ಈ ಅಪರೂಪದ ಸಂಗತಿಯು ಬೆಳಕಿಗೆ ಬಂದದ್ದು ಆ ಜೋಡಿಯ ಮದುವೆಯ ಪೋಸ್ಟರ್ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದಾಗ. ಮದುವೆಗೆ ಬಂದಿದ್ದ ಕೆಲ ದೂರದ ಸಂಬಂಧಿಕರು ಪೋಸ್ಟರ್‌ನಲ್ಲಿ ವಧು ಮತ್ತು ವರನ ಹೆಸರು ಒಂದೇ ಇರುವುದನ್ನು ನೋಡಿ ಗೊಂದಲಕ್ಕೀಡಾಗಿದ್ದರು. ಆಯೋಜಕರು ಯಾವುದೋ ಎಡವಟ್ಟು ಮಾಡಿದ್ದಾರೆ ಎಂದು ಆರಂಭದಲ್ಲಿ ಅವರು ಭಾವಿಸಿದ್ದರು. ಆದರೆ ವಿಚಾರ ತಿಳಿದು, ವಧು-ವರರಿಬ್ಬರ ಹೆಸರು ಒಂದೇ ಎಂಬುದನ್ನು ಕಂಡು ಅವರೆಲ್ಲರೂ ಆಶ್ಚರ್ಯಚಕಿತರಾದರು.
ವಿಶೇಷವೆಂದರೆ, ಈ ದಂಪತಿ ವೃತ್ತಿಜೀವನದಲ್ಲೂ ಒಂದೇ ಕ್ಷೇತ್ರವನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಇಬ್ಬರೂ ವಿಮಾನಯಾನ ವಲಯದಲ್ಲೇ ಕೆಲಸ ಮಾಡುತ್ತಿದ್ದಾರೆ. ಇವರ ಈ ಕಾಕತಾಳೀಯ ಹೊಂದಾಣಿಕೆಯನ್ನು ಕಂಡು ನೆಟ್ಟಿಗರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ. ಇಷ್ಟು ನಿಖರವಾದ ಹೊಂದಾಣಿಕೆ ಇರುವುದು ದೇವರೇ ಇವರನ್ನು ಒಂದಾಗಿಸಲು ಮಾಡಿರುವ ಸೃಷ್ಟಿ ಎಂದು ಹಲವರು ಕಾಮೆಂಟ್ ಮಾಡಿದ್ದಾರೆ. ಅಲ್ಲದೆ, ಇವರ ಹೆಸರುಗಳ ಸಾಮ್ಯತೆಯನ್ನು ನೋಡಿ, ಮುಂದಿನ ದಿನಗಳಲ್ಲಿ ಇವರ ಮಗುವಿಗೆ 'ಕಾಂಗ್‌ಕಾಂಗ್' ಎಂದು ಹೆಸರಿಡಬೇಕು ಎಂದು ಕೆಲವರು ತಮಾಷೆಯಾಗಿಯೂ ಸಲಹೆ ನೀಡಿದ್ದಾರೆ.
ಮತ್ತೊಂದೆಡೆ, ಸಾಮಾಜಿಕ ಜಾಲತಾಣದಲ್ಲಿ ಈ ಮದುವೆಯ ಕುರಿತು ತಮಾಷೆಯ ಚರ್ಚೆಗಳ ಜೊತೆಗೆ ಕೆಲವರು ಕಳವಳಗಳನ್ನೂ ವ್ಯಕ್ತಪಡಿಸಿದ್ದಾರೆ. ಗಂಡ ಮತ್ತು ಹೆಂಡತಿ ಇಬ್ಬರ ಹೆಸರು ಸಂಪೂರ್ಣವಾಗಿ ಒಂದೇ ಆಗಿದ್ದರೆ, ದೈನಂದಿನ ಜೀವನದಲ್ಲಿ ಅಂಚೆ ಕಚೇರಿ, ಬ್ಯಾಂಕ್ ಕೆಲಸಗಳು ಅಥವಾ ಅಧಿಕೃತ ದಾಖಲೆಗಳಲ್ಲಿ ಸಾಕಷ್ಟು ಗೊಂದಲಗಳು ಉಂಟಾಗಬಹುದು ಎಂದು ಕೆಲ ಬಳಕೆದಾರರು ಕಳವಳ ವ್ಯಕ್ತಪಡಿಸಿದ್ದಾರೆ. ಈ ಚಿಕ್ಕಪುಟ್ಟ ಗೊಂದಲಗಳು ಮುಂದೆ ದಾಂಪತ್ಯ ಜೀವನದಲ್ಲಿ ಸಮಸ್ಯೆಗೆ ಕಾರಣವಾಗಬಹುದೇ ಎಂಬ ಪ್ರಶ್ನೆಯನ್ನೂ ಕೆಲವರು ಮುಂದಿಟ್ಟಿದ್ದಾರೆ.
