ತುಮಕೂರಿನಲ್ಲಿ ಇತ್ತೀಚೆಗೆ ಇಂಜಿನಿಯರಿಂಗ್ ವಿದ್ಯಾರ್ಥಿನಿಯೊಬ್ಬಳು ಕೆರೆಯೊಂದರ ಬಳಿ ಸೆಲ್ಪಿ ತೆಗೆದುಕೊಳ್ಳಲು ಹೋಗಿ ಕಾಲುಜಾರಿ ಬಂಡೆಗಲ್ಲಿನ ಕೊರಕಲಿನಲ್ಲಿ ಬಿದ್ದು 12 ಗಂಟೆಗಳ ಬಳಿಕ ರಕ್ಷಣೆಯಾದ ಘಟನೆ ನಡೆದಿದೆ. ಇತ್ತೀಚಿನ ದಿನಗಳಲ್ಲಿ ಸೆಲ್ಪಿ ಫೋಟೋಗೋಸ್ಕರ ವಿದ್ಯಾರ್ಥಿಗಳು, ಯುವಜನರು ಈ ರೀತಿಯ ದುಸ್ಸಾಹಸ ಮಾಡುವುದು ಹೆಚ್ಚಾಗಿದೆ. ಇದರಿಂದ ಜೀವಕ್ಕೆ ಆಗುವ ಅಪಾಯವನ್ನೂ ಅವರು ಲೆಕ್ಕಿಸುತ್ತಿಲ್ಲ ಎಂಬುದು ಕಳವಳಕಾರಿ ಸಂಗತಿಯೇ ಹೌದು. ಪ್ರವಾಸಿತಾಣಗಳಿಗೆ ಭೇಟಿ ನೀಡುವುದು ಮನಸ್ಸಿನ ಆಹ್ಲಾದಕ್ಕಾಗಿ. ದೈನಂದಿನ ಒತ್ತಡದ ಬದುಕಿನಿಂದ ಒಂದಿಷ್ಟು ಸಮಯ ಹೊರಬಂದು, ಸಂತೋಷದ ಕ್ಷಣಗಳನ್ನು ಕಳೆಯಲು. ಸಂತೋಷದ ಸಮಯ ಕೇವಲ ಸೆಲ್ಪಿಗಳಲ್ಲಿ ಅಡಗಿಲ್ಲ. ನಿಸರ್ಗದೊಂದಿಗೆ ಒಂದಾಗುವ, ಪ್ರಕೃತಿಯ ಕೌತುಕಗಳನ್ನು ಅರಿಯುವ, ಅಲ್ಲಿನ ಬೆರಗುಗಳನ್ನು ತಿಳಿಯುವ, ಹೊಸ ಸಂಗತಿಗಳನ್ನು ಅರ್ಥೈಸಿಕೊಳ್ಳುವ ಅವಕಾಶವನ್ನು ನಮಗೆ ಪ್ರವಾಸ ಒದಗಿಸಿಕೊಡುತ್ತದೆ. ಆದರೆ, ಇತ್ತೀಚಿನ ದಿನಗಳಲ್ಲಿ ಯುವ ಮನಸ್ಸುಗಳು ಈ ಎಲ್ಲ ವೈಶಿಷ್ಟ್ಯಗಳಿಂದ ವಿಮುಖರಾಗಿ, ಕೇವಲ ಕ್ಷಣಿಕ ಸಂತೋಷಕ್ಕಾಗಿ ಹಾತೊರೆಯುತ್ತಿರುವುದು ಸೂಕ್ತವಲ್ಲ.
