ಸುಪ್ರೀಂಕೋರ್ಟ್ನಲ್ಲಿ ನ್ಯಾಯದೇವತೆಯ ನೂತನ ವಿಗ್ರಹವನ್ನು ಬುಧವಾರ (ಅ.16) ಅನಾವರಣಗೊಳಿಸಲಾಯಿತು. ನ್ಯಾಯದೇವತೆ ಅಂದಾಗಲೇ ಕಣ್ಣಿಗೆ ಕಪ್ಪು ಬಟ್ಟೆ ಕಟ್ಟಿರುವ ಚಿತ್ರಣ ಇಷ್ಟು ದಿನ ನಮ್ಮ ಕಣ್ಣ ಮುಂದೆ ಬರುತ್ತಿತ್ತು. ಆದರೆ, ಈಗ ನ್ಯಾಯದೇವತೆ ಕಣ್ಣು ತೆರೆದಿದ್ದಾಳೆ. ಹೌದು, ಹೊಸದಾಗಿ ಅನಾವರಣಗೊಂಡ ವಿಗ್ರಹದಲ್ಲಿ ನ್ಯಾಯದೇವತೆಯ ಕಣ್ಣಿಗೆ ಯಾವುದೇ ಬಟ್ಟೆಯನ್ನು ಕಟ್ಟಲಾಗಿಲ್ಲ. ಅಲ್ಲದೆ, ಕೈಯಲ್ಲಿ ಖಡ್ಗದ ಬದಲಿಗೆ ಸಂವಿಧಾನವನ್ನು ಹಿಡಿದಿದ್ದಾಳೆ. ದೇಶದಲ್ಲಿ ಕಾನೂನು ಕುರುಡಾಗಿಲ್ಲ ಮತ್ತು ತಪ್ಪು ಮಾಡಿದವರಿಗೆ ಖಂಡಿತ ಶಿಕ್ಷೆಗೆ ಅವಕಾಶವಿದೆ ಎಂಬ ಸಂದೇಶವನ್ನು ಸಾರಲು ಸುಪ್ರೀಂಕೋರ್ಟ್ನ ನ್ಯಾಯಮೂರ್ತಿಗಳ ಗ್ರಂಥಾಲಯದಲ್ಲಿ ಈ ವಿಗ್ರಹವನ್ನು ಸ್ಥಾಪಿಸಲಾಗಿದೆ.
