ಖಾನ್ ಯೂನಿಸ್ (ಗಾಜಾ ಪಟ್ಟಿ): ತಾತ್ಕಾಲಿಕ ಕದನ ವಿರಾಮ ಅಂತ್ಯಗೊಂಡ ಶುಕ್ರವಾರವೇ ಗಾಜಾ ಪಟ್ಟಿ ಮೇಲೆ ಆರಂಭಿಸಿದ ಆಕ್ರಮಣವನ್ನು ಇಸ್ರೇಲ್ ಶನಿವಾರ ತೀವ್ರಗೊಳಿಸಿದ್ದು ನಾಗರಿಕರ ಸಾವು ಹೆಚ್ಚಿ ಮಾನವೀಯ ದುರಂತದ ಆತಂಕ ಎದುರಾಗಿದೆ. ಅಲ್ಲಿ ಮಾನವೀಯ ‘ಸುನಾಮಿ’ ಸೃಷ್ಟಿಯಾಗಲಿದೆ ಎಂದು ವಿಶ್ವ ಸಂಸ್ಥೆ ಎಚ್ಚರಿಸಿದೆ. ಸಮರ ಪುನಾರಂಭ ಆದಾಗಿನಿಂದ ಕನಿಷ್ಠ 178 ಪ್ಯಾಲೆಸ್ತೀನಿಯರು ಮೃತಪಟ್ಟಿದ್ದಾರೆ. ಈ ನಡುವೆ, ನಾಗರಿಕರನ್ನು ರಕ್ಷಿಸಲು ಗರಿಷ್ಠ ಪ್ರಯತ್ನ ಮಾಡುವಂತೆ ಮಿತ್ರ ದೇಶ ಇಸ್ರೇಲ್ಗೆ ಅಮೆರಿಕ ಆಗ್ರಹಿಸಿದೆ. ಶುಕ್ರವಾರ ದುಬೈನಲ್ಲಿ ಅರಬ್ ದೇಶಗಳ ವಿದೇಶಾಂಗ ಸಚಿವರೊಂದಿಗೆ ನಡೆಸಿದ ಸಭೆಯ ನಂತರ ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಅಂತೋನಿ ಬ್ಲಿಂಕೆನ್, ಗಾಜಾ ಯುದ್ಧದ ವೇಳೆ ಅಮಾಯಕ ನಾಗರಿಕರ ಪ್ರಾಣ ರಕ್ಷಿಸುವ ಅಗತ್ಯವನ್ನು ಒತ್ತಿ ಹೇಳಿದರು.
