ಆದರೆ ಬಹಳಷ್ಟು ಮಂದಿ ಯನ್ನು ಒಂಟಿತನ, ಅನಾಥಪ್ರಜ್ಞೆಯು ಕಾಡುತ್ತಿರುತ್ತದೆ. ಈ ಆಂತರಿಕ ಶೂನ್ಯತೆಯನ್ನು ಕಳೆದುಕೊಳ್ಳಲು ಎಲ್ಲರೊಡನೆಯೂ ಅಳಲನ್ನು ತೋಡಿಕೊಳ್ಳುತ್ತಾರೆ. ಆಲಿಸಿದವರು ಅಯ್ಯೋ ಪಾಪ ಎಂದರೆ ಏನನ್ನೋ ಪಡೆದವರಂತೆ ಸಮಾಧಾನಗೊಳ್ಳುತ್ತಾರೆ. ಲೌಕಿಕ ಜೀವಿತದ ಮೋಹ ಭ್ರಮೆಗಳಲ್ಲಿ ಕಳೆದುಹೋದವರು ಹೀಗೆ ಚಡಪಡಿಸುತ್ತಾರೆ, ತಡಕಾಡುತ್ತಾರೆ. ಬದುಕೆಂದರೆ ಹೋರಾಟ. ಏರಿಳಿತಗಳಿಂದ ಕೂಡಿದ ಬಾಳ ಹಾದಿಯಲ್ಲಿ ಏಳುತ್ತಾ ಬೀಳುತ್ತಾ ನಡೆಯುವುದೇ ಜೀವನಿಗೆ ಶಿಕ್ಷಣ. ಕಾಮ, ಕ್ರೋಧ, ಮೋಹಗಳಿಗೆ ಒಳಗಾದವರಿಗೆ ಜೀವನವು ಕಲಿಸುವ ಅನುಭವದ ಪಾಠವು ಅರ್ಥವಾಗಲಾರದು. ಗಣಿತದ ಸೂತ್ರಗಳನ್ನು ಮಗುವೇ ಬಿಡಿಸಿದರಷ್ಟೇ ಅದಕ್ಕೆ ಸರಿಯಾದ ಕಲಿಕೆ, ಇನ್ಯಾರೋ ಬರೆದರೆ, ಪರಿಹರಿಸಿಕೊಳ್ಳಲು ಸ್ವಯಂ ಮುಂದಾಗದೇ ಇದ್ದರೆ ಗಣಿತ ಪಾಠವು ಕಷ್ವೆನ್ನಿಸುವುದು ಸಹಜ. ಜೀವನದ ಲೆಕ್ಕಾಚಾರಗಳನ್ನು ಸೂಕ್ಷ್ಮವಾಗಿ ಅವಲೋಕಿಸುತ್ತಾ ಅದನ್ನು ಬಿಡಿಸಿಕೊಳ್ಳುವ ಹಂತದಲ್ಲಿ ಅನುಭವವು ವಿಸ್ತರಿಸಿದುದು, ವ್ಯಕ್ತಿತ್ವವು ಉನ್ನತವಾದುದನ್ನು ತಿಳಿದುಕೊಳ್ಳಬೇಕು. ಕಷ್ಟವು ವ್ಯಕ್ತಿಯನ್ನು ದೃಢವಾಗಿಸುತ್ತದೆ. ಆತ್ಮೀಯರನ್ನು ಪರಿಚಯಿಸುತ್ತದೆ. ಬದುಕು ಬಂದಂತೆ ಎದುರುಗೊಳ್ಳುವ ಆತ್ಮವಿಶ್ವಾಸವಿದ್ದರೆ ಸಮಸ್ಯೆಗಳೆಲ್ಲವೂ ಅವಕಾಶಗಳಾಗುತ್ತವೆ. ಹಗುರವಾಗಿ ಬಾಳುವುದು ಸಾಧ್ಯವಾಗುತ್ತದೆ.
