ರಾಜ್ಯದಲ್ಲಿ ಎರಡು ವರ್ಷಗಳ ಹಿಂದೆ ಕಾಂಗ್ರೆಸ್ ಸರ್ಕಾರ ಅಧಿಕಾರ ವಹಿಸಿಕೊಂಡ ಆರಂಭದಲ್ಲಿ, 4ಜಿ ವಿನಾಯಿತಿ ಪಡೆಯುವ ಮೂಲಕ ವ್ಯವಸ್ಥಿತವಾಗಿ ಹಸ್ತಕ್ಷೇಪ ನಡೆಸಲಾಗುತ್ತಿದ್ದುದನ್ನು ಹಣಕಾಸು ಇಲಾಖೆ ಜವಾಬ್ದಾರಿ ಹೊತ್ತ ಮುಖ್ಯಮಂತ್ರಿ ಸಿದ್ದರಾಮಯ್ಯ ಗಂಭೀರವಾಗಿ ಪರಿಗಣಿಸಿ ಮುಲಾಜಿಲ್ಲದೇ ಬ್ರೇಕ್ ಹಾಕಿದ್ದರು. ಆದರೆ, ಈಗ ‘ನುಸುಳುಕೋರರು’ ಬೇರೆ ಸ್ವರೂಪದಲ್ಲಿ ತಮ್ಮ ಕಾರ್ಯಚಟುವಟಿಕೆ ನಡೆಸುತ್ತಿರುವುದು ಸೋಜಿಗವೇ ಸರಿ. ಆಯಕಟ್ಟಿನ ಹುದ್ದೆಯಲ್ಲಿರುವ ಕೆಲವು ಅಧಿಕಾರಿಗಳು ತಮ್ಮ ಸಂಬಂಧಿಗಳ ಕಂಪನಿಗಳಿಗೆ ಆದ್ಯತೆ ನೀಡಿ ಗುತ್ತಿಗೆ, ಸೇವೆ ಸಿಗುವಂತೆ ಮಾಡುತ್ತಿರುವುದು ಈಗ ಗುಟ್ಟಾಗಿ ಉಳಿದಿಲ್ಲ. ವಸ್ತುಗಳ ಖರೀದಿ, ಸೇವೆ, ನಿರ್ಮಾಣ ಕಾಮಗಾರಿ ಹೀಗೆ ಸರ್ಕಾರದ ಹಣದ ಹರಿವಿನ ಪ್ರಮುಖ ಸೆಲೆಯನ್ನು ಕೆಲವು ಅಧಿಕಾರಿಗಳು ತಮ್ಮ ಪಾಲಿನ ಕಾಮಧೇನು, ಕಲ್ಪವೃಕ್ಷ ಮಾಡಿಕೊಳ್ಳುವ ಹಪಹಪಿಗೆ ಬಿದ್ದಿದ್ದಾರೆ. ನೂರೆಂಟು ಉದಾಹರಣೆಗಳು ಕಣ್ಣಮುಂದೆ ಕಾಣಿಸುತ್ತಿವೆ.
