ಘಟನೆಯ ವಿವರಗಳ ಪ್ರಕಾರ, ಫ್ಲೈದುಬೈ ವಿಮಾನವು ಮಾರ್ಗಮಧ್ಯೆ ಹಾರಾಟದಲ್ಲಿದ್ದಾಗ ಸಹ-ಪೈಲಟ್ ಹಮಾಮ್ ಅಲ್-ಹಮ್ಮಾಮಿ ಇದ್ದಕ್ಕಿದ್ದಂತೆ ಕಾಕ್‌‌ಪಿಟ್‌ನಲ್ಲಿದ್ದ ಕ್ರ್ಯಾಶ್ ಆಕ್ಸ್ (ಕೊಡಲಿ) ಬಳಸಿ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರ ಮೇಲೆ ಮನಬಂದಂತೆ ಹಲ್ಲೆ ನಡೆಸಿದ್ದಾನೆ. ವಿಮಾನವನ್ನು ಕೆಳಮುಖವಾಗಿ ಧುಮುಕಿಸಿ ಪತನ ಮಾಡುವ ಮೂಲಕ ಭಾರೀ ದುರಂತವೊಂದನ್ನು ಸೃಷ್ಟಿಸಲು ಆತ ಯತ್ನಿಸಿದ. ಗಾಯಗೊಂಡಿದ್ದರೂ ಪ್ರಾಣದ ಹಂಗು ತೊರೆದು ಹೋರಾಡಿದ ಭಾರತೀಯ ಕ್ಯಾಪ್ಟನ್ನ ಸಮಯೋಚಿತ ಸಾಹಸದಿಂದಾಗಿ ದೊಡ್ಡ ಅಪಘಾತ ತಪ್ಪಿದಂತಾಗಿದೆ.
ಸೌದಿ ಅರೇಬಿಯಾದ ತಬುಕ್ ವಿಮಾನ ನಿಲ್ದಾಣದಲ್ಲಿ ವಿಮಾನ ತುರ್ತು ಭೂಸ್ಪರ್ಶ ಮಾಡಿದ ಬಳಿಕ ಆರೋಪಿಯನ್ನು ಭದ್ರತಾ ಸಿಬ್ಬಂದಿ ವಶಕ್ಕೆ ಪಡೆದಿದ್ದಾರೆ. ಈ ಕುರಿತು ಯುಎಇ ಮತ್ತು ಸೌದಿ ಅಧಿಕಾರಿಗಳು ಜಂಟಿಯಾಗಿ ತೀವ್ರ ತನಿಖೆ ಮುಂದುವರಿಸಿದ್ದು, ಬಂಧಿತ ಸಹ-ಪೈಲಟ್‌ನ ಭಯಾನಕ ಮನಸ್ಥಿತಿ ಮತ್ತು ಕೃತ್ಯದ ಹಿಂದಿನ ಉದ್ದೇಶ ಒಂದೊಂದಾಗಿ ಹೊರಬರುತ್ತಿದೆ. ಉದ್ದೇಶಪೂರ್ವಕವಾಗಿಯೇ ಈ ಕೆಲಸ ಮಾಡಿದ್ದಾಗಿ ಒಪ್ಪಿಕೊಂಡಿದ್ದಾನೆ. ವಿಮಾನವನ್ನು ಪತನಗೊಳಿಸಲು ಯತ್ನಿಸಿದೆ ಮತ್ತು ಸಾವು ಅಂದರೆ ನನಗೆ ಭಯವಿಲ್ಲ ಎಂದು ಹೇಳಿದ್ದಾನೆ.
ಒಮಾನ್ ಮೂಲದ ತಂದೆ ಮತ್ತು ಸಿರಿಯನ್ ಪ್ರಜೆಯಾದ ತಾಯಿಗೆ ಜನಿಸಿ ದುಬೈನಲ್ಲಿ ವಾಸಿಸುತ್ತಿದ್ದ ಸಹ-ಪೈಲಟ್ ಹಮಾಮ್ ಅಲ್-ಹಮ್ಮಾಮಿ, ಸಿರಿಯಾ ಅಂತರ್ಯುದ್ಧದ ಸಮಯದಲ್ಲಿ ಅಲ್ಲಿ ಕಳೆದಿದ್ದ ಕಾಲದ ಬಗ್ಗೆ ಹಾಗೂ ಆತನ ಸಿರಿಯನ್ ನಂಟಿನ ಕುರಿತು ತನಿಖಾಧಿಕಾರಿಗಳು ತೀವ್ರ ತನಿಖೆ ನಡೆಸುತ್ತಿದ್ದಾರೆ. ಆತ ಸಿರಿಯಾದಲ್ಲಿದ್ದಾಗ ಉಗ್ರಗಾಮಿ ವಿಚಾರಧಾರೆಗಳಿಗೆ ಪ್ರಭಾವಿತನಾಗಿರಬಹುದು ಎಂದು ತನಿಖಾ ತಂಡ ಶಂಕಿಸಿದೆ.
