ಭ್ರಷ್ಟಾಚಾರ ನಿಯಂತ್ರಣದ ಬಗ್ಗೆ ಪುಂಖಾನುಪುಂಖ ಆಶ್ವಾಸನೆಗಳನ್ನು ನಮ್ಮ ರಾಜಕೀಯ ನೇತಾರರು, ಸರ್ಕಾರದಲ್ಲಿರುವ ಪ್ರಮುಖರು ನೀಡುತ್ತಲೇ ಇರುತ್ತಾರೆ. ಆದರೆ, ವಾಸ್ತವ ಪರಿಸ್ಥಿತಿ ಏನಿದೆ? ಆಡಳಿತ ಸುಧಾರಣೆಯ ಕುರಿತಂತೆ ಆದರ್ಶದ ಮಾತುಗಳನ್ನಾಡಿದರೂ, ಸರ್ಕಾರಿ ಕಚೇರಿಗಳಲ್ಲಿ ಲಂಚ ನೀಡದೆ ಜನಸಾಮಾನ್ಯರ ಕೆಲಸಗಳೇ ಆಗದಂಥ ಸ್ಥಿತಿ ಇದೆ. ಇದರಿಂದ ಶ್ರೀಸಾಮಾನ್ಯರು ರೋಸಿಹೋಗಿರುವುದು ಒಂದು ಕಡೆಯಾದರೆ, ಭ್ರಷ್ಟಾಚಾರಿಗಳ ಹೆಡೆಮುರಿ ಕಟ್ಟಬೇಕಾದ ಸಂಸ್ಥೆ ಅಥವಾ ಸಂಬಂಧಿತ ವ್ಯವಸ್ಥೆಗಳು ಸೂಕ್ತ ಅಧಿಕಾರ ಇಲ್ಲದೆ ಪರಿತಪಿಸುತ್ತಿವೆ ಎಂಬುದು ಅಪ್ರಿಯ ಸತ್ಯ. ಇದರಿಂದ ಭ್ರಷ್ಟಾಚಾರಿಗಳ ಮನೋಬಲ ಹೆಚ್ಚುತ್ತಿದೆಯೇ ಹೊರತು, ಜನಸಾಮಾನ್ಯರ ಸಂಕಷ್ಟವೇನೂ ಕಡಿಮೆಯಾಗುತ್ತಿಲ್ಲ. ಕಣ್ಣೆದುರಲ್ಲೇ ತಪ್ಪಿತಸ್ಥರನ್ನು ಕಂಡರೂ ಅವರ ವಿರುದ್ಧ ಕ್ರಮ ಕೈಗೊಳ್ಳಲಾಗದಂಥ ಅಸಹಾಯಕತೆ. ಹೀಗೆ ಕಾಟಾಚಾರಕ್ಕೆ ಸೃಜಿಸುವ ಸಂಸ್ಥೆಗಳಿಂದ, ಆಯೋಗಗಳಿಂದ ಹೇಗೆ ತಾನೆ ಸುಧಾರಣೆಯನ್ನು ನಿರೀಕ್ಷಿಸಲು ಸಾಧ್ಯ. ಪ್ರಸಕ್ತ, ಲೋಕಾಯುಕ್ತ ಸಂಸ್ಥೆ ಹೀಗೆ ಹಲ್ಲಿಲ್ಲದ ಹಾವಿನಂತಾಗಿರುವುದು ಶೋಚನೀಯ.
