ವರ್ಚುವಲ್ ಮೀಟಿಂಗ್‌ನಲ್ಲಿ ಐಎಎಸ್ ಅಧಿಕಾರಿ ದರ್ಪ: ಮಹಿಳಾ ಅಧಿಕಾರಿಗೆ ನಿಂದನೆ, ವಿಡಿಯೋ ವೈರಲ್! Kumar Rajeev Ranjan

ವೈರಲ್​: ಜಮ್ಮು-ಕಾಶ್ಮೀರದ ಹಿರಿಯ ಐಎಎಸ್​ ಅಧಿಕಾರಿ ಕುಮಾರ್​ ರಾಜೀವ್​ ರಂಜನ್​, ತಮ್ಮ ಇಲಾಖೆಗೆ ಕೆಳಸ್ತರದ ಮಹಿಳಾ ಅಧಿಕಾರಿಗೆ ಅವಾಚ್ಯ ಪದಗಳಿಂದ ನಿಂದಿಸಿರುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗುತ್ತಿದ್ದು, ದೇಶದಾದ್ಯಂತ ಭಾರೀ ವಿವಾದಕ್ಕೆ ಕಾರಣವಾಗಿದೆ.

ಈ ವಿಡಿಯೋನಲ್ಲಿ ಕಾಣಿಸಿಕೊಂಡಿರುವ ಪುರುಷ ಐಎಎಸ್​ ಅಧಿಕಾರಿಯನ್ನು, ರಾಜ್ಯ ಕಾರ್ಮಿಕ ಇಲಾಖೆಯ ಕಾರ್ಯದರ್ಶಿ ಕುಮಾರ್​ ರಾಜೀವ್​ ರಂಜನ್​ ಎಂದು ಗುರುತಿಸಲಾಗಿದ್ದರೆ, ಇತ ಅಸಭ್ಯವಾಗಿ ನಡೆದುಕೊಂಡ ಮಹಿಳಾ ಅಧಿಕಾರಿಯನ್ನು ಕಾರ್ಮಿಕ ಇಲಾಖೆಯ ಸಹಾಯಕ ನಿರ್ದೇಶಕಿ ಬೀನಿಶ್ ವಾನಿ ಎಂದು ಹೇಳಲಾಗುತ್ತಿದೆ.

ವಿಡಿಯೋನಲ್ಲೇನಿದೆ?

ಸೋಷಿಯಲ್​ ಮೀಡಿಯಾನಲ್ಲಿ ಹರಿದಾಡುತ್ತಿರುವ ವಿಡಿಯೋನಲ್ಲಿ, ಇಲಾಖೆಯ ಕೆಲ ವಿಷಯಗಳ ಬಗ್ಗೆ ವರ್ಚುವಲ್​ ಮೀಟಿಂಗ್​ ನಡೆಸಲಾಗುತ್ತಿದೆ. ಈ ಸಂದರ್ಭದಲ್ಲಿ, ರಾಜ್ಯ ಸರ್ಕಾರದ ಮಿಷನ್​ ಯುವಾ ಎಂಬ ಯೋಜನೆ ಸರಿಯಾಗಿ ಕಾರ್ಯರೂಪಕ್ಕೆ ಬರದ ಹಿನ್ನಲೆ ರಾಜೀವ್​ ರಂಜನ್​, ಬೀನಿಶ್​ ಅವರ ಮೇಲೆ ರೇಗಿದ್ದಾರೆ. ವಿಳಂಬಕ್ಕೆ ಕಾರಣ ನೀಡಲು ಪ್ರಾರಂಭಿಸಿದಾಗ, ಐಎಎಸ್​ ಅಧಿಕಾರಿ, ಮಹಿಳೆ ಮೇಲೆ ಅವಾಚ್ಯ ಪದಗಳನ್ನು ಪ್ರಯೋಗಿಸಿದ್ದಾರೆ. ಆಗ, ಬೀನಿಶ್​, ಸರ್​ ನೀವು ನನ್ನ ಜತೆ ಈ ರೀತಿ ಮಾತನಾಡಬೇಡಿ ಎಂದಿದ್ದಾರೆ. ಆಗ, ನಾನು ನಿನ್ನ ಬಾಸ್​, ನಾನು ಇದೇ ರೀತಿ ಮಾತನಾಡುತ್ತೇನೆಂದು ರಾಜೀವ್​ ರಂಜನ್​ ಹೇಳಿದ್ದಾರೆ.

ಇದು ಎಐ ವಿಡಿಯೋ ಅಲ್ಲ!

ಈ ವಿಡಿಯೋ ವೈರಲ್​ ಆಗಿ ರಾಜೀವ್​ ರಂಜನ್​ ಬಗ್ಗೆ ಆಕ್ರೋಶ ವ್ಯಕ್ತವಾಗುತ್ತಿದೆ. ಆದರೆ ಕೆಲವೊಂದಿಷ್ಟು ಜನ ಇದೊಂದು ಕೃತಕ ಬುದ್ದಿಮತ್ತೆ ಸಹಾಯದಿಂದ ಸೃಷ್ಟಿಸಿರುವ ವಿಡಿಯೋ ಎಂದು ಆರೋಪಿಸಿದ್ದರು. ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ಮಹಿಳಾ ಅಧಿಕಾರಿ ಬೀನಿಶ್​ ವಾನಿ, ಇದು ಯಾವುದೇ ಎಐ ವಿಡಿಯೋ ಅಲ್ಲ, ಬದಲಾಗಿ ವರ್ಚುವಲ್​ ಮೀಟಿಂಗ್​ನಲ್ಲಿ ನನ್ನ ಮೇಲಾಧಿಕಾರಿ ನನ್ನ ಮೇಲೆ ರೇಗಿದ, ಅಸಹ್ಯಕರವಾಗಿ ನಡೆದುಕೊಂಡ ಘಟನೆಯಾಗಿದೆ ಎಂದಿದ್ದಾರೆ. ಯಾವುದೇ ಕ್ಷೇತ್ರದಲ್ಲಿಯೇ ಆಗಲೀ, ಮಹಿಳೆಯರಿಗೆ ಸರಿಯಾಗಿ ಗೌರವ ನೀಡುವ, ಆಕೆಯ ಮಾನಕಳೆಯುವ ಕೆಲಸ ಆಗಕೂಡದೆಂದು ಬೀನಿಶ್​ ವಿನಂತಿಕೊಂಡಿದ್ದಾರೆ.

ಮೇಲಾಧಿಕಾರಿಗಳು ದರ್ಪ ತೋರಬೇಡಿ!

ಈ ವಿಚಾರಕ್ಕೆ ಸಂಬಂಧಪಟ್ಟಂತೆ, ಜಮ್ಮು ಕಾಶ್ಮೀರ ಮುಖ್ಯಮಂತ್ರಿ ಓಮರ್​ ಅಬ್ದುಲ್ಲಾ ಪ್ರತಿಕ್ರಿಯಿಸಿದ್ದು, ಐಎಎಸ್​ ಅಧಿಕಾರಿಗಳು, ರಾಜ್ಯದ ಅಧಿಕಾರ ಮೇಲೆ ತಮ್ಮ ದರ್ಪ ತೋರಿಸಬಾರದು. ಇದರಿಂದ ಆಡಳಿತ ಯಂತ್ರದಲ್ಲಿ ವ್ಯತ್ಯಯ ಉಂಟಾಗುತ್ತದೆ. ಹಾಗೆಯೇ ಒಬ್ಬ ಮಹಿಳಾ ಅಧಿಕಾರಿಯೊಂದಿಗೆ ಯಾವ ರೀತಿ ನಡೆದುಕೊಳ್ಳಬೇಕೆಂಬ ಸೌಜನ್ಯವಿರಬೇಕು. ನಾನು ಈ ಘಟನೆಯನ್ನು ಖಂಡಿಸುತ್ತೇನೆ ಹಾಗೂ ಆ ಅಧಿಕಾರಿ ವಿರುದ್ಧ ಕಠಣ ಕ್ರಮ ತೆಗೆದುಕೊಳ್ಳಬೇಕೆಂದು ಮುಖ್ಯ ಕಾರ್ಯದರ್ಶಿಯಲ್ಲಿ ನಿವೇಧಿಸುತ್ತೇನೆಂದು ಹೇಳಿದ್ದಾರೆ.

ಕ್ಷಮೆ ಕೇಳಿದ ಐಎಎಸ್​ ಅಧಿಕಾರಿ!

ವಿಡಿಯೋ ವೈರಲ್ ಆಗಿ, ಪರಿಸ್ಥಿತಿ ಕೈ ಮೀರುತ್ತಿದ್ದಂತೆ ಎಚ್ಚೆತ್ತುಕೊಂಡಿರುವ ವಿವಾದಿತ ಅಧಿಕಾರಿ, ಕುಮಾರ್​ ರಾಜೀವ್ ರಂಜನ್​, ತಮ್ಮ ವರ್ತನೆಯನ್ನು ಮನ್ನಿಸಬೇಕೆಂದು ಕೋರಿದ್ದಾರೆ. ಆ ದಿನ ಮೀಟಿಂಗ್​ನಲ್ಲಿ ಎಷ್ಟು ಬಾರಿ ಪ್ರಶ್ನಿಸುತ್ತಿದ್ದರೂ, ಆ ಮಹಿಳಾ ಅಧಿಕಾರಿ ಉತ್ತರಿಸುತ್ತಿರಲಿಲ್ಲ. ನಾನು, ನನ್ನ ಮೇಲಾಧಿಕಾರಿಗಳಿಗೆ ಉತ್ತರಿಸಬೇಕಾಗುತ್ತದೆ. ಆದರೆ, ಆ ಸಂದರ್ಭದಲ್ಲಿ ನಾನು ನನ್ನ ತಾಳ್ಮೆ ಕಳೆದುಕೊಳ್ಳಬಾರದಿತ್ತು ಎಂದಿದ್ದಾರೆ, (ಏಜೆನ್ಸೀಸ್​).