ಇಸ್ರೇಲ್ ಮೇಲೆ ಹಮಾಸ್ ಇಪ್ಪತ್ತು ನಿಮಿಷಗಳಷ್ಟು ಕಡಿಮೆ ಆವಧಿಯಲ್ಲಿ ಸುಮಾರು ಏಳುಸಾವಿರ ಕ್ಷಿಪಣಿಗಳ ಮೂಲಕ ದಾಳಿಯೆಸಗಿ, ಗಡಿಯೊಳಗೂ ನುಗ್ಗಿ ಒಂದುಸಾವಿರದ ಇನ್ನೂರರಷ್ಟು ನಾಗರಿಕರನ್ನು ಬರ್ಬರವಾಗಿ ಕೊಂದು, ಇನ್ನೂರೈವತ್ತರಷ್ಟು ಜನರನ್ನು ಬಂಧಿಗಳಾಗಿ ಗಾಝಾದೊಳಕ್ಕೆ ಎಳೆದುಕೊಂಡು ಹೋಗಿ ಇದೇ ಅಕ್ಟೋಬರ್ 7ಕ್ಕೆ ಒಂದು ವರ್ಷವಾಯಿತು. ಅಂದು ಇಸ್ರೇಲಿಗಳಿಗಾದ ಆಘಾತ, ದುಃಖ ಮತ್ತು ಕ್ರೋಧ ಅಭೂತಪೂರ್ವ. ಅವೆಲ್ಲವುಗಳ ಪರಿಣಾಮವಾಗಿ ಅವರಲ್ಲಿ ಉಕ್ಕಿದ ಸೇಡು ಕಳೆದೊಂದು ವರ್ಷದಲ್ಲಿ ಗಾಝಾವನ್ನು ಸರಿಸುಮಾರು ಸ್ಮಶಾನವಾಗಿಸಿದೆ, ಅಲ್ಲಿನ ಸುಮಾರು 42,000 ನಾಗರಿಕರು ಹತರಾಗಿದ್ದಾರೆ, 67% ಕಟ್ಟಡಗಳು ಪೂರ್ಣವಾಗಿ ನೆಲಸಮವಾಗಿವೆ. ಇಸ್ರೇಲಿ ಸೇನೆ ಓ(ಇಸ್ರೇಲಿ ಡಿಫೆನ್ಸ್ ಫೋರ್ಸಸ್, ಐಡಿಎಫ್) ಹೇಳುವ ಪ್ರಕಾರ ಇಪ್ಪತೆôದರಿಂದ ಮೂವತ್ತು ಸಾವಿರದಷ್ಟಿರಬಹುದಾದ ಹಮಾಸ್ ಉಗ್ರಗಾಮಿಗಳಲ್ಲಿ ಹದಿನೇಳು ಸಾವಿರದಷ್ಟನ್ನು ಅದು ಕೊಂದಿದೆ. ಅವರಲ್ಲಿ ಹಮಾಸ್ ನಾಯಕ ಇಸ್ಮಾಯಿಲ್ ಹಾನಿಯೇ ಸೇರಿದಂತೆ ಇಪ್ಪತ್ತೊಂದು ಅತಿಮುಖ್ಯ ನಾಯಕರೂ ಸೇರಿದ್ದಾರೆ. ‘ಪ್ಯಾಲಸ್ಟೀನಿಯನ್ನರ ಸ್ವಾತಂತ್ರ್ಯ ಮತ್ತವರ ನೆಮ್ಮದಿಯ ಬದುಕಿಗಾಗಿ ಹೋರಾಡುತ್ತಿದ್ದೇನೆ’ ಎಂದು ಹೇಳಿಕೊಳ್ಳುವ ಹಮಾಸ್ ಇದುವರೆಗೆ ಸಾಧಿಸಿದ್ದು ಇದು!
