ಇನ್ನೆರಡು ದಿನ ಗಂಜಿಗೆ ಆಗುವಷ್ಟು ಅಕ್ಕಿ ಇದೆ. ಹೊರಗಡೆ ಏನೂ ಸಿಗುತ್ತಿಲ್ಲ. ನಮ್ಮ ಉಸಿರು ಯಾವಾಗ ನಿಲ್ಲುತ್ತೋ ಎಂಬ ಭಯ ಕಾಡುತ್ತಿದೆ, ದಯವಿಟ್ಟು ನಮ್ಮನ್ನು ತಾಯ್ನಾಡಿಗೆ ಕರೆಯಿಸಿಕೊಳ್ಳಿ’ ಎಂದು ವ್ಯಾಟ್ಸ್ಯಾಪ್ ಮೂಲಕ ತಮ್ಮ ಪರಿಚಯಸ್ಥರಿಗೆ ಅಂಗಲಾಚುತ್ತಿದ್ದಾರೆ. ಸುಡಾನ್ ಫೋರ್ಟ್ ತಲುಪಲಾಗದೇ ಕಾರ್ಟೂಮ್ಲ್ಲಿನ ಕೆನಾನ್ ಸಕ್ಕರೆ ಕಾರ್ಖಾನೆಯಲ್ಲಿ ಸದ್ಯ ಕರ್ನಾಟಕದ ಬೀದರ, ಕಲಬುರಗಿ, ಬಾಗಲಕೋಟೆ ಹಾಗೂ ಬೆಳಗಾವಿಯ 180 ಜನ ಮತ್ತು ಮಹಾರಾಷ್ಟ್ರ, ಉತ್ತರಪ್ರದೇಶ ಹಾಗೂ ಬಿಹಾರ ರಾಜ್ಯಗಳ ಒಟ್ಟು 450 ಜನ ಅಂಗೈಯಲ್ಲಿ ಜೀವ ಹಿಡಿದು ಅಡಗಿ ಕುಳಿತಿದ್ದಾರೆ. ‘ನಮ್ಮನ್ನು ರಕ್ಷಿಸುವಂತೆ ಭಾರತೀಯ ರಾಯಬಾರಿ ಕಚೇರಿ ಸಂರ್ಪಸಿ ಆಪರೇಷನ್ ಕಾವೇರಿಗಾಗಿ ಹೆಸರು ನೋಂದಾಯಿಸಿದ್ದೇವೆ. ಪಾಸ್ಫೋರ್ಟ್ ಸೇರಿ ಎಲ್ಲ ಮಾಹಿತಿ ಸಮೇತ ಅರ್ಜಿ ಸಲ್ಲಿಸಿದ್ದೇವೆ. ಅಧಿಕಾರಿಗಳೂ ಫೋರ್ಟ್ ಸುಡಾನ್ವರೆಗೂ ಬರಲು ಹೇಳುತ್ತಿದ್ದಾರೆ. ಕೆನಾನ್ ಕಂಪನಿಯಿಂದ ಅಲ್ಲಿಗೆ ತಲುಪಲು ಕಾರಿನ ಮೂಲಕ ಹೊರಟರೂ ಆರು ಗಂಟೆ ಪ್ರಯಾಣ ಮಾಡಬೇಕಿದೆ. ಕಂಪನಿಯವರು ಕಳುಹಿಸುವ ವ್ಯವಸ್ಥೆ ಮಾಡುತ್ತಿಲ್ಲ. 1.80 ಲಕ್ಷ ರೂ.ವೆಚ್ಚ ಮಾಡಬೇಕಿದೆ. ಆದರೆ, ಅಷ್ಟು ಹಣ ನಮ್ಮಲ್ಲಿಲ್ಲ. ಮನೆಯಿಂದ ಹಣ ಜಮೆ ಮಾಡಿಸಿಕೊಂಡು ಅದರಿಂದ ಸುಡಾನ್ ಪೌಂಡ್ ನಗದು ಪಡೆಯಬೇಕು ಎಂದರೆ ಯಾವುದೇ ಬ್ಯಾಂಕೂ ತೆರೆಯುತ್ತಿಲ್ಲ’ ಎಂದು ಕಣ್ಣೀರಿಡುತ್ತಿದ್ದಾರೆ. ಈ ಗುರುವಾರ ವಿಜಯವಾಣಿ ಜತೆ ಮಾತನಾಡಿದ ಬೆಳಗಾವಿಯ ಮಮದಾಪುರದ ಮಹಾಂತೇಶ ಮನ್ನಿಕೇರಿ, ‘ನನಗೆ ಮಗ ಹುಟ್ಟಿ 6 ತಿಂಗಳಾಗಿದೆ. ಮಗನ ಮುಖ ನೋಡಿ, ತಾಯ್ನಾಡಿನಲ್ಲಿಯೇ ಜೀವ ಬಿಡುತ್ತೇನೆ ದಯವಿಟ್ಟು ನಮ್ಮನ್ನು ಕರೆಯಿಸಿಕೊಳ್ಳಲು ಸಹಾಯ ಮಾಡಿ’ ಎಂದು ಗೋಗರೆದಿದ್ದಾರೆ.
