.vijayavani.net/why-water-the-crop-early-in-the-morning/