ಕರ್ನಾಟಕ ಅಂಗಡಿಗಳು ಮತ್ತು ವಾಣಿಜ್ಯ ಸಂಸ್ಥೆಗಳ ಕಾಯ್ದೆಗೆ ತಿದ್ದುಪಡಿ ತರುವ ಮೂಲಕ 14 ಗಂಟೆಗಳ ಕೆಲಸದ ದಿನಕ್ಕೆ ಅನುಕೂಲವಾಗುವಂತೆ ಮಾಡುವ ಪ್ರಸ್ತಾವನೆ ಸಿದ್ಧವಾಗಿತ್ತು. ಸಂಪುಟ ಸಭೆಯ ಮುಂದೆಯೂ ಚರ್ಚೆಯಾಗಿ ತಡೆ ಹಿಡಿಯಲಾಗಿತ್ತು. ಆದರೆ ಪುನಃ ಆ ವಿಚಾರ ಮುನ್ನೆಲೆಗೆ ಬಂದಿದ್ದು, ದುಡಿಯುವ ವರ್ಗದ ಮೇಲೆ ದೊಡ್ಡ ದಾಳಿ ಎಂದು ರಾಜ್ಯ ಐಟಿ ಹಾಗೂ ಐಟಿ ಸಂಬಂಧಿತ ಸೇವೆ ನೀಡುವ ನೌಕರರ ಒಕ್ಕೂಟ (ಕೆಐಟಿಯು) ತನ್ನ ಅಸಮಾಧಾನವನ್ನು ಸರ್ಕಾರದ ಬಳಿ ದಾಖಲಿಸಿದೆ. ಇನ್ನೊಂದೆಡೆ ಸರ್ಕಾರದಲ್ಲಿ ಈ ಕಾಯ್ದೆ ಆಗಬೇಕೆಂದು ಬಯಸುವ ಸಚಿವರು ಕೆಲವರಿದ್ದರೆ, ಆಗ ಕೂಡದೆಂದು ಬಲವಾಗಿ ಪ್ರತಿಪಾದಿಸುವವರೂ ಇದ್ದಾರೆ. ಹೀಗಾಗಿ ಸರ್ಕಾರದ ಮಟ್ಟದಲ್ಲಿ ಸಂಕಟ ಶುರುವಾಗಿದೆ.
