ಈ ವಿಷಯದಲ್ಲಿ ಇಷ್ಟೆಲ್ಲ ಒಳಸುಳಿಗಳು ಇರುವಾಗ, ಈಗ ಇಲ್ಲಿ ವಾಸಿಸುತ್ತಿರುವವರ ಪೈಕಿ ಅಕ್ರಮ ನುಸುಳುಕೋರರು ಯಾರು ಎಂಬುದನ್ನು ಪತ್ತೆ ಮಾಡುವುದೇ ದೊಡ್ಡ ಸಾಹಸವಾಗಿದೆ. ಒಂದು ಅಂದಾಜಿನ ಪ್ರಕಾರ, ಸುಮಾರು 2 ಕೋಟಿ ಬಾಂಗ್ಲಾದೇಶಿ ಅಕ್ರಮ ನುಸುಳುಕೋರರು ಭಾರತದಲ್ಲಿ ವಾಸಿಸುತ್ತಿದ್ದಾರೆ ಎಂದು ಕೇಂದ್ರ ಸರ್ಕಾರವೇ ಹಿಂದೊಮ್ಮೆ ಅಧಿಕೃತವಾಗಿ ಹೇಳಿತ್ತು. ಅವರೆಲ್ಲರಿಗೂ ಭಾರತದ ಬಗ್ಗೆ ನಿಷ್ಠೆ ಇರುತ್ತದೆ ಎಂದು ಅಪೇಕ್ಷಿಸುವುದು ಕಷ್ಟವೇ. ಆ ಪೈಕಿ ಯಾರಾದರೂ ಭಯೋತ್ಪಾದಕ ಕೃತ್ಯಗಳಲ್ಲಿ ಅಥವಾ ಬೇರೆ ಗಂಭೀರ ಅಪರಾಧ ಪ್ರಕರಣಗಳಲ್ಲಿ ಸಿಕ್ಕಿಬಿದ್ದಾಗ ಮಾತ್ರ ಈ ವಿಷಯ ಚರ್ಚೆಗೆ ಬರುತ್ತದೆ. ಆಗ ಸರ್ಕಾರ ಅಂಥ ಎಲ್ಲ ಜನರನ್ನು ಪತ್ತೆ ಹಚ್ಚಿ ಕ್ರಮ ಕೈಗೊಳ್ಳುವುದಾಗಿ ಹೇಳಿ, ನಂತರ ಮರೆತುಬಿಡುತ್ತದೆ. ಇದರ ಬದಲು ಅಸ್ಸಾಂ, ಪಶ್ಚಿಮಬಂಗಾಳದಂತಹ ಗಡಿ ರಾಜ್ಯಗಳ ಮೂಲಕ ಬಾಂಗ್ಲಾದೇಶೀಯರು ನುಸುಳದಂತೆ ಎಚ್ಚರ ವಹಿಸಿದರೆ, ಇತರ ರಾಜ್ಯಗಳ ಸಮಸ್ಯೆಯನ್ನು ತಪ್ಪಿಸಲು ಸಾಧ್ಯವಾಗುತ್ತದೆ.
