ಕೈತಪ್ಪಿದ ಮಧ್ಯಪ್ರದೇಶ?: ಜ್ಯೋತಿರಾದಿತ್ಯ ಸಿಂಧಿಯಾ ಜತೆ 22 ಕಾಂಗ್ರೆಸ್ ಶಾಸಕರು ರಾಜೀನಾಮೆ

ನವದೆಹಲಿ: ಯುವ ನಾಯಕತ್ವವನ್ನು ಮುನ್ನೆಲೆಗೆ ತರಲು ನಿರಾಸಕ್ತಿ ವಹಿಸಿದ್ದಕ್ಕೆ ಭಾರೀ ಬೆಲೆ ತೆರುತ್ತಿರುವ ಕಾಂಗ್ರೆಸ್ ಮಧ್ಯಪ್ರದೇಶದಲ್ಲಿ ಅಧಿಕಾರವನ್ನು ಕಳೆದುಕೊಳ್ಳುವುದು ಬಹುತೇಕ ನಿಶ್ಚಿತವಾಗಿದೆ. 2018ರ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿಗಿಂತ ಹೆಚ್ಚು ಸ್ಥಾನ ಗಳಿಸಿ ಸರ್ಕಾರ ರಚಿಸಿದ್ದ ಕಾಂಗ್ರೆಸ್ ಸಿಎಂ ಕಮಲ್​ನಾಥ್ ಮತ್ತು ಮಾಜಿ ಸಿಎಂ ದಿಗ್ವಿಜಯ ಸಿಂಗ್​ರಂಥ ಪಟ್ಟಭದ್ರರ ಹಿತಾಸಕ್ತಿ ಬೆಂಬಲಿಸಿದ ಪರಿಣಾಮ ಮೂಲೆಗುಂಪಾಗಿದ್ದ ಮಾಸ್​ಲೀಡರ್ ಜ್ಯೋತಿರಾದಿತ್ಯ ಸಿಂಧಿಯಾ ಪಕ್ಷ ತೊರೆದು ಬಿಜೆಪಿಯತ್ತ ಹೆಜ್ಜೆ ಹಾಕಿದ್ದಾರೆ. ಅವರನ್ನು ಅನುಸರಿಸಿ ಕಾಂಗ್ರೆಸ್​ನ 22 ಶಾಸಕರು ಸಹ ರಾಜೀನಾಮೆ ಸಲ್ಲಿಸುವುದರೊಂದಿಗೆ ಕಮಲ್​ನಾಥ್ ಸರ್ಕಾರ ಬಹುಮತ ಕಳೆದುಕೊಂಡಿದೆ.

ಹಸ್ತವ್ಯಸ್ತ: ರಾಜ್ಯ ನಾಯಕರ ಕಡೆಗಣನೆ ಹಾಗೂ ನಿಷ್ಕ್ರಿಯ ಹೈಕಮಾಂಡ್​ನಿಂದಾಗಿ ಬೇಸತ್ತಿದ್ದ ಸಿಂಧಿಯಾ ಪಕ್ಷದ ಅಧ್ಯಕ್ಷೆ ಸೋನಿಯಾ ಗಾಂಧಿಯವರಿಗೆ ರಾಜೀನಾಮೆ ಪತ್ರ ರವಾನಿಸಿದ್ದರು.

ಇದರ ಬೆನ್ನಲ್ಲೇ ಸೋಮವಾರ ಎಚ್ಚೆತ್ತುಕೊಂಡ ದಿಲ್ಲಿ ಮುಖಂಡರು ರಾಜ್ಯ ಕಾಂಗ್ರೆಸ್ ಅಧ್ಯಕ್ಷ ಸ್ಥಾನ ನೀಡುವ ಭರವಸೆ ನೀಡಿದ್ದರು. ಆದರೆ, ಕಾಂಗ್ರೆಸ್ ಜತೆಗಿನ ಸಂಬಂಧಕ್ಕೆ ಎಳ್ಳುನೀರು ಬಿಡಲು ಅದಾಗಲೇ ತೀರ್ವನಿಸಿದ್ದ ಸಿಂಧಿಯಾ ತಮ್ಮ ನಿಲುವು ಬದಲಿಸಲಿಲ್ಲ. ಇನ್ನೊಂದೆಡೆ ಕಮಲ್ ನಾಥ್​ರನ್ನು ದೆಹಲಿಗೆ ಕರೆಸಿಕೊಂಡ ಸೋನಿಯಾ ಸರ್ಕಾರ ಉಳಿಸುವ ಬಗ್ಗೆ ರ್ಚಚಿಸಿದ್ದರು. ಆದರೆ, ಪಕ್ಷದ 18 ಶಾಸಕರು ಬಂಡೆದ್ದು ಬೆಂಗಳೂರಿಗೆ ತೆರಳಿದ್ದಾರೆ ಎಂಬ ಸುದ್ದಿ ಖಚಿತಪಡುತ್ತಿದ್ದಂತೆಯೇ ಕಮಲ್ ನಾಥ್ ದಿಲ್ಲಿ ಪ್ರವಾಸ ಮೊಟಕುಗೊಳಿಸಿ ಭೋಪಾಲ್​ಗೆ ಮರಳಿದ್ದರು.

ಆಂತರಿಕ ತಿಕ್ಕಾಟದ ಪರಿಣಾಮ

ನಾಲ್ವರು ಪಕ್ಷೇತರರು ಮತ್ತು ಎಸ್ಪಿ-ಬಿಎಸ್ಪಿಯ ಶಾಸಕರ ಬೆಂಬಲ ಗಳಿಸಿ ಸರ್ಕಾರ ರಚಿಸಿದ್ದ ಕಾಂಗ್ರೆಸ್​ಗೆ ಐದು ವರ್ಷಗಳ ಕಾಲ ಆಡಳಿತ ನಡೆಸುವ ಅವಕಾಶವಿತ್ತು. ಆದರೆ, ರಾಜ್ಯ ನಾಯಕರ ನಡುವಿನ ಸಮನ್ವಯದ ಕೊರತೆ ಹಾಗೂ ಸಿಂಧಿಯಾ ವರ್ಚಸ್ಸಿಗೆ ಮಾನ್ಯತೆ ನೀಡುವಲ್ಲಿ ಸೋನಿಯಾ ಗಾಂಧಿ-ರಾಹುಲ್ ಗಾಂಧಿ ಎಡವಿದ್ದೇ ಪಕ್ಷ ಮತ್ತು ಸರ್ಕಾರದ ಈ ದುಸ್ಥಿತಿಗೆ ಕಾರಣ.

ಲಾಭ, ನಷ್ಟದ ಲೆಕ್ಕಾಚಾರ

• 2019ರ ಲೋಕಸಭೆ ಚುನಾವಣೆಯಲ್ಲಿ ಸಿಂಧಿಯಾ ಸೋತಿದ್ದರೂ ರಾಜ್ಯಾದ್ಯಂತ ಅವರನ್ನು ಬೆಂಬಲಿಸುವ ಯುವ ಕಾರ್ಯಕರ್ತ ಪಡೆ ದೊಡ್ಡ ಸಂಖ್ಯೆಯಲ್ಲಿದೆ
• ಸಿಂಧಿಯಾ ವರ್ಚಸ್ಸು, ಅನುಭವ ಬಿಜೆಪಿಗೆ ಲಾಭವಾಗುವ ಸಾಧ್ಯತೆ
• ಸಿಂಧಿಯಾ ಕಳೆದುಕೊಂಡಿದ್ದು ಕಾಂಗ್ರೆಸ್​ಗೆ ಭಾರಿ ನಷ್ಟ
• ಯುವ ನಾಯಕತ್ವಕ್ಕೆ ಹೊಸಬರನ್ನು ಹುಡುಕುವ ಸವಾಲು
• ಸಿಂಧಿಯಾ ಜತೆಗೆ ಅವರ ಅಪಾರ ಬೆಂಬಲಿಗರ ಶಕ್ತಿ ಕೈತಪ್ಪಿದೆ

ಸೋಮವಾರವೇ ರಾಜೀನಾಮೆ

ಕಾಂಗ್ರೆಸ್ ನಾಯಕರ ಮನವಿಯಂತೆ ಸಿಂಧಿಯಾ ಮಂಗಳವಾರದ ತನಕ ತಮ್ಮ ರಾಜೀನಾಮೆ ಬಹಿರಂಗಗೊಳಿಸಿರಲಿಲ್ಲ. ಆದರೆ, ಮಂಗಳವಾರ ಬೆಳಗ್ಗೆ ಪ್ರಧಾನಿ ನರೇಂದ್ರ ಮೋದಿ ಮತ್ತು ಗೃಹ ಸಚಿವ ಅಮಿತ್ ಷಾರನ್ನು ದೆಹಲಿಯಲ್ಲಿ ಭೇಟಿ ಮಾಡಿದ ಕೂಡಲೇ ಟ್ವಿಟ್ಟರ್​ನಲ್ಲಿ ರಾಜೀನಾಮೆ ಪತ್ರ ಪ್ರಕಟಿಸಿದರು. ರಾಜೀನಾಮೆ ಬಗ್ಗೆ ಕಳೆದೊಂದು ವರ್ಷದಿಂದ ಯೋಚಿಸುತ್ತಿದ್ದೆ. ಇದು ನಿಮಗೂ ಗೊತ್ತಿದೆ. ಮೊದಲಿನಿಂದಲೂ ಜನ ಸೇವೆ ಮಾಡುವುದು ನನ್ನ ಆದ್ಯತೆಯಾಗಿತ್ತು. ಆದರೆ ಈ ಪಕ್ಷದಲ್ಲಿದ್ದುಕೊಂಡು ನನ್ನ ಗುರಿ ಸಾಧನೆ ಸಾಧ್ಯವಿಲ್ಲ. ಹೀಗಾಗಿ, ನನ್ನ ಹೊಸ ಹಾದಿ ಕಂಡುಕೊಂಡಿದ್ದೇನೆ ಎಂದು ಉಲ್ಲೇಖಿಸಿದ್ದಾರೆ.

ಸಿಂಧಿಯಾ ಕೈಬಿಟ್ಟಿದ್ದೇಕೆ?

1. ಮುಖ್ಯಮಂತ್ರಿ ಸ್ಥಾನ ಕೈತಪ್ಪಿದ್ದಾಗಲೇ ಅಸಮಾಧಾನ
2. ರಾಜ್ಯಾಧ್ಯಕ್ಷ ಸ್ಥಾನದ ಆಸೆಗೂ ಕಮಲ್​ನಾಥ್ ಅಡ್ಡಗಾಲು
3. ರಾಹುಲ್ ಗಾಂಧಿಗೆ ಆಪ್ತ ನಾದರೂ ಹುದ್ದೆ ಸಿಗದ ನಿರಾಸೆ
4. ರಾಹುಲ್ ಗಾಂಧಿ ಮೀರಿ ಬೆಳೆಯುವ ಭಯದಲ್ಲಿ ನಿರ್ಲಕ್ಷ್ಯ
5. ಮಧ್ಯಪ್ರದೇಶದ ರಾಜ್ಯಸಭೆಯ ಮೂರು ಸ್ಥಾನಗಳ ಚುನಾವಣೆಯಲ್ಲೂ ಕಡೆಗಣನೆ
6. ತನ್ನ ಆಪ್ತನಿಗೆ ಹುದ್ದೆ ಕೊಡಿಸುವಲ್ಲಿ ರಾಹುಲ್ ವೈಫಲ್ಯ

https://www.vijayavani.net/total-congress-mlas-who-have-resigned-to-madhypradesh-congress-are-22-now/

https://www.vijayavani.net/it-is-time-for-me-to-move-on-jyotiradithya-scindia/

https://www.vijayavani.net/19-congress-mlas-tender-their-resignation-to-speaker/