ಆರೋಪ-ಪ್ರತ್ಯಾರೋಪ: ಹಮಾಸ್ ಕದನ ವಿರಾಮ ಉಲ್ಲಂಘಿಸಿದೆ ಎಂದು ಇಸ್ರೇಲ್ ಆರೋಪಿಸಿದ್ದರೆ, ಯುದ್ಧ ಪುನಾರಂಭಕ್ಕೆ ಇಸ್ರೇಲ್ ಹೊಣೆ ಎಂದು ಹಮಾಸ್ ದೂಷಿಸಿದೆ. ಗುರುವಾರ ಮುಗಿಯಬೇಕಿದ್ದ ತಾತ್ಕಾಲಿಕ ಕದನ ನಿಲುಗಡೆ ಒಂದು ದಿನ ವಿಸ್ತರಣೆಯಾಗಿದ್ದು ಅದು ಅಂತ್ಯವಾಗುತ್ತಲೇ ಗಾಜಾ ಮೇಲೆ ಇಸ್ರೇಲ್ ವಿಮಾನಗಳ ಭೋರ್ಗರೆತ ಕೇಳಿಸಿ ಪ್ಯಾಲೆಸ್ತೀನೀಯರ ಆಕ್ರಂದನ ಆರಂಭವಾಗಿದೆ. ದಕ್ಷಿಣ ಗಾಜಾದ ಪೂರ್ವ ಭಾಗದ ಪ್ರದೇಶಗಳಲ್ಲಿ ತೀವ್ರ ಬಾಂಬ್ ದಾಳಿ ನಡೆದಿದ್ದು ಮುಗಿಲೆತ್ತರಕ್ಕೆ ಹೊಗೆ ಎದ್ದಿದ್ದು ಕಂಡು ಬಂತು. ಸಾವಿರಾರು ಜನರು ಬೀದಿಗಳಿಗೆ ಬಂದು ರಕ್ಷಣೆಗಾಗಿ ದಿಕ್ಕಾಪಾಲಾಗಿ ಓಡಿದರು. ಮೃತರು ಹಾಗೂ ಗಾಯಾಳುಗಳನ್ನು ಆಸ್ಪತ್ರೆಗಳಿಗೆ ಸಾಗಿಸಲಾಗಿದೆ. ಈಗಾಗಲೇ 54 ಜನರು ಮೃತಪಟ್ಟಿದ್ದಾರೆ. ಕನಿಷ್ಠ 8 ಮನೆಗಳು ಬಾಂಬ್ ದಾಳಿಗೆ ಒಳಗಾಗಿದ್ದು ಡಜನ್ಗಟ್ಟಲೆ ಜನರು ಗಾಯಗೊಂಡಿದ್ದಾರೆ ಎಂದು ಗಾಜಾದ ಆರೋಗ್ಯ ಅಧಿಕಾರಿಗಳು ತಿಳಿಸಿದ್ದಾರೆ.
