FIFA ವಿಶ್ವಕಪ್ ಬಹುಮಾನ ಮೊತ್ತ ಕೇಳಿದರೆ ಬೆರಗಾಗ್ತೀರಾ! T20 ವಿಶ್ವಕಪ್‌ಗೆ ಹೋಲಿಸಿದರೆ ಭಾರೀ ಅಂತರ

FIFA ವಿಶ್ವಕಪ್ 2026ರಲ್ಲಿ ಭಾಗವಹಿಸುವ ತಂಡಗಳಿಗೆ ಒಟ್ಟು 655 ಮಿಲಿಯನ್ ಅಮೆರಿಕನ್ ಡಾಲರ್ (ಸುಮಾರು ₹5,600 ಕೋಟಿ) ಬಹುಮಾನವಾಗಿ ಹಂಚಲಾಗುತ್ತಿದೆ. ಇದಕ್ಕೆ ಹೋಲಿಸಿದರೆ ಇತ್ತೀಚೆಗೆ ನಡೆದ ICC T20 ವಿಶ್ವಕಪ್ 2026ರ ಒಟ್ಟು ಬಹುಮಾನ ಮೊತ್ತ ಕೇವಲ 11.25 ಮಿಲಿಯನ್ ಡಾಲರ್ (ಸುಮಾರು ₹96 ಕೋಟಿ) ಮಾತ್ರ. ಅಂದರೆ FIFA ವಿಶ್ವಕಪ್‌ನ ಬಹುಮಾನ ಮೊತ್ತ T20 ವಿಶ್ವಕಪ್‌ಗಿಂತ ಸುಮಾರು 58 ಪಟ್ಟು ಹೆಚ್ಚು ಎಂಬುದು ವಿಶೇಷ.

ಈ ಬಾರಿ FIFA ವಿಶ್ವಕಪ್ ಅಮೆರಿಕ, ಮೆಕ್ಸಿಕೋ ಮತ್ತು ಕೆನಡಾ ದೇಶಗಳಲ್ಲಿ ನಡೆಯುತ್ತಿದೆ. 48 ತಂಡಗಳು ಭಾಗವಹಿಸುತ್ತಿದ್ದು, ಒಟ್ಟು 104 ಪಂದ್ಯಗಳು ನಡೆಯಲಿವೆ. 39 ದಿನಗಳ ಕಾಲ ನಡೆಯುವ ಈ ಟೂರ್ನಿ ವಿಶ್ವಕಪ್ ಇತಿಹಾಸದಲ್ಲೇ ಅತಿದೊಡ್ಡ ಆವೃತ್ತಿಯಾಗಿದೆ.1998ರ ನಂತರ ಇದೇ ಮೊದಲ ಬಾರಿಗೆ FIFA ವಿಶ್ವಕಪ್‌ನಲ್ಲಿ ತಂಡಗಳ ಸಂಖ್ಯೆಯನ್ನು ಹೆಚ್ಚಿಸಲಾಗಿದೆ. ಈ ವಿಸ್ತರಣೆಯ ಜೊತೆಗೆ ಬಹುಮಾನ ಮೊತ್ತದಲ್ಲೂ ಭಾರೀ ಏರಿಕೆ ಮಾಡಲಾಗಿದೆ.FIFA ಕೌನ್ಸಿಲ್ ಒಟ್ಟು 727 ಮಿಲಿಯನ್ ಡಾಲರ್ ಹಣವನ್ನು ವಿವಿಧ ರೀತಿಯಲ್ಲಿ ಹಂಚಲು ಅನುಮೋದನೆ ನೀಡಿದೆ. ಇದರಲ್ಲಿ 655 ಮಿಲಿಯನ್ ಡಾಲರ್ ನೇರವಾಗಿ ತಂಡಗಳಿಗೆ ಬಹುಮಾನವಾಗಿ ನೀಡಲಾಗುತ್ತದೆ.

ವಿಶ್ವಕಪ್ ಗೆದ್ದ ತಂಡಕ್ಕೆ 50 ಮಿಲಿಯನ್ ಡಾಲರ್ (ಸುಮಾರು ₹428 ಕೋಟಿ) ಸಿಗಲಿದೆ.

ಚಾಂಪಿಯನ್ – 50 ಮಿಲಿಯನ್ ಡಾಲರ್

ರನ್ನರ್ ಅಪ್ – 33 ಮಿಲಿಯನ್ ಡಾಲರ್

ಮೂರನೇ ಸ್ಥಾನ – 29 ಮಿಲಿಯನ್ ಡಾಲರ್

ನಾಲ್ಕನೇ ಸ್ಥಾನ – 27 ಮಿಲಿಯನ್ ಡಾಲರ್

5ರಿಂದ 8ನೇ ಸ್ಥಾನ – 19 ಮಿಲಿಯನ್ ಡಾಲರ್

9ರಿಂದ 16ನೇ ಸ್ಥಾನ – 15 ಮಿಲಿಯನ್ ಡಾಲರ್

17ರಿಂದ 32ನೇ ಸ್ಥಾನ – 11 ಮಿಲಿಯನ್ ಡಾಲರ್

33ರಿಂದ 48ನೇ ಸ್ಥಾನ – 9 ಮಿಲಿಯನ್ ಡಾಲರ್

ಇದರ ಜೊತೆಗೆ ಪ್ರತಿ ತಂಡಕ್ಕೂ ಸಿದ್ಧತೆ ವೆಚ್ಚಕ್ಕಾಗಿ ಹೆಚ್ಚುವರಿಯಾಗಿ 1.5 ಮಿಲಿಯನ್ ಡಾಲರ್ ನೀಡಲಾಗುತ್ತದೆ. ಅಂದರೆ ವಿಶ್ವಕಪ್‌ನಲ್ಲಿ ಕೇವಲ ಭಾಗವಹಿಸಿದರೂ ಒಂದು ತಂಡಕ್ಕೆ ಕನಿಷ್ಠ 10.5 ಮಿಲಿಯನ್ ಡಾಲರ್ ಸಿಗುವುದು ಖಚಿತ.

ಇತ್ತೀಚೆಗೆ ನಡೆದ ICC T20 ವಿಶ್ವಕಪ್ 2026ರಲ್ಲಿ ಭಾರತ ಚಾಂಪಿಯನ್ ಆಗಿತ್ತು. ಭಾರತಕ್ಕೆ ಪ್ರಶಸ್ತಿ ಗೆದ್ದಿದ್ದಕ್ಕಾಗಿ 2.63 ಮಿಲಿಯನ್ ಡಾಲರ್ ಬಹುಮಾನ ಸಿಕ್ಕಿತ್ತು.ಇದು FIFA ವಿಶ್ವಕಪ್ ಚಾಂಪಿಯನ್ ತಂಡಕ್ಕೆ ಸಿಗುವ 50 ಮಿಲಿಯನ್ ಡಾಲರ್‌ಗೆ ಹೋಲಿಸಿದರೆ ತುಂಬಾ ಕಡಿಮೆ.

ಚಾಂಪಿಯನ್ ಭಾರತ – 2.63 ಮಿಲಿಯನ್ ಡಾಲರ್

ರನ್ನರ್ ಅಪ್ ನ್ಯೂಜಿಲೆಂಡ್ – 1.42 ಮಿಲಿಯನ್ ಡಾಲರ್

ಮೂರನೇ ಸ್ಥಾನ ದಕ್ಷಿಣ ಆಫ್ರಿಕಾ – 1 ಮಿಲಿಯನ್ ಡಾಲರ್

ನಾಲ್ಕನೇ ಸ್ಥಾನ ಇಂಗ್ಲೆಂಡ್ – 9.74 ಲಕ್ಷ ಡಾಲರ್

ಇನ್ನು ಕ್ವಾರ್ಟರ್ ಫೈನಲ್ ಅಥವಾ ಸೂಪರ್ ಹಂತ ತಲುಪಿದ ತಂಡಗಳಿಗೆ 4.75 ಲಕ್ಷದಿಂದ 5.38 ಲಕ್ಷ ಡಾಲರ್ ನಡುವೆ ಬಹುಮಾನ ನೀಡಲಾಗಿತ್ತು.

ಕ್ರೀಡಾ ತಜ್ಞರ ಪ್ರಕಾರ ಫುಟ್ಬಾಲ್ ವಿಶ್ವದ ಬಹುತೇಕ ಎಲ್ಲ ದೇಶಗಳಲ್ಲಿ ಜನಪ್ರಿಯವಾಗಿದೆ. FIFA ವಿಶ್ವಕಪ್ ಅನ್ನು ಕೋಟ್ಯಂತರ ಜನರು ನೇರವಾಗಿ ವೀಕ್ಷಿಸುತ್ತಾರೆ. ಜಾಹೀರಾತು, ಪ್ರಸಾರ ಹಕ್ಕುಗಳು ಮತ್ತು ಪ್ರಾಯೋಜಕತ್ವಗಳಿಂದ FIFAಗೆ ಅಪಾರ ಆದಾಯ ಬರುತ್ತದೆ. ಇನ್ನೊಂದೆಡೆ ಕ್ರಿಕೆಟ್ ಕೆಲವು ದೇಶಗಳಿಗೆ ಮಾತ್ರ ಸೀಮಿತವಾಗಿದೆ. ಭಾರತ, ಆಸ್ಟ್ರೇಲಿಯಾ, ಇಂಗ್ಲೆಂಡ್, ಪಾಕಿಸ್ತಾನ, ನ್ಯೂಜಿಲೆಂಡ್ ಹಾಗೂ ಕೆಲವು ರಾಷ್ಟ್ರಗಳಲ್ಲಿ ಮಾತ್ರ ಕ್ರಿಕೆಟ್ ಹೆಚ್ಚು ಜನಪ್ರಿಯವಾಗಿದೆ.ಈ ಕಾರಣದಿಂದ FIFA ವಿಶ್ವಕಪ್‌ನ ಆದಾಯ ಮತ್ತು ಬಹುಮಾನ ಮೊತ್ತ ICC ಟೂರ್ನಿಗಳಿಗಿಂತ ಬಹಳ ಹೆಚ್ಚಾಗಿದೆ.

ಒಟ್ಟಾರೆ FIFA ವಿಶ್ವಕಪ್ ಮತ್ತು T20 ವಿಶ್ವಕಪ್ ನಡುವಿನ ಬಹುಮಾನ ಮೊತ್ತದ ವ್ಯತ್ಯಾಸ ಕ್ರೀಡಾ ಲೋಕದಲ್ಲಿ ಫುಟ್ಬಾಲ್‌ನ ಜಾಗತಿಕ ಪ್ರಭಾವವನ್ನು ತೋರಿಸುತ್ತದೆ. FIFA ವಿಶ್ವಕಪ್ ಗೆದ್ದ ತಂಡಕ್ಕೆ ಸಿಗುವ ಹಣವೇ T20 ವಿಶ್ವಕಪ್‌ನ ಒಟ್ಟು ಬಹುಮಾನ ಮೊತ್ತಕ್ಕಿಂತ ಹಲವು ಪಟ್ಟು ಹೆಚ್ಚಿರುವುದು ಗಮನಾರ್ಹ. ಈ ಅಂಕಿ-ಅಂಶಗಳು ಫುಟ್ಬಾಲ್ ಮತ್ತು ಕ್ರಿಕೆಟ್ ನಡುವಿನ ಜಾಗತಿಕ ವ್ಯಾಪ್ತಿ ಹಾಗೂ ಆರ್ಥಿಕ ಶಕ್ತಿಯ ಅಂತರವನ್ನು ಮತ್ತೊಮ್ಮೆ ಸ್ಪಷ್ಟಪಡಿಸಿವೆ,(ಏಜೆನ್ಸೀಸ್​).