ಹವಾಮಾನ ವೈಪರಿತ್ಯದಿಂದ ಜನರ ಆರೋಗ್ಯದ ಮೇಲಾಗುವ ದುಷ್ಪರಿಣಾಮಗಳ ಕುರಿತು ವೈದ್ಯರಿಗೆ ಮಾಹಿತಿ ಕೊರತೆ ಇದ್ದು, ಅದರಲ್ಲೂ ಮಕ್ಕಳ ತಜ್ಞರು ಈ ವಿಚಾರದಲ್ಲಿ ತೀರಾ ಹಿಂದೆ ಉಳಿದಿದ್ದಾರೆ. ರೋಗ ಪತ್ತೆ ಮತ್ತು ಚಿಕಿತ್ಸೆ ವಿಚಾರದಲ್ಲಿ ವೈದ್ಯರ ತಿಳುವಳಿಕೆ ಮಟ್ಟ ಅರಿಯಲು ವಿಶ್ವ ಆರೋಗ್ಯ ಸಂಸ್ಥೆ ಹಾಗೂ ಜಾರ್ಜ್ ಮೇಸನ್ ಯೂನಿವರ್ಸಿಟಿ ಸಹಯೋಗದಲ್ಲಿ ಭಾರತ ಸೇರಿ 5 ದೇಶಗಳಲ್ಲಿ ನಡೆಸಲಾದ ಸಮೀಕ್ಷೆಯಲ್ಲಿ ಈ ಅಂಶ ಬೆಳಕಿಗೆ ಬಂದಿದೆ. ಈ ಸಮೀಕ್ಷೆಗಾಗಿ ಪರಿಸರ ಮಾಲಿನ್ಯ, ವಾಯು ಮಾಲಿನ್ಯ, ಜಾಗತಿಕ ತಾಪಮಾನದಿಂದ ಹವಾಮಾನ ಬದಲಾವಣೆ ಆಗುತ್ತಿತ್ತು, ಇದರಿಂದ ಆರೋಗ್ಯದ ಮೇಲಾಗುವ ಪರಿಣಾಮಗಳ ಕುರಿತಾಗಿ ಬಹು ಆಯ್ಕೆಯ ಉತ್ತರ ಇರುವ (Objectives questions) 75 ಪ್ರಶ್ನೆಗಳನ್ನು ಸಿದ್ಧಪಡಿಸಲಾಗಿತ್ತು. ಅವುಗಳನ್ನು ಇ-ಮೇಲ್ ಮೂಲಕ ದೇಶದ 9 ಸಾವಿರ ವೈದ್ಯರಿಗೆ ಕಳುಹಿಸಲಾಗಿತ್ತು. ಆದರೆ ಅವುಗಳಿಗೆ ಉತ್ತರ ನೀಡಿದವರು ಕೇವಲ 380 (ಶೇ. 4.5) ವೈದ್ಯರು ಮಾತ್ರ. ಉಳಿದವರು ಐದು ಬಾರಿ ನೆನಪು ಮಾಡಿದರೂ ಪ್ರತಿಕ್ರಿಯೆ ನೀಡುವ ಪ್ರಯತ್ನ ಮಾಡಲಿಲ್ಲ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಭಾರತದ ಸಂಚಾಲಕರು ಹಾಗೂ ಐಐಎಸ್ಸಿ (ದಿವೇಚಾ ಸೆಂಟರ್ ಕ್ಲೈಮೆಟ್ ಚೇಂಜ್) ಪ್ರೊ. ಡಾ. ಎಚ್. ಪರಮೇಶ್ ತಿಳಿಸಿದ್ದಾರೆ.
