ಮಸೀದಿಗೆ ನುಗ್ಗಿ ಕುರಾನ್ ಕದ್ದ ಪಾಕ್ ರೇಂಜರ್ಸ್: ಪ್ರತಿಭಟನಾಕಾರರ ಮೇಲೆ ಅಶ್ರುವಾಯು ಪ್ರಯೋಗ, ಲೂಟಿಗಿಳಿದ ಪಾಕ್ ಪಡೆ! Pakistani Rangers Stole Quran

ಪಿಓಕೆ: ಪಾಕ್​​ ಆಕ್ರಮಿತ ಕಾಶ್ಮೀರ ಪ್ರದೇಶಕ್ಕೆ ಸಿಗಬೇಕಾದ ಮೂಲಸೌಕರ್ಯಗಳ ಸಲುವಾಗಿ ಅಲ್ಲಿಯ ಜನ ನಡೆಸುತ್ತಿರುವ ಹೋರಾಟ 33 ನೇ ದಿನಕ್ಕೆ ಕಾಲಿಟ್ಟಿದೆ. ಆದರೆ ಈ ಹೋರಾಟಕ್ಕೆ ಸಕಾರಾತ್ಮಕ ಪ್ರತಿಕ್ರಿಯೆ ನೀಡಬೇಕಿದ್ದ ಪಾಕ್​ ಸರ್ಕಾರ, ಇಲ್ಲಿನ ಜನರ ಮೇಲೆ ತನ್ನ ಅಟ್ಟಹಾಸವನ್ನು ಮುಂದುವರಿಸಿದೆ.

ಶನಿವಾರ (ಜು.11) ಹೋರಾಟ ನಡೆಯುತ್ತಿದ್ದ ಸ್ಥಳಕ್ಕೆ ಆಗಮಿಸಿದ ಪಾಕಿಸ್ತಾನಿ ರೇಂಜರ್​ಗಳು ಬೂಟುಗಾಲಿನಲ್ಲಿ ಮಸೀದಿಯನ್ನು ಪ್ರವೇಶಿಸಿ, ಲೂಟಿ ಮಾಡಿ, ಪವಿತ್ರ ಕುರಾನಿನ ಪ್ರತಿಯನ್ನು ಕದ್ದೊಯ್ದಿದ್ದಾರೆ (Pakistani Rangers Stole Quran) ಎಂದು ಪಿಓಕೆ ಜನ ಆರೋಪಿಸಿದ್ದಾರೆ.

ಪಾಕ್​ ಆಕ್ರಮಿತ ಪ್ರದೇಶವನ್ನು ಪಾಕಿಸ್ತಾನ ಸರ್ಕಾರ ನಿರ್ಲಕ್ಷಿಸಿದ ಹಿನ್ನಲೆಯಲ್ಲಿ ನಡೆಯುತ್ತಿರುವ ಹೋರಾಟವನ್ನು ಹತ್ತಿಕ್ಕಲು ಸ್ಥಳಕ್ಕೆ ಆಗಮಿಸಿದ ಪಾಕಿಸ್ತಾನಿ ರೇಂಜರ್​ ಪಡೆ, ಹೋರಾಟ ನಿರತ ಪ್ರತಿಭಟನಾಕಾರರ ಮೇಲೆ ಅಶ್ರುವಾಯು ಪ್ರಯೋಗ ಮಾಡಿ, ಹತ್ತಿರದಲ್ಲಿದ್ದ ಮಸೀದಿಯನ್ನು, ಜನರ ಮನೆಯನ್ನು ಲೂಟಿ ಮಾಡಿದಷ್ಟೇ ಅಲ್ಲದೆ ಕುರಾನ್​ನನ್ನು ಕದ್ದುಕೊಂಡು ಹೋಗಿದ್ದಾರೆ ಎನ್ನಲಾಗುತ್ತಿದೆ.

ಈ ಘಟನೆ ಕುರಿತಂತೆ ಮಾತನಾಡಿರುವ ಹೋರಾಟಗಾರರ ನಾಯಕ ಸರ್ದಾರ್​ ಉಮತ್​ ನಜೀರ್​, ನಮ್ಮ ಮೇಲೆ ಪಾಕಿಸ್ತಾನಿ ರೇಂಜರ್​ಗಳು ಮತ್ತೊಮ್ಮೆ ದಾಳಿ ನಡೆಸಿದ್ದಾರೆ. ಈ ಬಾರಿ ಬಂದಿದ್ದ ರೇಂಜರ್​ಗಳು ಮಸೀದಿ ಮೇಲೆ ದಾಳಿ ಮಾಡಿ, ಮಸೀದಿ ಆವರಣವನ್ನು ಧ್ವಂಸಮಾಡಿ, ಅಲ್ಲಿದ್ದ ವಸ್ತುಗಳನ್ನು ಜಫ್ತಿ ಮಾಡಿ, ಕುರಾನ್ ಸೇರಿದಂತೆ ಇನ್ನುಳಿದ ಬೆಲೆಬಾಳುವ ವಸ್ತುಗಳನ್ನು ಕಳ್ಳತನ ಮಾಡಿದ್ದಾರೆ. ಇಸ್ರೇಲ್​, ಗಾಜಾ ಮೇಲೆ ಯಾವ ಅತ್ಯಾಚಾರ ಮಾಡುತ್ತಿದೆಯೋ, ಅದೇ ರೀತಿಯ ವರ್ತನೆಯನ್ನು ಪಾಕಿಸ್ತಾನ, ಪಾಕ್​ ಆಕ್ರಮಿತ ಪ್ರದೇಶದಲ್ಲಿರುವ ನಮ್ಮ ಮೇಲೆ ಮಾಡುತ್ತಿದೆ ಎಂದು ಆಕ್ರೋಶ ಹೊರಹಾಕಿದ್ದಾರೆ, (ಏಜನ್ಸೀಸ್​).