ಸನಾತನ ಧರ್ಮದ ವಿರುದ್ಧ ಮಾತನಾಡಿದ್ದಕ್ಕೆ ಕಮಲ್​ ಹಾಸನ್​ಗೆ ಜೀವ ಬೆದರಿಕೆ: ದೂರು ದಾಖಲು! Kamal Haasan

Kamal Haasan : ಸನಾತನ ಧರ್ಮದ ವಿರುದ್ಧ ಮಾತನಾಡಿದ್ದಕ್ಕೆ ರಾಜ್ಯಸಭಾ ಸದಸ್ಯ ಹಾಗೂ ನಟ ಕಮಲ್​ ಹಾಸನ್​ಗೆ ಜೀವ ಬೆದರಿಕೆ ಹಾಕಲಾಗಿದೆ ಎಂದು ಆರೋಪಿಸಿ ಮಕ್ಕಳ್​ ನೀಧಿ ಮೈಯಂ ಪಕ್ಷ ದೂರು ದಾಖಲಿಸಿದೆ.

ಮಕ್ಕಳ್​ ನೀಧಿ ಮೈಯಂ ಪಕ್ಷದ ಸಂಸ್ಥಾಪಕರಾಗಿರುವ ಕಮಲ್​ ಹಾಸನ್​ ಅವರಿಗೆ ಧಾರಾವಾಹಿ ನಟ ರವಿಚಂದ್ರನ್ ಜೀವ ಬೆದರಿಕೆ ಹಾಕಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಈ ಘಟನೆಯ ತನಿಖೆ ನಡೆಸಿ, ಸೂಕ್ತ ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿ ಮಕ್ಕಳ್ ನೀಧಿ ಮೈಯಂ ಪದಾಧಿಕಾರಿಗಳು ಚೆನ್ನೈ ಪೊಲೀಸ್ ಆಯುಕ್ತರಿಗೆ ದೂರು ನೀಡಿದ್ದಾರೆ.

ನಟ ಸೂರ್ಯ ಅವರ ದತ್ತಿ ಸಂಸ್ಥೆ ಅಗರಂ ಫೌಂಡೇಶನ್‌ನ 15ನೇ ವಾರ್ಷಿಕೋತ್ಸವದ ಆಚರಣೆಯಲ್ಲಿ ಕಮಲ್ ಮಾಡಿದ ಕೆಲವು ಹೇಳಿಕೆಗಳು ವಿವಾದಾತ್ಮಕವಾಗಿವೆ. ನೀಟ್ ಪರೀಕ್ಷೆಯನ್ನು ಟೀಕಿಸಿದ ಕಮಲ್ ಹಾಸನ್, ಈ ಯುದ್ಧದಲ್ಲಿ, ಶಿಕ್ಷಣಕ್ಕೆ ಮಾತ್ರ ದೇಶವನ್ನು ಬದಲಾಯಿಸುವ ಶಕ್ತಿ ಇದೆ. ದಬ್ಬಾಳಿಕೆ ಮತ್ತು ಸನಾತನದ ಸರಪಳಿಗಳನ್ನು ಮುರಿಯುವ ಏಕೈಕ ಅಸ್ತ್ರ ಶಿಕ್ಷಣ ಎಂದು ಹೇಳಿದರು.

ಶಿಕ್ಷಣವನ್ನು ಹೊರತುಪಡಿಸಿ ಬೇರೆ ಯಾವುದೇ ಆಯುಧವನ್ನು ನೀವು ತೆಗೆದುಕೊಳ್ಳಬಾರದು ಮತ್ತು ಅಜ್ಞಾನಿ ಬಹುಸಂಖ್ಯಾತರು ನಿಮ್ಮನ್ನು ಸೋಲಿಸುತ್ತಾರೆ ಎಂದು ಕಮಲ್​ ಹಾಸನ್​ ಹೇಳಿದರು.

ಇದನ್ನೂ ಓದಿ: ವೈವಾಹಿಕ ಜೀವನಕ್ಕೆ ಕಾಲಿಡಲು ಸಜ್ಜಾದ ಫುಟ್​ಬಾಲ್​ ತಾರೆ, ಐವರು ಮಕ್ಕಳ ತಂದೆ ರೊನಾಲ್ಡೊ: ಜಾರ್ಜಿನಾಗೆ ಮಾಸಿಕ 1 ಕೋಟಿ ರೂ. ಜೀವನಾಂಶ!

ಕಮಲ್​ ಹಾಸನ್​ ಹೇಳಿಕೆ ಸಂಬಂಧ ನಟ ರವಿಚಂದ್ರನ್ ಯೂಟ್ಯೂಬ್ ಸಂದರ್ಶನದಲ್ಲಿ ಆಕ್ರೋಶ ಹೊರಹಾಕಿದರು. ಕಮಲ್ ಅವರ ಹೇಳಿಕೆ ಸನಾತನ ಧರ್ಮಕ್ಕೆ ಮಾಡಿದ ಅವಮಾನ ಎಂದು ರವಿಚಂದ್ರನ್ ಹೇಳಿದರು. ಅಲ್ಲದೆ, ಜೀವ ಬೆದರಿಕೆ ಸಹ ಹಾಕಿದರು.

ಇನ್ನು ವಿವಾದದ ನಂತರ, ತಮಿಳುನಾಡು ಬಿಜೆಪಿ ರಾಜ್ಯ ಕಾರ್ಯದರ್ಶಿ ಅಮರ್ ಪ್ರಸಾದ್ ರೆಡ್ಡಿ ಅವರು ಕಮಲ್ ಹಾಸನ್ ಅವರ ಎಲ್ಲ ಚಲನಚಿತ್ರಗಳನ್ನು ಬಹಿಷ್ಕರಿಸುವಂತೆ ಕರೆ ನೀಡಿದರು. ಸಾರ್ವಜನಿಕರು ಚಿತ್ರಮಂದಿರಗಳಲ್ಲಿ ಅಥವಾ ಒಟಿಟಿ ವೇದಿಕೆಗಳಲ್ಲಿ ಕಮಲ್​ ಸಿನಿಮಾಗಳನ್ನು ನೋಡಬಾರದು ಎಂದು ಒತ್ತಾಯಿಸಿದರು. ಸನಾತನ ಧರ್ಮವನ್ನು ಅವಮಾನಿಸಿರುವ ನಟನಿಗೆ ತಕ್ಕ "ಪಾಠ ಕಲಿಸಬೇಕು" ಎಂದು ಹೇಳಿದರು. (ಏಜೆನ್ಸೀಸ್​)

https://www.vijayavani.net/interesting-facts-about-the-crow-there-is-a-lot-to-learn-from-this-bird

https://www.vijayavani.net/four-people-suspected-of-being-indians-after-bathing-in-a-lake-in-canada-soap-used-by-a-group-video