ಹಲವು ಆಕರ್ಷಣೆ, ವೈವಿಧ್ಯಗಳೊಂದಿಗೆ ನೆರೆದ ಬದುಕು ಎಂಬ ಸಂತೆ ಹೊಕ್ಕವನು, ಅಲ್ಲಿನ ಸುಖ-ಸೊಬಗುಗಳಿಗೆ ಮರುಳಾಗಿ ಬಂದ ಉದ್ದೇಶವನ್ನೇ ಮರೆಯುತ್ತಾನೆ. ಸಂತೆಯೊಳಗಿನ ಹಲವು ಬಗೆಯ ಅಂದ-ಚಂದದ ನೋಟ, ಸುಖ-ಭೋಗಗಳಲ್ಲಿ ಮೈಮರೆತು ವಿಹರಿಸುತ್ತಾನೆ. ಬಯಕೆಗಳು ಈಡೇರಿದ ಮೇಲೆ ಅವನೇನೂ ಸಂತೃಪ್ತನಾಗುವುದಿಲ್ಲ. ಇನ್ನೇನು ಹೊಸದಿದೆ ಎಂದು ಬೆದಕಾಡುತ್ತಾನೆ. ಪಡೆದಷ್ಟೂ ಬೇಕೆನಿಸುವ ಚಪಲದಿಂದ ವ್ಯರ್ಥವಾಗಿ ಅಲೆದಾಡುತ್ತಾನೆ. ಆತನೊಂದಿಗೆ ಹಲವರು ಯಾವ್ಯಾವುದೋ ಕಾರಣಕ್ಕೆ ಜತೆಗೂಡುತ್ತಾರೆ, ಪ್ರೀತಿ ತೋರುತ್ತಾರೆ, ಇನ್ಯಾರೋ ಎಳೆದಾಡುತ್ತಾರೆ, ಹಗೆ ಸಾಧಿಸುತ್ತಾರೆ. ನಗು, ಅಳು, ಕೋಪ, ಮುಂತಾದ ಭಾವಗಳನ್ನು ಎದುರಿಸುತ್ತ ಕಾಲ ಕಳೆಯುತ್ತಾನೆ. ಎಷ್ಟೋ ಸಲ ಪರಿಚಿತರು ಅಪರಿಚಿತರಂತೆ ಸರಿದುಹೋಗುತ್ತಾರೆ, ಇನ್ಯಾರೋ ಆತ್ಮೀಯರಾಗುತ್ತಾರೆ. ಕಸಿಯುವ, ಬೆಸೆಯುವ, ಸಹಿಸುವ ಪ್ರಕ್ರಿಯೆಯೊಳಗೆ ಅನಾಥನಂತೆ ತಿರುಗುತ್ತ ಒಂದು ದಿನ ಇದ್ದಕ್ಕಿದ್ದಂತೆ ಕಣ್ಮರೆಯಾಗುತ್ತಾನೆ.
